Өзекті мәселелер

  • 15.11.18

    Сыр елінің серпіні ерекше екенін аймақ тұрғындары да, сырт көз – сыншылар да жиі айтып жүр. Экономикалық даму тұрғысынан кей салаларда сәл шегініс болса, басым бағыттар да жеткілікті. «Жұмыла көтерген жүк жеңіл» екендігін дәлелдеп келе жатқан қызылордалықтар мемлекеттік бағдарламалар аясында біраз шаруасын шалқытып отыр. Әсіресе кәсіпкерлер тарапы жолдауда айтылған тапсырмалар бойынша өз міндет...

    Толығырақ...
  • 15.11.18

     

     

    Берікбол  БАЙХОЖАЕВ,

    ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің Қызы...

    Толығырақ...
  • 15.11.18

    «Балама әйелді өзім таңдап алып беремін. Байдың байлығына қызықпаймын, бидің билігіне қызықпаймын, асыл пышақ қап түбінде жатпайды. Келінім ақылды болса, ұлымның елге даңқы кетеді. Би түскендей үй болу – әйелден. Әйелі жақсы болмай ер оңбайды? Ердің бақытын кетіретін де – әйел, ерге бақыт әперетін де – әйел» деп келінін өзі таңдайтынын айтқан Төле бидің Данагүлді қалай жолық­тырып, баласына айт...

    Толығырақ...
  • 15.11.18

    Қытық! Қызылы бар қызық сөз, құмары бар құнды сөз. Мұны солдан оңға қарай оқысаң да – қытық, оңнан солға  қарай  оқысаң да – қытық. Бұрын­ғы қыздардың бетінде қызарып, көз тартып­, көрініп тұрушы еді. Қазір ше? Зәру. Қат дүние. «Бүгінгі күні бүтін махаб­бат бар ма? Әй, қайдам? Сезім шіркін семіп кеткен. Ал қытық байғұс қырық жыл бұрын қайтыс болған» деп гөйітеді баз біреулер. Жо-жоқ, қытық әлі ...

    Толығырақ...
  • 15.11.18

    Бір күні қарап отырмай жеке бизнес жасағым келді. Жұрттың бәрі байып жатыр.­ «Кедей бол» деп менің маңдайыма біреу бормен бадырайтып жазып қоймағ­ан болар. Ауладағы жазғы үйді бұзып, «шындық» сататын дүкен аштым.

    - Әй, балам көп ұзамай тақырға отыра­сың,­ - деп әкем басын шайқады.

    ...
    Толығырақ...
Сәуір 2018

Есірткі затын заңсыз сатқан азамат құрықталды PDF Print Email
Жаңалықтар - Халық-хабар
23.04.2018 17:32

2018 жылдың 1 ақпан күні сағат 17.00 шамасында Қызылорда қаласы, Астана мөлтек ауданында жедел іс-шаралар барысында Қызылорда облысы ІІД Есірткі бизнесіне қарсы күрес басқармасының қызметкерлері есірткі затын заңсыз сатқан, тұрақты жұмысы жоқ 27 жастағы азаматты ұстады.

Ұсталған азаматтың қалтасынан 2 дана газетке оралған ерекше иісі бар жасыл түсті шөпке ұқсас зат анықталып, алынды. Алынған заттарға сараптама тағайындалып, қорытындысы бойынша салмағы 6,07 грамды құрайтын «кептірілген марихуана» екені дәлелденді.

Аталған азамат Қазақстан Республикасы Қылмыстық кодексінің 297-бабы 1-бөлігімен (есірткі заттарды, сол тектестерді өткізу мақсатында заңсыз дайындау, сақтау) кінәлі деп танылып, сот үкімімен мүлкі тәркілене отырып 5 жылға бас бостандығынан айыру жазасы тағайындалды.

Қызылорда ҚІІБ баспасөз қызметі

 


ҚЫЗЫЛОРДА ОБЛЫСЫНДА СУ ТАСҚЫНЫ МАУСЫМЫ ҚОРЫТЫНДЫЛАНДЫ PDF Print Email
Жаңалықтар - Халық-хабар
23.04.2018 16:40

Қызылордада 2017-2018 жылдардың қыс-көктем айларындағы су тасқыны кезеңінің қорытындысы бойынша мәжіліс өтті.

Мәжілісті ашқан облыс әкімі Қ.Көшербаев су тасқыны маусымында жауапты тұлғалардың өзара үйлескен жұмысының арқасында адам шығыны болмай, тұрғын үйлерге зақым келтірілмегендігін атап өтті. Су тасқынына қарсы дайындық шараларын тиісті деңгейде ұйымдастырып, атқара білген жауапты ұйым қызметкерлері мен еріктілер жасақ мүшелері, барлығы 18 адам, аймақ басшысының алғыс хатымен марапатталды.

Су тасқыны кезеңінің өту қорытындысы туралы  облыстық жұмылдыру дайындығы басқармасы басшысының міндетін атқарушы Ғабит Жаңабаев баяндама жасады. Оның айтуынша, өзен арнасындағы мұздың жүруі ағымдағы жылдың ақпан айының 26-сынан басталып, сәуірдің 1-не  аяқталды. Көктем-қыс мезгілінде бірнеше мәрте өзен суы арнадан шығып, жайылу оқиғалары орын алды, дегенмен, айтарлықтай шығын келтірмеді. Су тасқыны маусымы барысында жауапты ұйымдар тұрақты түрде  өзен бойында мониторинг жүргізіп, төтенше жағдайлардың алдын алу мақсатында арнайы техникаларды жұмылдырды. Алайда, осы кезеңде аудан әкімдіктерінде  су сорып тазалау жұмыстарына қажетті  арнайы техникалардың (мотопомпалар) жетіспейтіндігі белгілі болды. Осы орайда  жұмылдыру дайындығы басқармасы Қызылорда қаласы мен барлық аудан әкімдіктеріне өз бюджеттерінен қаржы бөліп, қажетті көлемдегі мотопомпалар сатып алу туралы ұсыныс айтты.

