Өзекті мәселелер

  • 19.12.19

    Кешегі даласында абақ­тысы жоқ, бес қаруы белінде жүрсе де жауынан өзгеге қару жұмсамаған заманда елдің бір-біріне өкпесі, кеткен есесі болмады дейсің бе? Болды ғой. Бірақ, сол заманның өзінде қойнындағы қаруға тұра ұмтылмай, әділдікті, ақ пен қараны шешетін әулеттің үлкені не ауылдың ажасы, оған көнбей жатса, елдің қожасына жүгінді емес пе? Дау бұған да бөгет бермеген кезде биге барып соңғы ше...

    Толығырақ...
  • 19.12.19

    Ақыл  жетпес

    Адамның ақылы өлшеусіз мол. Алайда сол ұлан-ғайыр, шексіз ақылыңның кейде кішкентай, уақ-түйек мәсе­лелерді шеше алмай, тұйыққа тіреліп, жол таба алмай, адасып­  жүретініміз  қалай?!

    ...
    Толығырақ...
  • 19.12.19

    «Кувад синдромы» туралы бұрын-соңды естіп пе едіңіз? Мүлдем естімеген болуыңыз да мүмкін. Бұл – ер адамның жүкті әйел секілді күй кешуі. Мұндай да болады. «Кувад» сөзі француздың «couver» деген етістігінен шыққан, яғни қазақшалағанда «жұмыртқа басу» дегенді білдіреді. Бұл синдром екіқабат әйелдің күйеуінде жүктіліктің үшінші айында басталып, сәби дүниеге келгенге дейін жалғасуы ықтимал....

    Толығырақ...
  • 19.12.19

    Шырылдаған бала дауысынан селк ете қалған олар өздері секілді тағы бір күнә­сіз­дің жетім қалғанын сезді. Сәбиді түннің бір уағында тауып­ алған тәрбиеші дереу төсекке жатқызып, жұбата бас­тады. Әбден жылай-жылай көзінен жасы сарқылған баланың демі бітіп, әрең тыныс алады. Көздері жәудіреген бір топ баланың естісі аузындағы емізікті жұлып алып, апайына ұстатты. Жанаршылықпен қараған оның ересек...

    Толығырақ...
  • 19.12.19

    Поэзия

     

    Ботадай боздап аспан жылайды,

    Алдайды бәрін түлкі үміт.

    Жапырақтардан жас тамшылайды,

    Жапырақ жүрек бұлқынып. ...

    Толығырақ...
Қыркүйек 2019

БАЛА БАСЫН ШЕКТЕУ СӘН ЕМЕС PDF Print Email
Жаңалықтар - Арнайы беттер
19.09.2019 10:25

Басылымның арнайы «Отбасы» беті үшін жаңа айдармен оқырмандарға тың жоба ұсынған едік. Алғашқы кейіпкерлеріміз қаржы саласының мамандары болды, бұл жолы жаңа оқу жылы басталуына орай ұстаздар қауымы арасынан таңдағанды жөн көрдік. Бұл жолғы кейіпкерлеріміз – қазалылық ұстаздар Еділ Саниязов пен Асылзат  Қайназарова.

- Еділ, Асылзат, әңгіменің әлқиссасын таныстықтан  бастасақ...

Еділ:

- Менің туған жерім – Қазалы ауданы­. Құтты мекенде туып-өскеніме өте қуаныштымын. Өмірдің үлкен баспал­дағын басар алдында көп ойланып, Қорқыт­ ата атындағы Қызылорда мем­лекеттік университетіне оқуға тапсырдым. Бүгінде аудандағы аграрлы-техникалық колледжінде арнаулы пән мұғалімі болып жұмыс істеймін.

Асылзат:

- Мен Арал қаласында дүниеге келдім. Балалық шағым да сол қасиетті топы­рақ­та өтті. Балаң қиялмен оқушы кезімізде ұстаздарымызға қарап бой түзеп, арманымызға қанат бітірдік. Мектеп қабырғасын бітірген соң Қызылорда қаласындағы «Болашақ» университетіне оқуға түсіп, бас­тауыш пән мұғалімі мамандығын алып шықтым. Қазіргі таңда Қазалы қаласындағы Ғ.Мұратбаев атындағы №17 мектептің  бастауыш  сынып  мұғалімімін.

- Екеуіңіз де адамзат болашағына жол ашатын білім саласының маманы болып қызмет атқарасыздар. Бір-бірлеріңізге сабақ орындау барысында көмектеріңіз тие ме?

Асылзат:

- Екеуміз де бір салада, ортақ мето­дикамен жұмыс істегенімізбен, сабақ беру үрдісіміз әртүрлі. Білім беру ісінің ортақ қағидалары мен бағыттары болғаннан кейін  кей-кейде ұқсастықтар кездеседі. Сондай  мезеттерде  бір-бірімізден ақыл-кеңес сұрап, ортақ шешім қабылдаймыз.

- Әр үйдің бір-бір еркесін мектеп қабырғасында тәрбиелеп, оларға білім беру – оңай шаруа емес. Үйге келгенде өз балаларыңызға қалай  көңіл  бөлесіздер?

Асылзат:

- Рас айтасыз, бір сыныпта оқитын балал­ардың мінез-құлықтары, тәрбиесі мен еркелігі ортақ үйлесім таппайды. Деген­мен, олардың бір-бірімен жақын дос, бауыр ретінде араласуына ұстаздың да септігі тиюі керек. Оларға тәрбиемен қатар білім беру – біздің міндетіміз. «Тәрбиесіз берілген білім – адамзаттың хас жауы» деген сөз бар емес пе?! Сол секілді мектепте әр баланың қасиеті мен дарындылығын ұштастырып отыру оңай емес. Ал үйдегі балаларымыздың тәр­биесіне келгенде де аса қиындық жоқ. Шүкір Аллаға. Ортамызда отырған ата-анамыз да білім саласының мамандары болғандықтан жүгіміз ауыр емес.

Еділ:

- Жұмыстың ізін қуып, бала тәрбиесіне көңіл бөлмеу – қазіргі уақыттың басты проблемасы десек те болады. Соның салдарынан қоғамда балалардың қаты­суымен түрлі келеңсіз жайттар орын алуда­. Сол себепті жұмысқа да, отбасындағы тәрбиеге де тең көзқараспен қарау керек деген ойдамын.

