Өзекті мәселелер

  • 12.09.19

    Қасымды түлен түртті. Түрткенде тіпті шектен шықты. Соңғы уақытта ащы суға үйір болды­. Таң алекеуімнен оразасын ішімдікпен ашады. Ішке түскен қызу миында қордаланған уайымын ұмыттырады. Зіл-батпан денесін жеңілдетеді. Отбасымды асыраймын, жеткіземін деп істемеген жұмысы  жоқ. Базарда арба да сүйреді. Жүк түсіруші де болды. Шеберхана ашып, аяқ киім де тікті. Жалданып жұмыс та істеді.

    ...
    Толығырақ...
  • 12.09.19

    Қалалық А.Тоқмағамбетов атындағы мәдениет үйінде өткен мемлекет басшысының «Сындарлы қоғамдық диалог – Қазақстанның тұрақтылығы мен өркендеуінің негізі» атты Қазақстан халқына Жолдауына арналған Қызылорда қаласының идеологиялық активі мен «Nur Otan» партиясы қалалық филиалының саяси кеңе­сінің бірлескен отырысында басым бағыттар сараланды. Жиынды қала әкімі Нұрлыбек Нәлібаев ашып, жүргізді.

    ...
    Толығырақ...
  • 12.09.19

    Алғашқы 8 айдың қорытындысы бойынша қала қазынасына 12 452,6 млн теңге түсім түсіп, жоспар артығымен орындалған. Дегенмен, салық саласында  түйткілдер тым көп. Мәселен, қала  көлеміндегі 13 базарда 1342 орын, 8 ірі сауда үйінде 915 орын жалға берілген. Базарл­ар мен сауда үйлерінде сауда жерлерін жалға алып, кәсіппен айнал­ысып жүрген азаматтар табыстарын төмендетіп көрсеткен. Бұл жөнінде Қы­зы...

    Толығырақ...
  • 12.09.19

    Облыс әкімі Қуанышбек Ысқақов осыған дейін өңірдегі алты ауданға ат басын бұрып, ауылдарын аралап қайтқаны бар. Сонау солтүстіктегі Арал мен оңтүстіктегі Жаңақорғанға дейін түгел шарлап шықты. Бірақ Ғанибек Қазантаев басқаратын облыс орталығының іргесіндегі Сырдария ауданына табан тіреген жоқ.

    ...
    Толығырақ...
  • 12.09.19

    Айжарық  СӘДІБЕКҰЛЫ

    СЕН   ӘЛЕМНІҢ ЖАНАРЫНДАСЫҢ,   АРАЛ!

    Арал атырабын жайлаған экологиялық апаттың дүние-әлемнің жанарына іліккеніне де талай жылдың жүзі аунады. Енді аманшылық болса, жиырм­асыншы ғасырды түгендеп, жаңа жүзжылдықты бастаймыз. Ең өкініштісі сол, алдағы ғасырдың табал­ды­рығынан тәуелсізді...

    Толығырақ...
Бейсенбі, 20 Шілде 2017

Түйе өсіріп, төскейді түлеткен PDF Print Email
Жаңалықтар - Халық-хабар
20.07.2017 16:26

Тіршілігі төрт түлікпен тығыз байланысқан ұлтымыз үшін түйе малының орны аса қымбат. Бітім-болмысы өзге түліктерден тым ерекше жануарды қазекеңнің киелі санауы да тегін емес. Түйенің пірін «Ойсылқара» атап, түсіне түйе кірсе, аруақтар қолдап жүр деп есептейтініміздің түп-төркіні тереңде жатыр. Ел арасында «Түйесі бардың киесі бар» деген қанатты сөздің таралуы да көп жайттың басын ашқандай.