Жауапты департамент пен мекемелердің басшылары және аудан әкімдері жүргізілген жұмыстар туралы баяндады.

«Биылғы мұз жүру жағдайын аса көп шығынсыз өткіздік. Бұл Сырдария өзені бойындағы су шаруашылығы нысандары атқарған жұмыстардың нәтижесі десек те болады. Алайда, босаңсуға болмайды. Төтенше жағдайлардың алдын алу шараларын тұрақты түрде жүргізуіміз қажет», - деді облыс әкімі.

Мәжіліс қорытындысы бойынша аймақ басшысы аудан әкімдері мен мемлекеттік орган басшыларына келесі су тасқыны маусымына дейін өзен бойында қауіпті аймақтарды анықтап, қалпына келтіру жұмыстары мен  су шаруашылығы нысандарын жөндеуді және өзге де қауіпсіздік шараларын қолға алуды тапсырды.

Облыс әкімінің баспасөз қызметі

 


ОТБАСЫ – ҰЛТ БОЛАШАҒЫ PDF Print Email
Жаңалықтар - Халық-хабар
23.04.2018 10:35

Биыл Қазақстан мұсылмандары діни басқармасының бекітуімен «Ислам және отбасы» жылы деп жарияланған болатын. Осыған орай, өткен сенбі күні Арал ауданына ҚМДБ-ның Қызылорда облысы бойынша Өкілі, «Ақмешіт – Сырдария» мешітінің бас имамы Болатбек Ұласханұлы арнайы сапармен келді. Игі бастама аясында өңірімізге ат басын бұрған бас имамды аудан әкімі арнайы қабылдап, ауданда жоспарланып отырған діни бағыттағы шаралардың ел болашағы үшін әсіресе, жастар үшін маңызы зор екендігін тілге тиек етіп, қолдау танытты.

Одан ары, жоспарға сәйкес аудандық мәдениет үйінде аудандық ішкі саясат бөлімі және аудандық орталық мешіттің ұйымдастыруымен «Отбасы – ұлт болашағы» атты аудандық семинар өтті. Аталмыш семинарға ауданға қарасты қала, кент, ауылдық округтердің имамдары, мектептердің тәрбие ісі жөніндегі орынбасарлары, «Дінтану негіздері» пәнінің ұстаздары, психолог мамандар және жастар өкілдері қатысты.

Отбасы құндылықтарын қайта жаңғыртудың маңызы, исламдағы отбасының орны, бабалар өнегесі, дәстүрлі тәрбие мектебі тақырыптарын арқау еткен басқосуда семинар модераторы, аудан әкімінің орынбасары Р.Өтешов ауданға арнайы келген өкілді таныстырып, сөз кезегін ұсынды.

Өз кезегінде сөз тізгінін алған «Ақмешіт – Сырдария» мешітінің бас имамы Б.Абуов «Исламдағы отбасы» тақырыбында ой тербеп, «Пайғамбарымыз (с.а.у.): «Барлығың да бақташы секілдісіңдер және барлықтарың қоластыларыңдағылар үшін жауап бересіңдер. Басшы - бақташы. Ер адам - отбасының бақташысы. Әйел - ерінің шаңырағы мен балаларының бақташысы. Қысқасы, әрбірің бақташысыңдар және өздеріңе бағынышты жандар үшін жауаптысыңдар» - деп, ерлі-зайыптылардың міндеттерін ашық-айқын көрсеткен» - дей келе, ерлі-зайыптылардың міндеттері, отбасы құндылықтары мәселелері төңірегінде әңгіме өрбітіп, өнегелі мысалдарды айта отырып, отбасының тұтас мемлекеттің болашағын қалыптастырудағы маңыздылығына тоқталды.

Бұған қоса, тағылымды шара барысында зиялы қауым өкілі Ишмұрат Берденов «Отбасы құндылықтары» атты тақырыпта тәлім мен тәрбиеге толы баяндама жасады. Сонымен қатар, «Отбасы – ұлттық құндылықтарды қалыптастырудың қайнар көзі, тәрбиенің бастауы» тақырыбында №64 орта мектептің педагог-психологы Гүлдәурен Жалелова баяндама жасап, бала өміріндегі отбасының алар орны жайында кеңінен талдап өтті.

Қорыта айтқанда, Ислам отбасының ең әуелі сенім мен сүйіспеншілік және түсіністік негізінде құрылғанын қалайды. Бақытты отбасы болашақта ұлы тұлғалардың дүниеге келуіне қабілетті болмақ. Ендеше, елдің, ұлттың болашағы әр отбасында шешіледі, негізі қаланады. Расында, бұл жайттар көпке ой салары анық.

Арал ауданы әкімінің баспасөз хатшысы

 


ТЕҢІЗ ТАҒДЫРЫН ТОЛҒАҒАН ТУЫНДЫ PDF Print Email
Жаңалықтар - Халық-хабар
23.04.2018 10:31

Әбдіжәміл Нұрпейісов - ХХ ғасырда қазақ әдебиетіне зор үлес қосып, асқар биігіне шыққан Қазақстанның Халық жазушысы. Осы орайда, өткен сенбіде аудан әкімдігі мен аймақтық «Рухани жаңғыру» орталығының ұйымдастыруымен облыстық қазақ тілі мен әдебиеті пәні мұғалімдері арасында «Теңіз тағдырын толғаған туынды» тақырыбында Ә.Нұрпейісовтің «Соңғы парыз» романы бойынша дебат өткізілді.