- Сіздердің мамандық игерулеріңіз сәйкестік пе, әлде бір  саладан  болашақ  жар таңдау  жоспарда  болды  ма?

Еділ:

– Бұл – бізге жиі қойылатын сұрақтардың бірі. Бірақ біз оқу оқып жүргенде бір-бірімізді таныған жоқпыз. Яғни, ешқан­дай сәйкестік, ойластыру оқиға­лары болған емес. Тіпті бастапқыда мен басқа  салада  жұмыс  істедім.

- Қазіргі таңда жас отбасылардың дені ата-енеден бөлек тұруды қалайды. Сіздерде  бұл  мәселе  қалай  шешілген?

Асылзат:

- Әр отбасының өзіне тән ерекшелігі болады. Бәлкім, соған да байланысты шығар. Ал бізде ата-енеден бөлек тұру деген ой мүлде болмапты. Тіпті, елес­тете алмаймын. Отбасындағы бағыт-бағдар­ беріп, ақыл-кеңесін айтып отыратын­ үлкен кісілердің өзі – байлық. Бүгінгі бізбен  қатар толқындардың көбі ене мен келін арасындағы келіспеуші­лікті алға тартады. Алайда­ келін кіші­рейіп, ізетін салып тұрса, мұндай олқылықтар орын алмайды­  деп  ойлаймын.

- Жас отбасы, жас мұғалім ретінде қазіргі отбасылы жастардың басты проблемасы қандай деп ойлайсыздар?

Еділ:

- Бұл сұраққа тек мұғалім ретінде емес, қоғамның мүшесі ретінде жауап беруге болады. Қазір жастар арасында қызу талқығ­а түсетін тақырыптардың қата­рында баспана, жұмыссыздық мәселелері бар. Бірақ бұл бір адамның айтуымен ғана емес, қоғам болып шешілуі тиіс жайттар.

- Соңғысы– біздің  дәстүрлі  сұрақ. Бала санына келгенде есепке әлде қазақы ментал­итетке  жүгінесіздер  ме?

Асылзат:

- «Балалы үй – базар». Бала – үйдің қуанышы. Әр адамның ұрпақ жалғастығы саналатын бала басын шектеу «сән» емес. Оған себеп те жоқ емес. Әлгінде айтқан баспана, жұмыссыздық мәселесі жас­тардың осындай қадамға баруына себеп болуда. Бұл тек отбасылық түйткіл емес, еліміз үшін демографиялық ахуалға салынға­н «тұзақ» болып тұр. Өзімізге келер­ болсақ, Алланың берген аманатына қиянат жасамау – азаматтық пары­зымыз, ата-аналық міндетіміз. Сондықтан есепке жүгінетін ойымыз жоқ.

- Уақыт  бөлгендеріңізге  көп  рақмет!

 

Сұхбаттасқан  Н.ҚАЗИ

 


ҮЗІЛМЕГЕН ҮМІТ PDF Print Email
Жаңалықтар - Сергек
19.09.2019 10:20

Өткен сенбі мен үшін ерекше күн болды. Қас қарая бір топ жігіт жар­қын үнмен сәлемдесіп, үйге енді. Шынымды айтса­м, көпшілігін жыға танымадым. Салиқалы жүзді, парасатты азаматтар. Десе де, тау бары­сындай  епті  қимылдары, билеп жүргендей әсем аяқ басуларына қарап «бұрынғы боксшылар шығар» деп топшылаған едім. Топ ішін­дегі өзім шырамытқан қос жігітті көргенде  ойым­ның шындықтан  жырақ кетпегенін түй­сіндім. Баршасы ағалап, хал-жағ­дайымды  сұрап  жатыр.

Дастарқан басына жайғасып, аз-кем тіл­дес­кен соң бір кездегі балаң боксшылар, қазір бір-бір шаңырақтың  иесі  атан­ған азаматтардың аты-жөндері, олардың бокс­тағы бағындырған бе­лестері, шаршы алаңдағы жасындай жарқылдаған сәттері, жекпе-жекке шақыр­ған гонг даусы, безек­тей шырылдаған ысқырық үні, төрешінің қатулы өңі, ерсілі-қар­сы­лы сілтенген салмақты жұмырықтар, әрбір шә­кіртінің сенім-жігерін жаныған Тарғын бапкердің  терге  малшынған айбатты жүзі, жеңістің тәтті, жеңілістің кермек дәмін сезінген шақ... бәрі-бәрі сынапша сыр­ғып көз алдымнан өтіп жатты... Бұлар бокстан КСРО спорт шеберлігіне үміткер, білікті бапкер, марқұм Тарғын Нұра­лиевтің  Ақтөбе  мен  Қызылорданы, Байқоңыр мен Қазалыны қоныс­танған көптеген шәкірт­терінің санау­лы  бөлігі  ғана  болатын.

Бір кездері шаршы алаңның нағыз­ шеберлері болған Берекет Сәрсенбаев, Қайыржан Аманов, Сақытжан Акимов, Батырбек Сыдық­ов, Талғат Сайдуллаев, Нұр­жан Жәнібеков, Қуандық Қалилаев, Қайыркелді Табынба­евтар сөздерін Тарғы­н ағайларына арнап облыстық турнир ұйымдастыру мәселесін қозғаған Қуанған Бәкен мен маған, өнегелі істі қолдаған Қазалы ауданын­ың әкімі Мұрат Ергеш­баев пен орынбасары Әлім­жан Жарылқағановқа, облыстық дене шынықтыру және спорт бас­қарма­сына ризашы­лық айтудан бастад­ы. «Жақсы сөз – жарым ырыс». Марқай­ып  қалдым.