Мақаланы жазу барысында ғаламтордан «Мұнан төрт-бес мың жыл бұрын айыр өркешті түйе Орта Азияда, сыңар өркешті түйе Африкада алғаш қолға үйретілген. Қазіргі таңда сыңар өркешті жабайы түйе жойылып кетсе, айыр өркешті жабайы түйе Монғолияның Гоби шөлінде ғана сақталған. «Сахараның салтанаты» атауын иеленген түйе түлігінің қадір-қасиеті бағзы заманнан мәлім. Ежелгі кезде сауда-саттық түйелі көш керуендері арқылы жүргізілген. Бір жолы Самарқан саудагерлері сапарға Жібек жолы арқылы 30 мың түйемен шыққан екен. Қазақ даласында да түйе өсіруге баса мән берілген. Ертеректе Ақтөбе өңіріндегі Сортаңды, Шақытты жерлерін жайлаған Қара деген кісінің 3 мың түйесі болған. Қазақстанда айыр өркешті түйе жиі кездеседі. Оны кейбір аймақтарда «айыр түйе», Арал мен Каспий аралығының тұрғындары «түс түйе» десе, жабайы түрі «қаптағай» деп аталады. Айыр өркешті түйе ғылыми тілде «бактриан» делінеді. Салмағы 450-690 килоға дейін тартады. Қазіргі кезде айыр өркешті түйенің қолға үйретілген үш (қалмақ, қазақ, монғол) түрі бар. Біздің елімізде қазақтың айыр өркешті түйесі көп өсіріледі. Ол құрғақ далалы, шөл-шөлейтті жерлердің табиғи жағдайларына жақсы бейімделген. Аңызақ ыстыққа, үскірік аязға төзімді келеді. Маңғыстау, Атырау, Батыс Қазақстан, Ақтөбе, Қызылорда, Жамбыл, Алматы, Шығыс Қазақстанның кейбір аудандарында кездеседі. Сыңар өркешті түйені ғылыми тілде «дромадер» дейді. Қазіргі кезде қолда аруана деп аталатын тұқымы бар. Жабайы түрі жойылып кеткен. Оның жалпы аты – «нар». Ұрғашысы – «мая» немесе «аруана», еркегі – «үлек». Сыңар өркешті түйе ыстыққа төзімді, бірақ қатты аязға шыдамайды. Орта Азия мен Қазақстанда ғасырлар бойы халықтық сұрыптау әдісімен өсіріліп келеді. Қазіргі таңда түйені еті, қымыраны және шудасы үшін өсіру пайдалы. Мамандардың пікірінше бір түйенің беретін өнімі 15 қойдың беретін өніміне тең» деген қызықты деректі оқыдым.

Жоғарыда айтылғандай, түйе малын өсіру Сыр өңірінде, оның ішінде Арал мен Қазалы аудандарында қарқынды дамыған. Әсіресе теңіз төскейіне бара қалсаңыз, «дала кемесі» атанған түліктің төресін жиі жолықтырасыз. Шілденің ми қайнатқандай аптабын, ақпанның бетіңді қарыған сақылдаған аязын елемей алшаң басқан алып тұлғалы түлікке таңдана көз тастайсыз. Қашанда маңғаз қалпынан танбай, маңайына жоғарыдан қарап аяңдай бергеніне тәнтілік танытасыз.

- Өңірімізде балық шаруашылығымен қатар ата кәсіп төрт түлік өсіру тұрақты дамып келеді. Оған мемлекет тарапынан жасалып жатқан нақты көмектердің тигізіп жатқан септігі мол. Бүгінгі таңда ауданның 8 ауыл шаруашылығы құрылымы асыл тұқымды мал өсірумен айналысады. Мысалы, «Құланды» ЖШС жылқының асыл тұқымды Мұғалжар және асыл тұқымды қазақтың айыр өркеш түйе тұқымын, «Көктем», «Байдаулет», «Бек», «Тұрарбек» шаруа қожалықтары асыл тұқымды қазақ жылқысын, «Берекет», «Ықылас», «Несібе» шаруа қожалықтары асыл тұқымды қазақтың ақ бас сиырының тұқымын өсіруде. Мына дерекпен бөлісе кетсем. Облыс бойынша 01.06.2017 жылға 44688 бас түйе малы болса, оның 26813 басы теңіз төскейінің еншісінде. Бұл – облыс көлеміндегі барлық түйе малының алпыс пайызы Арал ауданында деген сөз. Түйенің тек еті ғана емес, шұбаты мен шудасы да адам ағзасына аса пайдалы, сандаған кеселге ем екені ғылыми тұрғыда дәлелденген, - дейді Арал ауданының әкімі Мұхтар Оразбаев.