Басты мақсат – Қазақстанның халық жазушысы, әлем оқырманына танымал Ә.Нұрпейісовтің «Соңғы парыз» романын талдау арқылы бәсекелік қабілет пен сананың ашықтығын дамыту, ұлттық бірегейлікті сақтай отырып, әлемдік мәдениет көшіне ілесу әрі ең бастысы, қазақ халқының рухани бай дүниесін паш ету.

Арнайы заңғар жазушының туған топырағы Арал ауданында өткен шараның ашылу салтанатында «Нұр Отан» партиясы аудандық филиалы төрағасының бірінші орынбасары Т.Қанатов «Бүгін мінекей, Елбасының «Болашаққа бағдар: Рухани жаңғыру» бағдарламалық мақаласы аясында жазушы шығармашылығына терең үңіліп, «Соңғы парыз» романын талдау арқылы қазақ халқының рухани бай дүниесін паш ету көзделіп отыр. Ендеше, ойы орамды, тілі жүйрік, сөз мәйегінің семсерін сілтеп, қарымды қаламгер-жазушының шығармашылығын талдауға келген барша дебат қатысушыларына сәттілік, шалқар шабыт тілеймін!»- деп, ізгі ниетін білдірді. Облыстық сайысқа Қызылорда қаласы, Арал, Қазалы, Шиелі, Қармақшы, Жалағаш және Сырдария аудандарының ұстаздарынан құралған жеті топ қатысты. Сайыстың әділқазылар құрамында аймақтық «Рухани жаңғыру» орталығының «Тәрбие және білім» бөлімінің басшысы Ә.Әбдіқалықова, «Рухани қазына» бөлімінің басшысы С.Қосанов, Қазақстан Жазушылар одағының мүшесі, журналист Қ.Есімсейітова және Қорқыт Ата атындағы ҚМУ-нің аға оқытушысы, филология ғылымдарының кандидаты А.Айтбаева мен «Өрлеу» БАҰО АҚ Қызылорда облысы бойынша педагог қызметкерлердің біліктілігін арттыру институтының аға оқытушысы, халықаралық тренер М.Омаровалар болды.

Дебат барысында әр топ шығарма желісіндегі оқиғалар легін «жақтаушы» және «даттаушы» негізінде қарастырып, романдағы көріністерді жік-жігімен талдап, ой орамдарын ортаға салды. Дебат барысында әр ұстаз өн бойындағы дара қасиеттері мен білімі арқылы оқушылардың белсенді азаматтық болмысын, тұлғалық қасиеттерін қалыптастыра алатын деңгейде екендіктерін дәлелдеп шықты.

Осылайша жалпы төрт сағатты қамтыған сайыс қорытындысына сәйкес I орын Шиелі ауданының тобына бұйырса, II орынды Арал ауданының тобы иемденді. Ал, Қазалы ауданының қатысушылары III орыннан көрінді. Бұған қоса, сайысқа белсене қатысқан мұғалімдерге түрлі марапаттар мен алғыс хаттар табыс етілді.

Аудан әкімдігінің және аймақтық "Рухани жаңғыру" орталығының ұйымдастыруымен өткізілген дебат аясында "Ә.Нұрпейісовтың шығармалары арқылы оқырмандық қызығушылықты қалыптастыру тәжірибемізден" атты арнайы көрме ұйымдастырылған болатын. Аталған көрмеге облыстық шараға қатысушы командалар белсене қатысып, өз көрме бұрыштарын таныстырып өтті.

Көрме сайысының қорытындысы бойынша I орынды Арал ауданы, II орынды Қазалы ауданы және III орынды Жалағаш ауданы иеленді.

Арал ауданы әкімінің баспасөз хатшысы

 


«БІЗ БОЛАШАҚ САРБАЗДАР» АТТЫ ӘСКЕРИ-ПАТРИОТТЫҚ САЙЫСЫ ӨТКІЗІЛДІ PDF Print Email
Жаңалықтар - Халық-хабар
23.04.2018 09:56

Сенбі күні аудандық ішкі саясат бөлімінің мемлекеттік тапсырысы шеңберінде аудандық білім бөлімінің қолдауымен "Қорқыт елі - Қармақшы" жастар қоғамдық бірлестігі және "Қармақшы аудандық жастар ресурстық орталығы" КММ-нің ұйымдастыруымен ҚР Қарулы Күштерінің 26 жылдығына арналған «Біз болашақ сарбаздар» атты әскери-патриоттық сайыс өткізілді. Әскери-патриоттық жастар жиынын өткізудегі басты мақсат – жастардың бойындағы отаншылдық сезімнің алауын жағау, әскери қызметті насихаттау, Қазақстан Республикасы Қарулы Күштерінің имиджін арттыру, жастар бірлестіктері арасындағы ынтымақтастықты нығайту. Әскери патриоттық тәрбие мемлекеттік органдардың, қоғамдық бірлестіктердің және ұйымдардың жастарда жоғары патриоттық түйсікті өз Отанына шын берілуге, өзінің азаматтық парызын орындауға дайын болуға шақыру болып табылады.

Сайыс барысында жеңімпаздарға аудандық ішкі саясат бөлімі мен "Қорқыт елі - Қармақшы" жастар қоғамдық бірлестігінің дипломдары мен бағалы сыйлықтарына ие болды.