Ел ағаларына алғыс айтуларының жөні бар. Тарғынның көзін көрген азаматтар Қазалы боксының дамуына өз қолтаңбасын өшпестей қалдырған, шаршы алаңның талай саңлақтарын түлеткен бапкердің есімін жаңғырту мақсатында тым құрығанда, аудандық турнир өткізуді, ондай жағдайда демеуші болуға дайын екендерін бұған дейін де білдіріп, бірнеше жыл қатарынан ұсыныс жасаған болаты­н. Алайда сол тұста аудан билігінің тізгінін ұстаған әкімдер тарапынан қолдау таппады. Аудандық спорт комитеті, өзге  құ­зырлы орындар да үнсіздік танытты. Десе де, ауданға басшылыққа кезінде өзі де тәп-тәуір боксшы болған­ Мұрат Нәлқожаұлының келуі сөнуге айналғ­ан үміт отын қайта  лаулатты.­ Мәкеңнің қолдауы Тарғын  Нұралиев атындағы бокстан облыстық турнир өткізуге жол ашты. Бұл үшін аудан әкіміне қалайша риза болмайсың?! Қазір дүбірлі  додаға  дайындық  басталып  та  кетті.

 

Жұмабек  ТАБЫНБАЕВ,

Қазалы  ауданы


Құрметті  бокс   жанашырлары!

Қараша айының 25-29-ы күндері Әйтеке би кентіндегі   №17 спорт мектебінің кешенінде 2006-2007 жылы туған жасөспірімдер арасында, 20 салмақ дәрежесі  бойынша  білікті бапкер, бокстан КСРО спорт шеберлігіне  үміткер Тарғын  Нұралиевті  еске түсіруге арналған облыстық  турнир  өткізіліп, марқұмның аруағына  құран бағышталатынын, жарысты көрудің тегін екенін естеріңізге саламыз! Қосымша мәліметтерді 87081307185, 87026138918 ұялы  телефондары  арқылы  алуға,  білуге  болады.

 


ОБЛЫСТЫҚ КІТАПХАНА – ІРІ АҚПАРАТТЫҚ МӘДЕНИ ОРТАЛЫҚ PDF Print Email
Жаңалықтар - Арнайы беттер
19.09.2019 10:00

Негізі, кітапханадан көп нәрсені іздеуге және табуға болады. Бірақ, ол үшін кітапхана есігімен қатар, ондағы кітаптың да бетін ашуыңыз керек. Жай аша салғаннан іздегеніңіз табылып кетпесі де анық. Оқу бар және түсініп оқу деген бар. Ыңғайлысын өзіңіз таңдаңыз. Сол секілді, керегін, қажеттісін тауып, бойға сіңірудің де маңызы зор. Халық даналығында «кітапты өртеуден де жаман қиянат – оны оқымау» деп ашық айтылады.

Айтпақшы, қазір кітапханаға «тек кітап алатын, оқитын жер» деп ғана қарауға болмайды. Мысалы, Ә.Тәжібаев атындағы облыстық әмбебап ғылыми кітапханасы – өңіріміздегі мәдениет пен өнердің, ғылым мен білімнің дамуына зор үлес қосып келе жатқан ірі ақпараттық мәдени орталықтардың бірі. Сондықтан, мұндай мәдени орталықтардың жұмысы назардан тыс қалмай, әрдайым жарияланып отыруға тиіс. Біз де осы мақсатта қолға қалам алған едік.

Жалпы, орталық кітап­ханада 9 бөлім, 7 сектор жұмыс істейді. Кітапхана жылына 31935 оқырманға қызмет көрсетеді. Бүгінде кітап қоры 402756 дананы құрайды, оның ішінде 112227 данасы – мемлекеттік тілде. Кітапхананың сирек кітаптар мен қолжазбалар қорында 606 дана кітап бар. Мұнда әмбебап сипаттағы әртүрлі сирек кездесетін құнды басылымдар сақталған. Қолжазбалар қоры қазақ, орыс, өзбек, қырғыз, араб, парсы, латын, тәжік, түрік, шағатай, татар, корей тілдеріндегі жазба ескер­ткіштерден құралған. Кітап  басылымдарының  дені – Қазан төңкерісіне дейін, 1961 жылға дейін жарық  көрген  басылымдар.

Кітапханада қоғам қайраткері, жазушы, драматург Қалтай Мұхамеджановтың залы (жеке кітапханасы) ашылған. Мұнда жазушының 8 мыңға жуық кітабы, тұрмыстық заттары, кәдесыйлар, басқа да әр алуан заттар, құттықтау хаттар мен фотоқұжаттар бар. Сондай-ақ, ақын Ә.Тәжібаевтың музей­і де жұртшылыққа қызмет­  етуде.

Кітапханаларды жастардың тұрақты келіп тұратын заманауи білім орталықтарына айналдыру мақсатында кітапханадан коворкинг орталығы ашылған. Ол – жұмыс істеуге, іскерлік кездесу мен түрлі іс-шаралар өткізетін орын. Коворкинг орталықтың негізгі мақсаты – әлеуметтік маңызы бар бастамаларды, жобаларды және бір­лесе жұмыс жүргізу. Аталған орталық төрт аймаққа бөлін­ген:  іскерлік қатынас аймағы, бейресми кездесулер аймағы, демалыс аймағы және жеке жұмыстар істеуге арналған  алаң.

Кітап пен оқуды алға жылжытуға бағытталған жобалар, кітапхана процесіне жаңа технологияларды енгізу, электронды каталог құру, құжаттарды электронды жеткізу­, виртуалды анықтама қызметі, құжаттарды цифрлық жүйеге көшіру жұмыс­тары кітапханада күнделікті жүзеге асуда. Дәстүрлі кітапханалық қызмет көрсетумен қатар электронды техноло­гияларға негізделген жаңа қызмет түрлері де ұсынылады. Ақпараттық технологиялардың дамуы қорды сақтау ісінде жаңа мүмкіндіктер ашты. Кітапханада құжаттық мұраларды сақтау және қайта өңдеу қызметтері бағытында сирек кітаптарды цифрлау, кітаптарды қалпына келтіру жұмыстары жүргізілуде. Қазіргі таңда «Құжаттық мұраларды  цифрлау» жобасы аясында өлкетану бағытындағы 3738 кітап цифрлық форматқа көшірілген. Сондай-ақ, 1941-1970 жылдары шыққан «Ленин жолы», «Путь Ленина» газеттерінің де цифрлық форматы жа­салды.