Әкімнің сөзі шындықтан жырақ емес. Аралда төрт түліктің төресі түйе малын өсіру сәт санап дамып келеді. Жоғарыда есімі аталған «Құланды» ЖШС-нің есебінде асыл тұқымды 1168 бас түйе бар. Шаруашылық асыл тұқымды түйе басына жыл сайын жем-шөптік азыққа субсидия алып отыр. Міне, нақты көмек. Серіктестіктің түйешісі Мұхит Сейітов – әке жолын жалғастырған ұл. Олай деуіміздің мәнісі бар. Оның әкесі Сахитжан да түйе бағып, абыройға бөленген жан. Мұхиттың қарамағындағы 200 бас түйе малының жартысынан астамы – аналық түйе. Ағымдағы жылы түйекеш жігіт әр 100 аналықтан 49 бас бота алып, мал басын 100 пайыз аман сақтады. Бұған дейін де ұзақ уақыт еселі еңбегімен ерекшеленген Мұхит Сахитжанұлы «Еңбек даңқы» медалін жарқыратып кеудесіне таққан еді. Ал еңбектің наны тәтті болары әлімсақтан аян.

Жұмабек Табынбаев,

Арал ауданы.

 


БІРЛІК пен ТІРЛІКТІҢ ЖЕМІСІ PDF Print Email
Жаңалықтар - Саясат
20.07.2017 12:06

Бірде  Қаз  дауысты Қазыбек би  Әнет  бабаға сәлем бере барып, бір ауыз өсиет айтуды өтінсе керек­. Сонда Әнет баба терең ойға батып:­

- Жарайды, айтайын. «Әкім» деген­  сөзді  жадыңда  сақта, - депті.

Қазыбек би Әнет бабаға риза­шылығын білдіріп, жора-жолдас­тарымен еліне қайтады. Ол жол-жөнекей жанындағы жолдаста­рынан:

- Әнет бабаның қандай өсиет айтқанын ұқтыңдар ма? - деп сұрайды. Бірақ бұл сауалға ешкім үндемейді. Сонда Қаз дауысты Қазыбек­ би Әнет бабаның айтқан өсиетін­  былай  деп  шешіпті:

-  «Ә» дегені – әділ бол,

«К» дегені – күншіл болма, көпшіл бол.

«І» дегені – ілтипатты бол,

«М» дегені – менмен болма, мейір­ман бол, - дегені».

Бұл өсиет Әнет бабадан Қазы­бе­к биге, Қазыбек биден қарға та­мыр­лы  қазаққа  мұра болып қал­ға­нына  да ғасыр  өткелі  қашан?!

Дәл осы өсиеттегі секілді қасиетті бойына жиған, уақыты мен қызметін туған топырағына арнап келе жатқан әкімдердің бірі Қырымбек Елеуұлы екенін қызылордалықтар мақтан тұтып жүр. Алаштың анасы атанған Сыр өңірінің соңғы төрт-бес жылдықта шырайы кіріп, архитектуралық ажары артып, өркениет пен қоғам талабымен үндестікте дамып жатқаны көңілімізге медеу. Қала келбетінің танымастай кейіпке енгені өз алдына, дарияның оң және сол жағалауында да көз тартарлық ғимараттар бой көтеруде. Бұл – аймақтың әлеуметтік-экономикалық  ахуалы  жақсарғанының, қарқынды даму динамикасының көрінісі. Берекелі бірлік пен тынымсыз тірліктің жемісі.

 

АУЫЛЫНА  ҚАРАП,  АЗАМАТЫН  ТАНЫ

Өткен жұмада облыстық мәслихаттың кезекті 14-сессиясы өтті. Онда аймақ басшыс­ы мәслихат депутаттарының алдынд­а алты айлық қорытынды есебін жариялады. Осы жиын барысында «ауылына қарап, азаматын таны» деген тәмсілдің астары анық ашылды. Айта кетейік, облыс­ты­ң әлеуметтік-экономикалық дамуының барлық көрсеткіштері бойынша мұнай өндіру мен өндіріс көлемін есептемегенде оң қарқын алып тұр.