Қармақшы ауданы әкімінің баспасөз қызметі

 


РЕСПУБЛИКАЛЫҚ СЕНБІЛІККЕ МЕМЛEКЕТТІК ҚЫЗМЕТШІЛЕР БЕЛСЕНДІ ҚАТЫСТЫ PDF Print Email
Жаңалықтар - Халық-хабар
23.04.2018 09:43

Қазақстан Республикасы Мемлекеттік қызмет істері және сыбайлас жемқорлыққа қарсы іс-қимыл агенттігі Қызылорда облысы бойынша департаментінің қолдауымен және Қармақшы ауданы әкімдігінің ұйымдастыруымен мемлекеттік қызмет істері органдарының құрылуына 20 жыл толуына орай «Таза қала» және «90 мың жаңа ағаштар» жалпы республикалық сенбілік акциясы өткізілді.

Жосалы кенті орталығындағы «Қобыз» ескерткіші саябағында аудан әкімі С.Мақашовтың қатысуымен 100-ге жуық мемлекеттік қызметші тал көшеттерін отырғызып, көркейту- көгалдандыру шараларына үлестерін қосты. Сонымен бірге барлық ауылдық округтер мен мекемелерде саябақтар мен гүлзарларға мыңға тарта ағаш түптерін отырғызу акциясы жалғасын тапты. Игі шараға мемелекеттік қызметшілермен қатар аудан тұрғындары және жеке кәсіпкерлер белсене қатысты.

Қармақшы ауданы әкімінің баспасөз қызметі

 


ҚЫЗЫЛОРДАДА ЛӘТИПА ҚОЖЫҚОВАНЫҢ ҚҰРМЕТІНЕ АРНАЛҒАН КӨРМЕ ӨТТІ PDF Print Email
Жаңалықтар - Халық-хабар
19.04.2018 16:23

Қызылорда көркемсурет галереясында Қазақстанның алғашқы театр суретшісі, халық шебері Ләтипа Қожықованың 125 жылдығына орай ұйымдастырылатын «Қожықовтар қолтаңбасы» көрмесі ұйымдастырылды.

Көрменің ашылуына Алматы қаласынан Ләтипа Қожықованың немересі Сәуле Құлахметқызы және өнер иесінің әріптестері мен шығармашылығын зерттеуші ғалымдар қатысты.

Облыс әкімі Қырымбек Көшербаев Қожықовтар династиясы - киелі Сыр топырағынан шыққан өнер әлемінің биік шыңын бағындырған, сол өнер өлкесінде қолтаңбасы қалған, қазақ мәдениетінде өз орны бар династия екенін атап өтті. Ләтипа Қожықованың жары, әулеттің басшысы, Қоңырқожа Қожықов «қырғыз» аталып келген ұлттың «қазақ» деген тарихи әрі нақты атауын қалпына келтіру мәселесін қоюына өз үлесін қосқан ағартушы ғалым. Ұлдары Құлахмет, Қожахмет, Нұрахмет, Сұлтан-Ахмет сынды он саусағынан өнер тамған азаматтар ұлт өнерінің төрінен өз орындарын алды.

«Қазақты әлемге қазақ ретінде танытқан екі дүние бар. Оның бірі – Мұхтар Әуезовтің «Абай жолы» эпопеясы болса, екіншісі, қазақ кино өнерінің тарихында алтын әріппен жазылған, әлемнің 80-ге жуық елінде көрсетіліп, бағасын алған «Қыз Жібек» фильмнің режиссері, тектінің тұяғы Сұлтан-Ахмет Қожықов екені бәрімізге аян. Әулеттің анасы, сән және қолданбалы өнер шебері Ләтипа Қожықованың қазақ қолөнеріне қосқан үлесі ұшан-теңіз. Екінші дүниежүзілік соғыс жылдары мемлекеттік тапсырыспен Ләтипа Мұңайтпасқызының қолынан шыққан қазақтың ұлттық киімдері Ф.Рузвельтке сыйға тартылып, қазір АҚШ-тағы Рузвельт музейінде сақтаулы. Сондай-ақ, ежелгі қазақ қолөнері дәстүрінде тоқылған сәндік бұйымдары мен ұлттық киім үлгілерін Алматыдағы Ә.Қастеев атындағы Өнер музейінен көруге болады», - деді аймақ басшысы.

Ләтипа Қожықованың немересі Сәуле Құлахметқызы әулет өмірінен естеліктерімен бөлісіп, алғыс айтты. Одан кейін қонақтар шебердің 70 суреті қойылған көрмемен танысты.

Сондай-ақ, бүгін «Ләтипа Қожықова және қазақтың ұлттық сурет өнері» атты  ғылыми-практикалық конференция өткізіліп, белігілі режиссер Болатхан Нүсіпбековтың Қожықовтар әулетінің өмірі мен шығармашылығына арналған «Тарлан» деректі фильмінің тұсауы кесілді.

Атап өтейік, 1926 жылы сол кездегі Қазақстанның астанасы Қызылордада тұңғыш Бүкілқазақстандық республикалық көрмесі өткен. Қазақстан суретшілерінің тұңғыш көшпелі көрмесі де 1928 жылы Қызылорда қаласында ұйымдастырылыпты. Көрмеге қойылған суреттерді республикамыздың бір қаласынан екіншісіне түйемен тасыған.