Кітапханада жұмыссыз жастарға және әлеуметтік жағынан аз қамтамасыз етілген азаматтарға қолдау көр­сетуге бағытталған «Шаңырақ» интеллект орталығы жұмыс істейді. Орталықта жұмыссыз жастар мен мүм­кіндігі шектеулі азаматтардың еңбек пен бәсекеге қабілеттілігін арттыру, ІТ технологияларды пайдалануға үйрету мақсатында компьютерлік курс ұйымдастырыл­ған.

Азаматтарды қаржылық сауаттылыққа үйрету, кәсіп ашудың әліппесін, ақшаны басқарудың жолын үйрету мақсатында «Қаржылық сауат­тылық клубы» жұмыс істейді. Клубтың мақсаты – шағын және орта бизнес өкілдері мен зейнеткерлерге, жастар мен жұмысшы азаматтарға қаржылық сауаттылық тұрғысында тегін ақыл-кеңес­тер  беру. Яғни, азаматтарды несие алу мен өзге де қаржылық операциялар барысында қателіктерден сақтандыру. Клуб аясында тәжі­рибелі практик-дәріскерлер­ді тарта отырып, семинар-тренингтер, дөңгелек үстел мен шеберлік сағаттары ұйымдастырылады. Қатысушылар өз қаржысын тиімді басқаруға және қаржылық қызметтерді тұтыну барысында өз құқығын сауатты қорғай білу туралы тегін ақыл-кеңестер  ала  алады.

Сыр өңірінен шыққан талант­ты жастарды бір әдеби ортаға жинап, шығармашылық деңгейін көтеруге, рухани-әдеби ортаның қалып­тасуына, жас дарындардың жаңа көзқарастарын дамыту­ға жағдай жасау, жергілікті шығармашылық иелерін ке­лер­ буынға таныту мақсатында «Жауқазын-ғұмыр» жас ақындар  клубы  жұмыс  істей­ді. Кітапханада өнер саласындағы дарынды жандар шығармашылығын насихаттау, мүдделері мен қызығушылықтары ортақ жан­дарды біріктіру, жастардың өнерге деген қызығушылығы мен ынтасын қалыптастыру­ға ық­пал ету мақсатында «Өнер» клубы жұмысын бастаған. Клуб жанынан «Домбыра үйрену» және «Форте­пиано» үйірмелері жұмыс істейді. Үйірмелердің мақсаты – оқушылар мен жас өнерпаздарға домбыра, форте­пиано тартуды, аспапта ән айтуды кәсіби тұрғыда меңгерту, музыка­лық сауаттылықты артты­ру. Сондай-ақ ұлттық қолөнерімізді жаң­ғырту мақсаты­нда  шеберлік сабақтары  ұйымдастыры­лады.

Жастардың ойлау қабіле­тін дамыту, қоршаған орта туралы танымдарын байыту, сурет салу өнерінің әдіс-тәсілдерімен, негізгі қағидаларымен таныстыру, әдемі­лік пен әсемдікке, ізгілік пен парасаттылыққа тәрбиелеу мақсатында «Сурет салу», барел­ьеф-студия үйірмелері жұмыс істейді. Кітап оқуды дамыту, кітап оқу мәртебесін көтеру, кітап оқуды насихаттау мақсатында кітап көрмелері, ақын-жазушылармен кездесулер, шығармашылық кештер, кітап тұсаукесері, оқырмандар конференциялары тұрақты түрде өтіп тұрады.

Биыл 23 сәуір – Дүние­жүзілік кітап және авторлық құқықты қорғау күніне орай «Kitap Fest – 2019» кітап фестивалі жоғары деңгейде ұйымдастырылған. Кітап фестив­алі аясында «Open Space: Кітапхана жастар көзімен…» ашық сұхбат, «Қазақстанның болашағы – жастар» атты ашық микрофон, «Жастар жырлайды» атты поэзия кеші, «Жастардың да айтары бар!» жас ақындар айтысы да өтті. «Руха­ни жаңғыру» бағдарламасын насихаттау мақсатында туған жердің құндылық­тарын құрметтей білетін, бола­шақта Қазақстанды өркендетуге өз үлесін қосатын азаматтар тәрбиелеу мақсатында «Рухани жаңғыру – мәңгілік ел болудың кепілі», «Мәңгілік елдің маңызды қадамы», «Ұлы даланың тұлғалары» атты кітап көрмелері, қоғам қайраткері, шығыстанушы Серәлі Ла­пин­ның туғанына 150 жыл толуына орай «Тарих. Таным. Тағылым» атты ғылыми-танымдық конференция оқырман назарына ұсынылған. Сонымен қатар, қобыз аспабы мен оның шығу тарихын, түрлерін жақын таныстыру, қобыз күйлерінің орындалу шеберлігін көрсету мақсатында «Қарағайдың түбінен қайырып алған қобызым...» атты күй кеші, «Қорқыт ата өнері ұрпақ үнінде» атты әде­би-сазды кеш, «Көне дәуір әдеби жәдігерлері» атты  сирек  кітаптар  көрмесі, «Салт-дәстүр – ұлттық тәр­биенің негізі» тақырыбында дөңгелек үстел секілді берері мол іс-шаралар өткізілген. Оның ішінде қазақ халқының ұлы ағартушы ақыны, философ, қазақ әдебиетінің клас­сик­а үлгісінің негізін қалаушы Абай Құнанбаевтың 175 жылдық мерейтойына арналған «Абайды оқы, таңыр­қа» атты әдеби кеш, «Кемеңгерліктің биік шыңы – Абай» атты кітап көрмесінің маңызы зор. Ал, Елбасы Н.Ә.Назарбаевтың  «Ұлы  даланың  жеті қыры»  мақаласы  аясындағы «Қыз Жібек» лиро-эпостық жырының тұңғыш кітап болып­  басылып  шыққанына 125 жыл толуына орай өткізілген оқу эстафетасы қатысуш­ылар мен оқыр­мандардың көңілінен шықты. Мұны олардың ыстық ықыласынан  айқын  аңғаруға болады.

 

Рыскелді   СӘРСЕНҰЛЫ

 


ПРЕЗИДЕНТТІК ЖАСТАР КАДРЛЫҚ РЕЗЕРВІ ЖОБАСЫ ТҮСІНДІРІЛДІ PDF Print Email
Жаңалықтар - Халық-хабар
18.09.2019 16:30

Қармақшы ауданы әкімі аппаратының мәжіліс залында

Қазақстан Республикасы қызмет істері агенттігінің Қызылорда облысы бойынша департаменті қызметкерлері мен кент, ауылдық округ әкімдері, бөлім басшыларының қатысуымен кездесу өтті.