- Жалпы алғанда, жылдың бірінші жартыс­ында әлеуметтік-экономикалық дамуд­ың барлық көрсеткіштері бойынша оң өсім байқалуда. Бірақ, бұл жерде объективті себеп бар – мұнай өндіру көлемінің табиғи төмендеуі. Бұл өздеріңізге белгілі. Өкінішке қарай, бұл көрсеткішке біз ешқанд­ай әсер ете алмаймыз. 2017 жыл болжамы – 6,8 млн тонна, 2016 жылға қарағанда 840 мың тоннаға аз, ал 4 жыл бұрын­ғы көрсеткіштен 4,2 млн тоннаға төмен­деген. Бұл көршілес Ақтөбе облысының жылдық мұнай өндіру көлеміне сәйкес. Ағымдағы жыл басынан біз 450 мың тоннаны ала алмадық. Жағдай мұнайдың тұрақсыз, төмен бағасына қатысты күрделенуде,- деді облыс әкімі Қ.Көшербаев сессия­ға қатысушылар алдында.

 

ШИКІЗАТҚА  ТӘУЕЛДІЛІКТЕН   АРЫЛАМЫЗ

Рас, шығынның көлемі мен мұнай саласы­ның экономикаға ықпалын еліміз­дің Ұлттық қорына түсетін түсімдерге қарап-ақ пайымдауға болады. Мәселен, 2013  жылдың  өзінде мемлекет қазына­сына  Қызылорда  облысынан 500 млрд теңг­е аударылған болса, ал биылғы жыл басын­ан  бар болғаны 58 млрд теңге аударыл­ған.

Сыр өңірінің табиғаты ауыл шаруашылығына бейім болғанымен, соңғы жылдары­ индустриалды аймаққа айналып барады. Бұл нәтижеге қуанбасақ, өкінбейтініміз анық. Өйткені аймақ халқының тыныс-тіршілігінің де бағыты ауысып, салалық кәсіптің түрі де түрленді. Шыны керек, бұған дейін облыс бюджеті «қара алтын­ның» құнымен толығып отыратын. Жер қойнауындағы басты байлығымыздың да көле­мі азайғалы біздің ғана емес, әлемнің де ойлана бастағаны рас. Кезекті сессия барысында бұл мәселе де Көшербаевтың назарынан шет қалған жоқ.

- Қызылорда облысында мұнай қорының азаюына байланысты  шикізатқа тәуелділіктен арылып,  құрылыс көлемін арт­тыр­у және жаңа өндіріс орын­дарын ашу мақсатында өңір экономикасын  әртараптандыруды көздейтін 2020 жылға дейінгі даму бағдарламасы әзірленді. Аймақ өңдеу өнер­кәсібінің дамуы­ бойынша рес­публи­када алдыңғы қатарда, бұл облыс экономикасындағы құрылымдық өзгерістер мен әртараптандырудың қарқынын көрсетеді. Мұндай қарқынды даму инвестиция тарту, құрылыс, ауыл шаруашылығы өнді­ріс көлемін дамыту және әлеуметтік салада да бар, - деп мәлімдеді аймақ басшысы.

 

БАСПАНАНЫҢ  АЛҒАШҚЫ  ТӨЛЕМІ   АЗАЯДЫ

Сәні мен салтанаты келіскен тұрғын үйлердің қатары күн санап­ көбейіп жатқаны көзімізге көрініп тұрған жақсылық. Баспанаға мұқтаж жандардың басты арманына қол жеткізуі үшін бой көтерген 980 пәтерлік тұр­ғын үйлердің 19-ы жыл басынан бері пайдалануға берілді. Жыл соңына­ дейін 1809  пәтері  бар  41 көпқабатты үй тұрғындар игілігіне беріледі деп жоспарланып отыр. Оның 11-і – халықтың әлсіз қорғалған топтарына арналған арендалық баспана. Тіпті тұрғындардың өз күшімен тұрғын үй салу көлемі 70 пайыздан асқан. Бұл біріншіден, баспанаға мұқтаж жандардың санын­ азайтса, екіншіден, әлеу­меттік ахуалдың жақсара түске­нін аңғартады. Айтпақшы, биыл «Қызыл­орда-Жезқазған» трассасының бойындағы 150 гектар аумаққа да тұрғын үй салу жоспарда бар. Жобаның негізгі сұлбасы бар, толықтай дайын болған жағдайда бұл жерге­ 1200 отбасына жеке тұрғын үй салуға мүмкіндік берілмек. Бұған дейін аймақтағы салынып жатқан ипотекалық тұрғын үйлердің алғашқы жарнасы 30 пайыз бола­тын. Мұны кез келгеннің қалтасы көтере алмайтындықтан, бұл мәселенің түйіні шеші­леді деп күтілуде.