Өңірлік коммуникациялар қызметі

 


ДОНАЛЬД ДОҚ КӨРСЕТТІ PDF Print Email
Жаңалықтар - Саясат
19.04.2018 14:22

АҚШ президенті Дональд Трамптың есімі Батыс пен Ресей арасын жалға­ушы көпірге айналғандай. Құрлықтың ар жағы мен бер жағындағы саяси қақтығыс санкцияға ұласып­, әлемдік процестерге кері ықпалын тигізуде. Қағаз жүзіндегі қақтығыс әлем картасына өзгеріс енгіз­бесе де, бірқатар елдің «мұртын шауып» отырғаны сөзсіз. Өткен  ХХ ғасырда кіші сипатқа ие болған қарулы қақтығыстар үлкен соғысқа ұласып­, салдарынан ондаған елдің күлін көкке ұшырып, «жұрнағын» жерге­ жұттырған еді. Тарихты шеңбер, уақытты серіппе деп алсақ, талай жыл­ғы тарихи оқиғалар серіппенің кері қайтуымен байлығы тасып, шекесі тырсиып тұрған мемлекеттердің өзін жоқ қылып жібергеніне оқырман ретінде­ таныспыз. Қазіргі күні Сирия­да сегіз жылдан бері жалғасып келе жат­қан сұрапыл соғыс та тура сондай сипатқ­а ие болмаса, одан кем түсіп тұрған жоқ.

Жаһандық өлшеммен қарағанда сегіз жыл сүт пісірім уақыт секілді көрінеді. Алайда тұтастай бірігіп отырған бүтін елдің қабырғасын қиратып­, іргесін сөгіп, алқымнан алып, тұншықтырып, шаңырағын шайқап, қанша адамның қарғысына қалған уақыт болды. Туған жерінен топырақ бұйырып, жер жастанған­дарды есепке алмасқа тағы болмайды, үй-күйін тастай қашқан босқындар, далада қаңғырып қалған тұрғындар, тағысы­н тағы... бұлардың обалын кімге артамыз?

Өткен аптада жүрегі шайлығып отырған халықтың үстінен тағы да химиялық қару тасталып, бейбіт адамдар тұншығып, балалардың тыныс­ы тарылып, шетінеді. Бұл жағым­сыз ақпарат Таяу Шығыстағы ахуалды шиеленістіре түсті. Сирия мәселесі мен Ресейдің әр ізін аңдып отырған АҚШ билігі химиялық затпен толтырылған жарылғыш құралды Дума қаласының үстінен Асад әскерлері лақтырды деген айып тағып­, оған жауап ретінде Сирия әскерінің Т-4 әуе базасына АҚШ, Ұлыбритания және Франция үштігі зымыранмен шабуыл жасады. Айта кетерлігі, Тель-Авив Сирияның хими­ялық қаруды тіпті, өз аумағында қолдануын да жазасыз қалдырмайтынын әуелден-ақ ескерткен. Осыдан соң Араб елдері тез арада БҰҰ-ның Қауіпсіздік Кеңесін жинап,­ Сириядағы жағдайды тал­қылауды ұсынды. Әлем жұртының ойы сан-саққа жүгіргенімен, пікірі екіге жарылып отыр. Бірі Башар Асад билігін жақтаса, екіншісі химиялық қару қолданғандар жазалануға тиісті деп есептейді. Ресми Вашингтонның мәлімдеуінше, әуеден берілген соққылар химиялық қару жасалатын өндірістік кешендер мен оны сақтайтын қоймаларды жоюға бағыт­талған.

- Өткен сенбіде Асад билігі Дума қаласында өз халқына қарсы химиялық қару қолданды. Содан кейін АҚШ-тың қарулы күштеріне Сирия­да химиялық қаруға қатысы бар нысандарға жоғары дәлдікпен ша­буылдауға бұйрық бердім. Бұл операцияны Ұлыбритания мен Францияның қарулы күштерімен бірге жүргіздік. Егер Асад режимі химиялық қару қолдануды доғармаса, біз де шабуылды тоқтатпаймыз. Ал Франция билігі әуеден қайтып соққы берілмейтінін мәлімдеді. Өйткені алға қойған мақсат толық орындалған. Енді Башар Асад шектен шықпауы тиіс, - деп мәлімдеді АҚШ президенті Дональд Трамп.

Таяу Шығыстың ғана емес, әлемнің соғыс ошағына айналып тұрған Сирияның бүгінгі ахуалын бұдан оншақты жыл бұрынғы бет-бейнесімен салыстыру отын мен оның күлін көргенмен тең. Төбесі түнеріп, күннің көзін көлегейлей ұшқан зымырандар қаптаған мемлекетке «жығылғанға жұдырық» деп айтудың өзі жеткіліксіз. Бүрсігүні Оттавада бас қосқан «Үлкен жетілік» елдері химиялық қару қолдану – Химиялық қару туралы Конвенцияны бұзу, әлемдегі бейбітшілік пен оның тұрақтылығына қауіп төндіру деп айыптап, зымыран соққыларына «шектеулі, дәл тиетін және қа­жетті шара» деген баға берді. Ал күні кеше Қазақстан мен Ресей прези­денттері Таяу Шығыстағы ахуал туралы­ телефонмен сөйлесіп, әлем­дік жағдайларды сөз еткен. Сөйлесу барысында В.Путин Мәскеу мен Дамас­к Думада химиялық шабуыл болғанын жоққа шығарып, химиялық қару турал­ы хабарларды «арандату» деп есептейтінін айтқан. Ал Пентагонның  мәліметінше, Сирия­дағы Үкімет бақылауындағы үш нысан­ға 105 зымыран жіберілген.