Кездесуді Қармақшы ауданы әкімінің орынбасары, Әдеп жөніндегі уәкіл Әділ Қошалақов жүргізіп отырды.

Қазақстан Республикасы қызмет істері агенттігінің Қызылорда облысы бойынша департамент басшысының орынбасары Ержан Қарымсақов, департаменттің мемлекеттік қызметтер басқармасының басшысы Ғалымжан Ілкібаевтың

мемлекеттік мекемелерде мемлекеттік қызмет көрсету және оны алудың мониторингіне тоқталып, хабарламасы тыңдалды.

Мемлекет басшысының «Сындарлы қоғамдық диалог - Қазақстанның тұрақтылығы мен өркендеуінің негізі» атты Қазақстан халқына Жолдауынан туындайтын міндеттерді түсіндіру бойынша Қазақстан Республикасы Президентінің жанындағы Мемлекеттік басқару академиясының Қызылорда облыстық филиалының профессоры, заң ғылымдарының кандидаты Ақзада Мадалиева баяндама жасады.

Сонымен бірге кездесуде «Президенттік жастар кадрлық резервін» қалыптастыру мақсатында ағымдағы жылдың

1 қыркүйегінен бастап іріктеу жұмыстары басталғанын, жобаның мақсаты мен талаптары түсіндірілді.

Қармақшы ауданы әкімінің орынбасары, Әдеп жөніндегі уәкіл Әділ Қошалақов кездесуді қорытындылап, қатысушылар тарапынан қойылған сұрақтарға тұщымды жауаптар берілді.

Қармақшы ауданы әкімінің баспасөз қызметі

 


ЖАСТАРМЕН ЖҮЗДЕСТІ PDF Print Email
Жаңалықтар - Халық-хабар
18.09.2019 16:10

Қызылорда облысы әкімінің орынбасары Наурызбай Байқадамов жастармен бейресми форматта кездесу­ өткізді. Айта кетейік, аға буын өкілдері бұған дейін де жастар ресурстық  орталығына келіп, өскелең  ұрпақпен  дидарласып  жүр.

Алдымен облыстық жастар сая­саты мәселелері басқармасының басшы­сы Қуаныш Жанұзақов кездесудің маңыздылығына тоқталды. Сондай-ақ, ол жиналған жастарды барынш­а ашық және еркін ой-пікір алмасуға  шақырды.

Өз кезегінде Наурызбай Сейіт­қалиұлы бүгінгі заман және болашақ туралы ой қозғады. Әсіресе, күні-түні смартфонға телмірген жастарға алаңдай­тынын  жеткізді.

– Елбасы – Тұңғыш Президентіміз Нұрсұлтан Назарбаевтың «Кітап оқитындар компьютерде отыра­тындарды  басқарып  өтеді» деген сөзі бар. Сондықтан кітаппен дос болған абзал. Қазіргі уақыт – білімді беретін емес, алатын сәт. Сондықтан ізденуден, білім алудан, кітап оқудан жа­лықпаған дұрыс. Бүгінде буын алмасу дәуірі жүріп жатыр. Біз елді болашаққа аманаттап бара жатырмыз. Болашақ – сіздердің қолдарыңызда, - деп айта келе:

– Ертеде бір хан үш адамды жеміс теруге жіберіпті. Әлгі үш кісінің екеуі тапсырылған ісін ала-құла істеп, шірік жемісті қабына сала берген, сала берген. Ал біреуі ең тазасын теріп алыпты. Хан оларды жинап, үшеуін зынданға апарап «терген жеміс­теріңді осы жерден шығам дегенше азық қылыңдар» деп қамаған екен. Соңынд­а шіріген жемісті әкелген екі адамның біреуі өліп, бірі айықпас дертк­е шалдығыпты. Тап-таза алма терген адам аман-есен екен. Достар, сол сияқты дәл қазір сіздер де жақсы дүниелерді бойға сіңіріп, саламатты өмір  сүріңіздер! Смартфонға  жұм­саған уақытты  білімге, ізденуге арнаңы­здар, - деді.

Одан әрі мәртебелі мейман қазіргі таңдағы ең өзекті мәселелерге тоқ­талды. Әсіресе, NEEТ санатындағы жастармен жұмыс істеуді күшейту керект­ігін айтты. Сондай-ақ, ұйымдастырылып жүрген «бос жұмыс орындарының  жәрмеңкесімен» қатар  «мықты  мамандар  жәрмеңке­сін»  өткізу  идеясын  ұсынды.

Сонымен қатар кездесуде жастар өз ұсыныс-пікірлерін ортаға салды. Жекеменшік колледжде оқитын студентті­ң бірі оқу ордасында спорттық­ алаңның жоқтығын және учаскелік полицейлердің аздығын жеткізді. Аталған мәселеге байла­нысты Наурызбай Сейітқалиұлы тиісті сала өкілдеріне көтерілген мәселені  назарға  алып, жұмыс  істеуге­ шақырды.

Айта кетейік, жастар саясаты мәселелері  басқармасының  басшысы­ Қуаныш Қуантқанұлы бейресми форматтағы кездесулердің алдағы уақытта тағы да ұйымдастырыла­тынын  хабарлады.

Қозы  Көрпеш   ЖАСАРАЛҰЛЫ

 


ТЕАТР МАУСЫМДЫ «АБАЙ» ТРАГЕДИЯСЫМЕН АШТЫ PDF Print Email
Жаңалықтар - Халық-хабар
18.09.2019 16:00

Өткен аптада облыстық Нартай Бекежа­нов атындағы қазақ музыкалық драма театры жаңа маусымның шы­мылдығын салтанатты түрде ашты. 65-ші театр маусымында Ерсайын Төлеу­байдың «Абай» трагедиясы көрерме­н  назарына  ұсынылды.