- Тұрғындарға несиелік тұрғын үйді барынш­а қолжетімді ету үшін «Қазақстанның тұрғын үй құрылыс жинақ банкі» АҚ несиелерін беруде алғашқы төлемді 30%-дан 15%-ға дейін төмендету жөнінде мәселе­ қарастырылуда. Халықтың әлеуметтік жағын­ан аз қамтылған бөлігінің мүдделерін қорғау мақсатында жаңа тұрғын үйге орна­ластыру уақытын созып отырмыз. Облыс әкімдігі бұл мәселеде Үкімет тарапынан қолдау болады деп үміттенеді, өйткені, бұл жағдай өзге өңірлерге де тән. Дегенмен, аталған жағдай “ТҚЖБ” АҚ бақылауында қала береді, - деп атап өтті облыс әкімі.

 

ЗАУЫТ,  НЫСАНДАР  ҚАТАРЫ   АРТАДЫ

Қызылорда облысында зауыт құрылысын салу қарқыны да жақсы деңгейде дамы­п келеді. Бұған дейін тұралап қалған шыны зауытының құрылысы қайта жандан­ды. Одан бөлек жыл соңында тағы бір зауыттың іргетасы қаланбақ. Ол – кальций­лендірілген сода шығаратын зауыт.­ Негізі аталмыш зауыт құрылысы ертерек басталуы­ керек болатын. Алайда жоба бастамашысы­ тарапынан зауыттың өнім­ділік қуатын ұлғайту туралы шешім қабылда­нып, жобаға тиісті  түзетулер енгізілуде. Қаржы көлемі­нің 81 млрд теңгеден 87 млрд теңгеге немесе­ 7,4 пайызға ғана ұлғаюы нәтиже­сінде жобаның жылдық қуаты 200 мың тонна­дан 300 мың тоннаға дейін  көбеюде.

- Бүгінде Үкімет аталған жобаны мақұл­дап, жаңа зауыттың инфрақұрылымын жүргізу үшін 2018 жылы республикалық бюджеттен 3,5 млрд теңге бөлінетін болды. Бұл заманауи, әрі еліміздің барлық қажет­тілігінің 75%-ын қамтамасыз ететін республикадағы бірден-бір кальцийлендірілген сода өндіретін зауыт болмақ. Қазіргі күні кальцийлендірілген сода нарығын 100% импорттық өнімдер құрайды, - деп нақтылады Қ.Елеуұлы.

 

ҚОС   ҚУАНЫШ...

Аймақта көптен күткен САРАТС жобас­ының екінші кезеңін жүзеге асыру қолға алынады деп күтілуде. Аралдың тыны­с-тіршілігінің қайта түлеуіне себепкер болатын  бұл  жобаны қаржыландыруда біраз  кедергілер  болды. Алдағы уақытта осы келісп­еушіліктер реттеліп, жобаның бас­талуына жол ашылғалы тұр. Сыр жұртшылығының бірінші қуанышы осы болса, екінші қуанышы – сол жағалаудан салынатын Қазақ Орталық Атқару комитетінің  тарихи  ғимаратында  музеймен бірге  Елбасының рухани жаңғыру бағдар­ла­масынан туындайтын міндеттерді жүзеге асыратын аймақтық Рухани жаңғыру орталығы. Ғимараттың бой көтеретіні туралы­ аймақ басшысы облыстық мәслихат сессиясында­ жасаған баяндамасында тілге  тиек етті.

- ...Қазақ халқының өсіп-өркендеуіндегі арадағы бір ғасырлық уақыт осылайша­ бір-бірімен сабақтасып, рухани жалғасын таппақ. Сонымен бірге, Сырдария өзенінің сол жағалауынан Жастар ресурстық орталығының жаңа ғимараты бой көтереді. Жаңа орталық жастардың жан-жақты даму мәселелерімен айналысатын болады, - деді облыс  әкімі.