- Әуе соққысынан ғылыми-зерттеу институты зақымданып, ғылыми зертханаларға материалдық зиян келді. Хомстағы әскери базаларға жасалған шабуыл кезінде үш тұрғын жараланды. Сирия армиясы халықты қорғауын тоқтатпайды. Мұндай соққылар сарбаздарымыздың Отан қорғауға деген рухын көтермесе, түсірмесі анық. Сириядағы ахуалға қатысты ресейлік тарап Біріккен Ұлттар Ұйымы Қауіпсіздік Кеңесін шұғыл жиын өткізуге шақырды. Ал Ресей президенті Владимир Путин АҚШ пен оның одақтастарының Сирияға жасаған соққыларын қатаң сынға алды. Тіпті әуе соққыларына жауап ретінде Сирияға С-300 зенитті-зымыран жүйесін жеткізу мәселесі қайта қарастырылатыны да сөз болды. Ресей әскерилерінің ай­туын­ша, бұл жолғы әуе соққыларын залалсыздандыруға Ресейдің зымыраннан қорғаныс жүйесі қатысқан жоқ. Өйткені ешбір зымыран Ресейге қарасты жерге жақын келмеген, - дейді Сирия армиясының өкілі.

Ал өз кезегінде Еуропалық одақ Сирия мәселесі бойынша кепілгер елдерді деэскалация аймағындағы әскери шабуылдарды тоқтатуға шақырды. Сондай-ақ, Шам еліне гуманитарлық көмектің кедергісіз жетуіне атсалысуға үндеді. Еуропалық одаққа мүше елдердің сыртқы істер министрлері Люксембургте кеңес өткізіп, Таяу Шығыстағы өткір мәселелерді талқылады. Еуроодақ деэскалация аймағына қатысты келісім­нің бірнеше мәрте бұзылғандығына алаңдаулы. Одаққа мүше мемлекеттердің өкілдері Астана процесіне кепілгер елдерді, яғни Ресей, Иран және Түркияны Сирияның барлық аумағына гуманитарлық көмек көрсетуге шақырып отыр.

О.СЕМСЕР



 

Жан-Ив Ле Дриан,

Францияның сыртқы істер министр­і:

- Әуе соққыларының басты мақсаты – Сирияның химиялық және биологиялық қаруды дамыту мен қолдану мүмкіндігін жою. Башар Асад режимі халықаралық заңды өрескел бұзды. Бұл қадам – соған жауап ретінде жасалған заңды әрекет­. Бұл операция елдегі азамат соғысына ықпал етуді немесе билікті құлатуды көздемейді. Ал Ұлыбритания Премьер-министрі Сирияға жасалған соққы Башар Асад билігіне ғана емес, жалпы әлемде химиялық қару қолдануға әрекет жасайтындарға ескерту екенін мәлімдеді.

 

Тереза Мэй,

Ұлыбритания премьер-министрі:

- Сирияның Дума қаласындағы химиялық қаруды Башар Асад билі­гінің қолданғаны айдан анық. Сондықтан Британия әскерилеріне американ және француз серіктес­терімізбен бірігіп, химиялық қаруға тосқауыл қою үшін шабуыл жасауға рұқсат еттім. Біз мәселені диплома­тиялық жолмен шешуге талпындық. Алайда нәтижесі болмады. Сондықтан күш қолданудан басқа амал қалмады. Бұл әрекетті Сирия­дағы азамат соғысына араласып неме­се елдегі режимді өзгерту үшін жасап отырған жоқпыз. Сирия үкіметі «шабуыл халықаралық талап­тарға қайшы» екенін мәлім­деді. Жергілікті мемлекеттік телеарналардың хабарлауынша, Дамаск бағытына 100-ден астам соққы жұмсалған. Елдің зымыраннан қорғаныс жүйесі оның жартысынан астамын залалсыздандырып үлгерді.

 

Сергей Рудской, Ресей Бас штабының жедел әрекет ету басқармасының басшысы:

- Дәл соққы жасалған күні Хи­мия­лық қаруға тыйым салу ұйымы­ның мамандары Думад­а тексеру жұмыстарын бастайтын еді. Да­маск­те химиялық қару жасай­тын мүмкіндік жоқ. Сондықтан бұрынғы нысанның бәрі қаңырап бос тұрды. Бірақ АҚШ-ты бұл ұйымның зерттеу нәтижелері қызықтырмады. Осылайша Таяу Шығыста бей­біт келісімдерге кесірін тигі­зіп, Сириядағы ахуалды одан әрі ушықтырды. Әзір­ге әлем елдерінің пікі­рі екіұдай. Ал Дамаск тұр­ғындары бомбалауға қар­сы болып, бас көтерді. Олар мемлекеттік жалауды биік ұстап, «бізді ешкім де қорқы­та алмайды» деп ұрандатты.

 


ЕКІ ТҮРЛІ ЕСЕП БОЛА МА? PDF Print Email
Жаңалықтар - Саясат
19.04.2018 14:12

Ауыл әкімдерінің ел алдында есепті кездесуі құдды қойылым секілді. Мұндай жиындарға ба­рып­ та жүрген шығарсыз. Сценарий бойынша жоғарыдан келгендер әкімнің атқарған жұмысын тыңдап, сондағы ағайынның уәжіне құлақ түреді. Сосын ауылдың ақсақалы «атып» шығып, «рақметтен басқа айтарымыз жоқ» деген сыңайдағы пікірін білдіретіні және бар. Ақсақал демекші, өткенде қызық болды. Жақында Сыр еліне Үкімет басшысы Бақытжан Сағынтаев ат басын бұрған. Ел-жұрт­пен кездесті. Сонда бір ақсақалымыз «Құрмет­ті, Бақытжан Әбдірұлы! Сіз бүгін сәтті күні келіп отырсыз. Кеше ғана біздің ауданда алай-түлей дауыл соғып, жаңбыр жауды. Осындағы жігіттер «Үкімет басшысын қалай күтіп аламыз?» деп алаңдады. Бүгін қараңызшы, ауа райы қандай тамаша болы­п тұр. Бұл да сіздің сапарыңыздың құттылығы» деп пікір айтты. Осыдан кейін еріксіз езуге күлкі үйірілетінін қайтерсің? Лауазымды кісілердің келуімен күн райын астастырып жі­берген ақсақалдардың әңгімесіне қайран қал­дық...