Көріністе ақынның алпысқа қараған шағында өз ортасынан орын таппай, ауыр ой арқалап, іштей егілген кезі сурет­телді. Ақынның тағдыры тым ауыр жағдайларға толы болды. Араларына алты айдан салып, балалары көз жұмады. Мағауия қайтыс болғаннан кейін 40 күн өткенде өзі де өмірден озды. Осылай дүркі­реген әулеттің тас-талқаны шығады. Қойылымда «Соқ­тықпалы соқпақсыз жерде өсіп, мыңмен жалғыз алыс­қан жанның» тереңдегі жұмбағы, Абай азабының айтылмай келген тылсым бейнесі көр­сетілді. Айта кетерлігі, Хұсейн Әмір-Темірдің режиссерлігімен, марқұм Серік Пірмахановтың декор­ациялық кес­кіндеуімен, Рүстем Ізтаевтың музыкалық көркемдеуімен қойылған бұл спектакль қазақ сахнасында 1940 жылдан бері қойылып келе  жатқан  жаттанды  үлгі­ден мүлде  бөлек.

Қойылымда Абай рөлін театр артисі, Қазақстан Жастар­ Одағы  «Серпер» сыйлығының  лауреаты  Бақытбек Темірбеков сомдады. Және «Абай» трагедиясын сахналауға театр ұжымы толық құрамда  шықты.

- Менің сіздерге айтар жағым­ды жаңалығым бар. 20-25 қыркүйек аралығында Семей қаласында Қазақстанның Халық артисі, Мемлекет­тік сыйлықтың иегері, көрнек­ті театр және кино актрисасы Ә.Өмірзақованың 100 жылдығына арналған Қазақстан драма театрларының ХХVII республикалық фестиваліне осы қойылыммен қатысамыз. Сіздер бізге сәттілік тілейді деп ойлаймын. Алдағы уақытта көп­теген қойылымдар қоятын боламыз. Міне, бүгін бізді тамашаладыңыздар. Ал, біз сіздерді үнемі көргіміз келеді, - деді Қазақстанның еңбек сіңірген қайраткері  Хұсейн  Әмір-Темір.

Жалпы, театр ұжымы өткен маусымда үлкен жетістіктерге қол жет­кізді. Атап айтқанда, 4 жаңа қойылымды сахнаға шығарды және театр репертуарындағы спектакльдерді жоғары­ деңгейде көрерменге ұсынды. Театр жастары еліміздің тұңғыш прези­дентінің «Болашаққа бағдар: рухани жаңғыру» бағдарламасын жүзеге асыру мақсатында және «2019 жыл – Жастар жылы» аясында Еуропадағы ірі оқу орындарының бірі Ресей­ мемлекеттік театр өнері институты (GITIS) жоғары оқу орнына шығар­машылық білімін жетілдіру мақсатында барып қайтты. Еліміз Тәуелсіз мемлекеттер қатарына қосыл­ғалы бері Қазақстаннан, соның ішінде Қызылорда театрынан тұңғыш рет көршілес Ресей мемлекеттік театр­ өнері институтына жас мамандардың баруы жалпы қазақ өнері үшін үлкен мәртебе болды. Сондай-ақ, Өзбекстан Республикасындағы Қазақстан Республикасының мәдениеті мен өнері күндері аясында ҚР Мәдениет және спорт министрлігі, Қызылорда облысының әкімдігі, Қызылорда облы­стық мәдениет, архивтер және құжаттама басқармасының ұйымдастырумен театр ұжымы Өзбек ұлттық академиялық драма театрының сахнасында Рахымжан Отарбаевтың «Нарком Жүргенов» тарихи драмасын ұсынып, қазақ өнерін бауырлас аға­йындарға паш етті. Талдықорған қаласында өткен Орта Азия халықтары театрларының халықаралық фестиваліне Р.Отарбаевтың «Нарком Жүргенов» драмасымен қатысып, жалпы Орта Азия театрларының тарихында тұңғыш рет үш бірдей номинацияға қол жеткізген бірден-бір театр атанып, фестивальге қатысқан өзбек, қырғыз, тәжік, түрік, башқұрт аға­йындарының алдында қазақ театрының  мәртебесі көтерілді.

 

Рыскелді   ЖАХМАН

 


ОБЛЫСТЫҚ АССАМБЛЕЯНЫҢ ХХІІ СЕССИЯСЫ ӨТТІ PDF Print Email
Жаңалықтар - Халық-хабар
18.09.2019 15:50

Бүгін Қызылордада «Достық үйінде» облыстық ассамблеяның ХХІІ сессиясы өтті. Онда Қазақстан халқы облыстық ассамблея хатшылығының атқарған жұмыстары мен алдағы жоспары, сондай-ақ, аймақтың әлеуметтік-экономикалық дамуы туралы айтылды.

Сәуір айында Тұңғыш Президент-Елбасы, Қазақстан халқы Ассамблеясының Төрағасы Нұрсұлтан Әбішұлы Назарбаевтың төрағалығымен «Татулық пен келісім формуласы: бірлік және жаңғыру» күн тәртібімен Қазақстан халқы Ассамблеясының XXVIІ сессиясы өткен еді.

«Сессия жұмысы барысында Елбасы «құбылмалы әлемде бір ғана мәңгі әрі кешенді құндылық бар. Ол – қоғамның бірлігі мен ұлтаралық келісім» екенін айтты. Сондай-ақ, Қазақстан қоғамындағы тұрақтылықты сақтау үшін барлық тетіктердің қалыпты әрі тиімді жұмысын қамтамасыз етуді тапсырған болатын. Қазіргі таңда Сыр өңірінде Елбасының тапсырмалары жүзеге асып, толымды істер атқарылып жатыр»,-деді аймақ басшысы сесияның ашылу салтанатында.

Естеріңізге салайық, «Қызылорда облысын әлеуметтік-экономикалық дамытудың 2019-2022 жылдарға арналып әзірленген кешенді жоспары» ағымдағы жылдың 28 мамыр күні Үкімет мәжілісіне ұсынылып, жан-жақты талқыланып, бекітілді.

Кешенді жоспардың негізгі бағыттары өнеркәсіп, «Байқоңыр» кешенінде арнайы экономикалық аймақ құру, агроөнеркәсіптік кешен, кәсіпкерлікті дамыту, тұрғын үй-коммуналдық шаруашылығы, экология, су шаруашылығының ахуалы, әлеуметтік сала мен Қызылорда қаласының бас жоспарын қамтиды.