 

ЕТ   КОМБИНАТЫ   САЛЫНАДЫ

Аграрлық секторды әртараптандыру бойынша жұмыс қатар жүргізілуде. Біз қазір бақша дақылдары мен майлы дақылдар, сондай-ақ, картоп пен өнеркәсіптік негіздегі көкөніс өсіруді ұлғайту бойынша белсенді жұмыс істеудеміз. Өткен жылы көптеген жылдардан бері бақша өнімдерін экспорттауды жаңғырттық, шетелге 1000 тонна өнім жөнелттік. Ағымдағы жылы экспо­ртқа 2 мың тонна бақша өнімін шығар­у жоспарлануда. Бүтіндей қауын кластерін құру идеясымен жұмыстар ат­қарылуда. Сыртқы нарыққа шығарылатын экспорттың негізгі өнім түрлерін күріш пен балық құрайды.

- Соңғы төрт жылдың ішінде күріш экспо­рты 28%-ға, ал, балық 8 еседен жоғар­ы өсті. Біз қазір күріш өткізуде нарық­ты қайта бағыттау бойынша жұмыстарды бастадық, мысалы, Иранға. Бұл елде жыл сайын 3 млн тонна күріш импортталады. Жаңа нарыққа көшу барысында күріш шаруа­шылығы агроөнеркәсіп кешенінің негізгі экспорттық саласы болып саналады­. АӨК саласында күріштің экспортта алар орны 44%-ды құрамақ, - деген облыс әкімі ағымдағы жылы ет экспортын қамтамасыз ету үшін халықаралық ветеринарлық талап­тарға сай келетін ет комбинатын салу жоспары бар екенін айтты.

 

ЭКСПО  қонақтары  тамашалаған

этноауыл

Ежелден салт-дәстүрін дәріптеп, әдет-ғұрпын сақтап келе жатқан өңір екеніміз әмбеге аян. Тіршілігі табиғатпен етене байланыста болса, рухани кемелденуі сол салт-дәстүрден бір елі ажырамайтын ел үшін қазақы нақыштағы тіршілік сызбасын бейнеле­удің өзі мәртебе. Айтпағымыз, «ЭКСПО­ – 2017» халықаралық көрмесі аясында Қорқыт ата мемориалды кешенін­де ашылған этноауыл туралы. Топыраққа аунап өскен біздер үшін ауылдың тыныс-тіршілігі таныс болғанымен, өзгелер үшін тамаша туынды. Қазақ халқының қол­өнері, дәстүрлі ойындары осы этноауылда көрініс тапқан. Бұл жерді республика аймақ­тарынан ғана емес, Ресей, Голландия, Франция, Германия, Жапония, Польша мемлекеттерінен келген туристер тамашалады.

 

ТАРИФ:  ҚОСУ мен  АЛУ

Баға деңгейінің негізсіз өсуінің алдын алу бойынша ауқымды жұмыстар жүргі­зілуде. Бүгінгі таңда облыс бойынша тұтыну­ бағасының индексі, оның ішінде негізгі азық-түлік тауарларына бағалар жалпы еліміздегі орташа бағалармен салыстыр­ғанда төмен. Жалпы, инфляция деңгейінің ең төмен көрсеткіші біздің облыста. Бұл біздің құрылымдық бөлімшелердің, оның ішінде аймақтық Тұрақтандыру қорының тиімді ұйымдастыру жұмыстарының арқасынд­а айтарлықтай дәрежеде болып отыр. Десек те қоғамды ойландырып тұрған жайттар да жоқ емес.

- Алайда 1 тамыздан бастап Қызыл­ордада қоғамдық көліктегі жолаушылар тасым­алы тарифтерінің 70 теңгеден 90 теңгеге дейін өсуі өз кезегінде жалпы инфляция көрсеткіштеріне әсерін тигізеді деп күтілуде. Бірақ, бұл шараның біз мәжбүрлі екендігін түсінеміз. Жанармай мен қосал­қы­ бөлшектердің құны өсуде, ал қалалық автобус паркінің және жеке тасымалдаушылардың табыс деңгейі құлдырауда. Мұндай жағдай басқа өңірлерге де тән. Мысалы, Алматы қаласында 156 теңге. Тұрғындар тарапынан түсіністік болады деп ойлаймыз. Сонымен бірге, тұрғындардың әлеуметтік жағынан аз қамтылған бөлігін қолдау сақталып қана қалған жоқ, күшейтіле түсті, - деп мәлімдеді Қырымбек Елеуұл­ы.