Әуелгі әңгімемізге оралсақ. Қайбір күні қала басшысы Нұрлыбек Нәлібаев Белкөл мен Тасбөгет кентінің әкімдерін «сойып» салды. Аппарат мәжілісінде екі бірдей әкімнің атқарған жұмысы сараланды.

– Өткенде ел алдында есеп бердіңіздер. Бардық, тыңдадық! Жақсы ұйымдастырыпсыздар! Кейбір мәселелер шеші­мін тапқан. (Белкөл кентінде. - ред.). Бірақ атқарылмай жатқан шаруалар да жетерлік. Құрметті ауыл әкімдері, есепті жиын­да өздеріңнің сөз­деріңді сөйлейтін кісі­лерді әкелесіңдер. Олар сендерді мақтайды. Дұ­рыс! Дегенмен сол сөз­дерге Сіздер­дің істеріңіз лайық  болуы керек қой! - деп шаһар басшысы шүй­лікті.

Байқағанымыз, екі бірдей кентте де жұмыссыздық, тазалық, мемлекеттік-жекеменшік әріп­тестік аясында жұмыс істеу, мемлекеттік бағдарламалардың орын­далу барысы төмен. Сонда, ауыл әкімдерінің есебі екі түрлі болғаны ма, әлде «қойылымның» жақсы ұйымдасты­рыл­ғаны ма? Әйтпесе, шаһар басшысы неге ашуға мінді? Нұрлыбек Мәш­бекұлы бір сөзінде «Ауыл  әкімдері, Сіз­дерге  барлық  жағдайды жасап отырмыз. Қолдан келген көмекті көрсетіп жатырмыз. Жақсы жұ­мыс істесеңіздер, мақтап та жүрміз. Тіпті, «осы кісілер ел алдында жүр, еңселері түспесін» деп бір-бір су жаңа қызметтік көлік те алып бердік. Неге жұмыс істемейсіздер?» деді.

Иә, осындай оқиға­лар жиындарда жиі болып тұрады. Былайғы жұртқа құрғақ сандарды сөйлеткеннен гөрі, ауы­лының ажары айшық­талғаны қажет. Айтпақшы, кейбір елді мекендерде «ауылдың оппозиционері» атанған кісілердің есепті жиынға кіре алмай кеткендігін де көргенбіз...

Асан  ДӘУЛЕТ

 


НЕСИЕНІ НЕСІНЕ АЛАМЫЗ? PDF Print Email
Жаңалықтар - Бүгінгінің болмысы
19.04.2018 14:08

ТІЛЕНІП   АЛСАҢ   АУРУДЫ,

ТІРІ   ҚАЛУЫҢ   ЕКІТАЛАЙ

Алғашқыда тақырыптағы сауал сіздің ызаңызды келтіруі мүмкін. Әрине, әдетте­ өзіңде  жоқ  нәрсені біреуден сұрайтының бесенеден белгілі ғой. Аяқастынан қажеттілік туындағанда немесе қомақты қаражатты керек еткенде адамдар амалсыздан банкке жүгіреді және банк қызметіне жүгінеді. Айтпақшы, бір-біріне ешқандай кепілсіз қарызға ақша беретін халық қазақ екенін көзіміз көріп жүр. Солай болған күннің өзінде әлгіндей ақша қазір екінің бірінде бар деуге аузың бармайды. Оны халықтың бүгінгі хал-ахуалы да айқындап тұр. Өткен жылғы статистикаға сүйенсек, 5 миллион отан­дас­тың мойынында несие бар екен. Олардың миллионнан астамы банктің маңына жолай алмай, қашып жүр. Бір жылда байығаннан олардың саны қыс­қарды деу ақылға сыймайтын шығар. Қайта жаңбырдан кейінгі саңырау­құлақтай қаптап келеді. Шенеуніктерше сөйлесек, “өсім бар, дамып жатырмыз”.

25 жылдан бері тәуелсіз мемлекет атансақ та, несиеге тәуелді біз ғана шығарм­ыз. Жо-жоқ, шетелде де несие­ деген ұғым бар екен. Бірақ, оларда еліміз­бен  салыстырғанда  едәуір айырмашылық байқалады. Еуропа елдері халқына 5-6 пайызбен несие берсе, бізде 17-25 па­йызбен ұсынады. Біздегі банктердің пайызы жоғары болған соң, ақшаны айызы­ қанып алады. Үсті-үстіне қосыл­ған ақша, ай сайын безектеп кеп тұратын­ кредиттің уақыты жұртшылықты әбден әуре-сарсаңға, мұң-қайғыға батырып отыр. Рас, сұрап алған аурудың емі жоқ. Қалай десек те, бел шешіп төсегіне жатар­ кезде белшеден кірген қарыз қазақты тыныш  ұйықтатпай  жүр.

 

КҮЛІП КЕЛЕТІН ҚАРЫЗ

ҚАЙТҚАНДА  НЕГЕ  ЖЫЛАЙДЫ?