«Кешенді жоспарды іске асыру нәтижесінде жалпы өңірлік өнім көлемі 2 трлн 62 млрд теңгеге дейін ұлғайтылатын болады. Сонымен бірге, алдымызда Мемлекет басшысының айқындап берген ел қажетіне бағытталған, ел мүддесіне қызмет ететін 10 тармақтан тұратын межелі міндет бар»,-деп атап өтті облыс әкімі.

Экономикаға тартылған инвестиция, құрылыс, тұрғын үйді пайдалануға беру көлемі бойынша және ауыл шаруашылығында да өсім қамтамасыз етілді. Облыстың экономикалық дамуындағы өсімге қол жеткізу үшін аймақ экономикасын индустрияландыру арқылы әртараптандыру стратегиясы жүзеге асырылуда.

Осы ретте "қарапайым заттар экономикасы" бағдарламасы аясында жалпы құны 12,6 млрд. теңге болатын 124 жобаны жүзеге асыру бойынша жұмыстар атқарылып жатқанын атап өткен жөн.

Сондай-ақ, Сыр өңірінде 2018 жылы жаппай кәсіпкерлікті дамытудың үшжылдығы жарияланды. Осылайша, шағын және орта бизнесті дамыту қолға алынды.

Тек, соңғы алты жылда тұрғын үйді пайдалануға беру көлемі 2,5 есеге артып отыр. Осы уақыт аралығында Қызылорда қаласының өзінде жаңа 10 мөлтек аудан, 5 тұрғын үй кешені, 361 тұрғын үй пайдалануға беріліп, 8 мыңға жуық адам баспаналы болды.

Оның ішінде, «Баламекен» жобасы шеңберінде «Болат Өтемұратов Қоры» есебінен ағымдағы жылы 100 үй пайдалануға берілді. Бұл жұмыстарға қор есебінен 450 млн теңге бөлінді.

Сонымен қатар, Сырдарияның сол жағалауында сәулеті мен дәулеті келіскен жаңа қала бой түзеп келеді.

Қазақстан халқы ассамблеясы бүгін де Қоғамдық келісім мен ұлттық бірліктің ұйытқысына айналды. Ассамблея құрылған күнінен бастап 24 жылдан астам уақыт бойы тарих, мәдениет және тіл ортақтығын дамытуда қызмет етіп келеді.

Облыстық Қазақстан халқы ассамблеясының бастамасымен әртүрлі форматтағы 96 іс-шара өткізілген. Мәселен, ассамблеяның бастамасымен өңірде "Қазақтану" республикалық мәдени-ағартушылық жобасы ұйымдастырылды. Айта кету керек, бұл жоба Қызылорда облысынан бастау алды.
Сондай-ақ, ассамблеясының қолдауымен Байқоңыр қаласы әкімшілігінің ұйымдастыруымен "Халықтар достығы" ұлттық мәдени фестивалі өтті.

Қазақстан халқы облыстық ассамблея хатшылығы өз қызметін бірнеше бағытта жүзеге асыруда. Атап айтқанда, облыстық этномәдени және аудандық этно бірлестіктер, қоғамдық келісім және аналар кеңестері, жастар қанаты және ассамблея жанындағы депутаттық топ, "Қазақстан халқы Ассамблеясы" кафедрасы және ғылыми-сараптамалық топ, қайырымдылық, медиация.
Қызылорда облысында XXI сессияда берілген тапсырмаларға сәйкес аудан орталықтарында меценаттарды тарту бойынша жұмыстар жүргізілуде. Жыл басынан бері меценаттардың қолдауымен 798 қайырымдылық іс-шара ұйымдастырылып, 24 794 адамға 270 млн.809 мың теңгеге көмек көрсетілді.

Өңірде облыстық, 2 қалалық, 7 аудандық және 155 кенттік және ауылдық қоғамдық келісім кеңесі жұмыс істейді. Олар ассамблея отырыстарында жергілікті халықты толғандыратын өзекті мәселелерді қарастыра отырып, қоғамдық бақылау қызметтерін орындайды.

«Облыстық Қазақстан халқы ассамблеясының хатшылығы мен облыс әкімі аппаратының "Қоғамдық келісім" коммуналдық мемлекеттік мекемесі этномәдени бірлестіктерге ұйымдастырушылық және әдістемелік көмек көрсетіп, тұрақты қолдау көрсетуі қажет. Өз тарапынан облыс әкімдігі облыстық Қазақстан халқы ассамблеясының, Достық үйінің материалдық-техникалық базасын нығайтуға, қоғамда бейбітшілік пен келісімді қамтамасыз етуге бағытталған іс-шаралар мен жобаларды өткізуге қаржы бөлуге тиісті қолдау көрсететін болады. Сондай-ақ, 2020 жылы Қазақстан халқы ассамблеясы өзінің 25 жылдығын атап өтеді. Осы мерейтойға орай аймақтың басты сыйлығы игі істеріміз бен жетістіктеріміз болуы керек»,-деді аймақ басшысы Қуанышбек Ысқақов.

Сессия барысында облыс әкімі аппараты жанындағы «Қоғамдық келісім» КММ директорының орынбасары Асылбек Теңелұлын 70 жас мерейтойына орай аймақ басшысы құттықтап, «Құрмет грамотасын» табыстады. Сонымен қатар, этномәдени бірлестіктердің және облыстық ассамблея жанындағы «Жаңғыру жолы» жастар қозғалысының белсенділері облыс әкімінің Алғыс хатымен марапатталды.

Облыстық ассамблеяның ХХІІ сессиясының қорытындысымен облыс әкімі өңірлік «Рухани жаңғыру» орталығы мен Қорқыт Ата атындағы Қызылорда мемлекеттік университеті облыстық Қазақстан халқы ассамблеясымен бірлесе отырып Қазақ мәдениетін, тарихын, философиясын, қазақ елінің құндылықтарын насихаттауға бағытталған «Қазақтану» мәдени-ағарту жобасын әрі қарай жалғастыруды, Қызылорда қаласы және аудан әкімдері этнобағыттағы қоғамдық бірлестіктер мен қоғамдық келісім кеңестерін қолдау мақсатында мемлекеттік әлеуметтік тапсырыс арқылы қаржыландыруды тапсырды.