Бір жағдайдың орнын екіншісі толықтыратыны секілді дәл сол тамыздың алғашқы­ күнінен бастап электр қуатымен қамтамасыз ету тарифі 5%-ға төмендетілмек. Бөлшек сауда тауар айналымының 6%-ға өсіп, оң серпін көрсетуі өте маңызды, бұл халықтың сатып алу қабілетінің өскендігін білдіреді. Соңғы екі жыл бойы бұл көрсеткіш бізде «теріс» болатын. Экономикадағы оң үрдістер жұмыссыздық деңгейін 4,8% шегінде ұстап тұруға мүмкіндік беруде. Бұл республика бойынша орташа көрсеткіштен де біршама төмен. Бұл ретте, айта кету қажет, біз бұл нәти­желер­ге байсалды оптимизммен қараймыз,  өйткені,  бізді алда ауқымды істер күтіп тұрғанын аймақ басшысы үнемі айтып­  жүр.

Сессия барысында облыс әкімінің есепті баяндамасынан соң күн тәртібіндегі мәселелер бойынша тиісті сала басшылары баяндама оқыды. Бұған дейінгі тұрақты комиссияда қаралған мәселелер турасында­ нақты шешімдер қабылданып, мәслихат депутаттарынан дауыс жиналды. Жиын соңында облыстық мәслихаттың кезекті сессиясының төрағасы болып Тасбөгет кенті округінен сайланған Жорабек Нұрымбетов тағайындалды.

 

МАРАПАТ   МЕРЕЙІ

Жиын соңында облыс әкімі Қ.Көшербаев мәслихат хатшысы Н.Сейіткәрімұлын 50 жасқа, мәслихат депутаттары Ж.Ибрагимұлы мен М.Бекжановты 60 жас мерейтойымен құттықтап, Қызылорда облысы әкімінің Құрмет грамотасымен марапат­тады. Өз кезегінде облыстық Ішкі істер депар­таменті бастығының орынбасары, полиция полковнигі Ә.Шаймағамбетов облы­стық мәслихаттың депутаттары А.Елеуұ­лына, М.Тоғысұлына және Б.Мақашевқа  «Қазақстан полициясына 25 жыл» төсбелгісін  табыстады.

 

Н.ҚАЗИ


P.S. Аймақ көлемінде ауқымды істерді атқарып келе жатқан облыс басшысының жұмысына баға беру үшін жергілікті бюджет болжамының 9,5%-ға асыра­ орындалғанын айтсақ жеткілікті. Экономикалық даму көрсеткішінің әлеуметтік­, инфрақұрылымдық бағыттарға да серпін беретіні түсінікті.

 

- Бүгінгі күні облыс бюджетінің көлемі 220 млрд теңгеге жетті, бұл өткен жылдың сәйкес кезеңімен салыстырғанда 15,5 млрд теңгеге артық, - деген бір ауыз сөзінен-ақ жеті аудан мен қаланы құшағына алып тұрған Қызылорда облысы­ның бүгінгі хал-ахуалын байқау қиын емес. Сырда серпінді жобалардың­ өміршеңдігін тілеп отыратын сенімді халық, сол елдің сеніміне селкеу түсірмей жұмыс істейтін адал әкім бар. Сессия барысында да әкім жұмысына дәл осындай­  оң  баға  берілді.

 


Күнтізбе

< Шілде 2017 >
          1 2
3 4 5 6 7 8 9
10 11 12 13 14 15 16
17 18 19 21 22 23
24 25 26 27 28 29 30
31            

Сауалнама

Аса мәртебелі шенеуніктердің қылмысқа шатылып жатқандығы нені аңғартады?
 

Ауа райы

Валюта бағамы

Қазақстан Республикасының Ұлттық Банкі валюталардың ресми бағамдары