Кредит алудың денсаулыққа зияны көп. АҚШ ғалымдары несиенің адамды қарызға ғана емес, сарыуайымғ­а батыратынын дәлелдеді. Олар көп қары­зы­ бар адамдардың инсульт алуға бейімділігі 15%-ға артық болатынын анықтаған. Әрине, бұл бір жағынан дәлелдеуге де келмейтін нәрсе ғой. Адам болған соң барлығы уайымдайды, мұңаяды. Өйткені, бұл өмірде мұңсыз адам жоқ, тек мұңын жасыратындар ғана бар. Сондай-ақ, несие – өз-өзіңді алдаудың бір жолы. Мән беріп қарасаңыз, әрбір кредиттің қайтару төлемақысы екі есеге дейін көбейеді. Осыны біле тұра алған затын арзанға түсті деп ойлайтындар көп. Бұл – психологиялық  берілу, адасу. Адамдар да қызық. Кредит алып той жасайды да, төлейтін кезде зар қақсап жылай жөнеледі­. Иә, бір қарағанда несие алу тығырықтан шығуды­ң оңтайлы жолы секілді көрінеді. Шын мәні­сінде, өзіңді алдап, өрге шыққанмен бірдей.

Қазақстанда банктер беретін несиенің 85%-ы мақсатсыз алынады екен. Той жасауға, қымбат көлікке, киімге, телефонға деген секілді жайттар мақсатсыз емес дейтін шығарсыз. Ал, мұның бәрі мақтаныш, дарақы­лық үшін немесе “ұят болады” деген елдің бір ауыз сөзі үшін жасалатын болған соң, мақсатты дей алмаймыз. Өткен жылғы несиелердің 16%-ы ипотекалық несие көрінеді. Яғни, уақытылы төлей алмасаң, үйіңді, сосын күйіңді тартып алады. Күліп келетін қарыздың қайтарда неге жылатып қайтатыны енді түсінікті болар. Ал, күліп келу мен жылатып кетудің ортасында жүйкеге сан мәрте салмақ түсіп, жүз мәрте жыр, мың мәрте мұң “сыйлайтынын” айтудың керегі шамалы.

 

БАНККЕ  БАР  БОЛҒАН  СОҢ  БЕРЕШЕГІ,

БҰЛЫҢҒЫР  БАЗ  БІРЕУДІҢ  КЕЛЕШЕГІ

6 жыл бұрын Дүниежүзілік Банк Қазақстанды қайтарылма­йтын кредиттер көлемі бойынша әлемдік рейтингтің үздігі деп таныды. Сол уақытта әрбір берілген үшінші кредит уақытында қайтпаған. Бұл – жай статистика. Ал, осы қайтарылған-қайтарылмаған несие­лердің артында басы бәйгеге тігілген, қолымен от көсеген миллиондаған тағдырлар тұр. Ойрандалған отбасы, сорақы суицид, қызметтен қуылу, ащы сумен араласу, қолын қанға малу, дене мүшелерін саудаға салу секілді жайттарды несиемен байланыстыруға болады­. Жамандықты жасыруға құштар басшылық тұрғанда қайғылы оқиғалар тап мынаның салдарынан болды деген әңгіме бізде айтыла қоймайды.

“Кредит алу – ақымақ әрекет”, - дейді маркетолог, іскерлік кітаптардың авторы Сэт Годин. Яғни, еліміздегі 18 миллион адамның 5 миллионынан астамы ақымақтың, шарасыз адамның әрекетін жасайды. Айтпа­қшы, сіздің алған несиеңіз көршіңізге не жақының­ызға да зиянын тигізуі мүмкін. Ол жайлы ойлап көрдіңіз бе? Мысалы, “пәленше де алды ғой, түгенше де төлеп отыр” деген ой адамды орға жығып, кредит алуға “қанаттандырып” жібереді. Осылайша, сіз ойда-жоқта өзгенің ойына “сенімділік” ұялатып тастайсыз.­

 

ҚАНДЫ  ҚАНМЕН  ЖУЫП  ЖҮРМІЗ...

Қанды қанмен жууға бола ма? Әрине, болады. Бірақ, одан қанның ізі кетпейді ғой. Сол секілді, кредитті кредитпен жабу да – сордың зоры. Жыртықтың үстін жыртықпен жамау немесе қауіп-қатерге бір қолыңды емес, екі қолыңды беру секілді. Алдау-арбау, жалған құжаттар, жемқорлық, т.с.с. жайттар Қазақстанда бір адамның басында бірнеше несиенің болуына­ себепкер болып отыр. Несиені несиемен қайтару – онсыз да аз емес қарызыңды тағы да арттыру, үстіне қосу, тиісінше батпаққа бату. Былайынша айтқанда, бұл – бір күндік ғана қуаныш.

Халық – Құдайдың бір аты десек, осы атпен де халықты “тонайтын” банк бар бізде. Несібесін несиеден іздеген талай жанның тағдырға наз айтып, налып жүргені шындық. Банкке бағынышты болып қалғандар, яғни еті үйренгендер есігін қайта қағуға қорықпайтындай. Тиісінше “атын атай көрме” деп ат-тонын ала қашатындар табылып қалар. “Несиені несіне аламыз­?” деген сауалға жауапты шамданып беретіндер, “несиені неге жабамыз?” деуі де мүмкін ғой. Меніңш­е, несиенің анықтамасы “адамдардың саналы түрде істейтін санасыздығы” дегенге келетін секілді. Несие алу – қарызға тәуелділік дегенімізбен, қысымда­ жүру, шынайы қарым-қатынастан алшақтау екенін де ұмытпаған жөн болар.

Рыскелді   ЖАХМАН

 



<< Бірінші < Алдыңғы 1 2 3 4 5 6 7 8 9 10 Келесі > Соңы >>

Күнтізбе

< Сәуір 2018 >
            1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30            

Сауалнама

Аса мәртебелі шенеуніктердің қылмысқа шатылып жатқандығы нені аңғартады?
 

Ауа райы

Валюта бағамы

Қазақстан Республикасының Ұлттық Банкі валюталардың ресми бағамдары