 

Облыс әкімінің баспасөз қызметі

 


Қызылордалық Жеңіл өнеркәсіп қауымдастығы «Qobyz» сауда белгісімен өнімдер шығармақ PDF Print Email
Жаңалықтар - Халық-хабар
18.09.2019 13:40

Бұл туралы өңірдегі Жеңіл өнеркәсіп Қауымдастығының төрағасы Ділмұхамед Абызов айтты.

Бұға дейін Кәсіпкерлер палатасының алаңында тігін цехтарының иелері мен қолөнершілер, дизайнерлер жиналып, өңірлік Жеңіл өнеркәсіп Қауымдастығын құрған болатын. Аталмыш ұйым бірлесе отырып жергілікті мектеп оқушыларына арнап мектеп формасын тікті.

«Бүгінде жергілікті нарықтың 80 пайызын импорт тауарлар қамтып отыр. Киім-кешектердің басым бөлігі Түркия, Қытай, Қырғызстан, Өзбекстаннан тасымалданады. Отандық жеңіл өнеркәсіптің қадамына кедергі болып тұрған да осы шетелдік тауарларға тәуелділік. Сондықтан жергілікті жеңіл өнеркәсіптің әлеуетін арттыру керек», - дейді Ділмұхамед Мнуарбекұлы.

«Халық тұтынатын тауарлардан кейінгі екінші орында тұрған сала – жеңіл өнеркәсіп. Бұл сектордың әр мемлекет үшін маңыздылығы зор деп ойлаймын. Рас, бұл саладан көп салық түсе қоймауы мүмкін. Алайда саланың артықшылығы –  көп жұмыс қолын талап етуі. Ал бұл дегеніміз – өз кезегінде жаңа жұмыс орындарын ашудың таптырмас жолы. Бұл – жұмыссыздықпен күресетін жақсы құралдардың бірі», - дейді кәсіпкер.

Бұған дейін «Dalatex» компаниясын құрған кәсіпкер Ділмұхамед Абызов ең алдымен ашық бәсекелестікте және нарықта жұмыс істеуді мақсат тұтқанын айтады. Кәсіпкер құрылғанына 3 жыл болған «Dalatex»-ті Қытай, Түркия, Өзбекстан тауарөндірушілерімен «ашық шайқаста» жүрген кәсіпорын деп санайды.

«Себебі  базарда жүрген әр кәсіпкермен байланыс орнатып, шетелдік тауарөндірушілердің тауарының деңгейінен кем болмайтындай өнім ұсыну қажет болды, ұсынып та келеді», - дейді «Dalatex»-тің негізін қалаушы.

Ал «Бастауыш сынып оқушыларына арналған мектеп формалары» жобасының өмірге келуіне аталмыш саланың жергілікті тауарөндірушілермен игерілмеуі себеп болған.

«Өңірімізде бастауышта елу-алпыс мың бала оқиды. Бұл оқушыларға оқу формасын алу ең төменгі есеппен есептегеннің өзінде жобамен 500 млн теңгені құрайды. Осыншама қаржы сыртқа, нақтырақ айтқанда Өзбекстан мен Қырғызстанға және өзге де елдерге кетіп жатыр. Біз осы өңірде тұрғандықтан аталмыш қаржының ең болмағанда 30 пайызы өз облысымызда қалса, экономикамызға пайдасы тисе, әлеуметтік жағдайды жақсартуға жұмыс жасаса деген мақсатты алдымызға қойдық», -  дейді облыстағы Жеңіл өнеркәсіп қауымдастығының төрағасы Ділмұхамед Абызов.

Қызылорда облысы жеңіл өнеркәсіп кәсіпорындарының халықтық Қауымдастығы биылғы жылы қолға алған «Бастауыш сыныптарға арналған бірыңғай мектеп формасы» әлеуметтік жобасына қаладан әзірге 33 мектеп қатысты. Алғашқы пилоттық жылда мектеп формасы 1-сынып оқушыларына арналып тігілді. Қауымдастықтың аясында жобаға «Dalatex»-тен өзге 20-ға жуық тігін шеберханасы қатысып, 100-ден астам адам жұмыспен қамтылды.

«Жобаны бірінші рет жүзеге асырғандықтан жеткізуде, тапсырысты дер кезінде орындауда кемшіліктеріміз де болды. Дегенмен алған міндеттемемізді толықтай орындап шықтық. Жобаның ең үлкен жетістігі – шағын 20-ға жуық тігін шеберханасын тапсырыспен қамтамасыз ете алғанымыз. Келесі бір артықшылығы – жобаның әлеуметтік жоба болғандығында. Яғни тігілетін киімді 10-12 мың теңгеден асырған жоқпыз», - дейді Ділмұхамед Абызов.

Жеңіл өнеркәсіп Қауымдастығы алғашқы өнімдерін «Qobyz» сауда белгісімен шығара бастады. Қауымдастық бұл жобамен тоқтап қалмай, ары қарай жалғастыруды көздеп отыр. Ол үшін өнімдерді «Qobyz» сауда белгісімен көрші өңірлерге, тіпті өзге елдерге де шығаруды жоспарлауда.

 

Қызылорда облысы

кәсіпкерлер палатасының баспасөз қызметі

 


ҚАЗАЛЫЛЫҚ «ТАКСИ» ҚЫЗМЕТІМЕН АЙНАЛЫСАТЫН КӘСІПКЕРЛЕРДІҢ ӨТІНІШІ ҚАНАҒАТТАНДЫРЫЛДЫ PDF Print Email
Жаңалықтар - Халық-хабар
18.09.2019 11:00

Бұл туралы Кәсіпкерлер палатасының Қазалы аудандық филиал директоры Ермек Аймаханов айтты.

Естеріңізде болса, осы жылдың шілде айында Кәсіпкерлер палатасының алаңында өткен кәсіпкерлерге салық, кеден заңдылықтарын түсіндіру бойынша кездесуде Қызылорда облысы бойынша мемлекеттік кірістер департаментінің басшысы Ғалымжан Орынов бұдан былай аптаның әр бейсенбісі, сағат 15.00-18.00 аралығында аудандық және қалалық Кірістер басқармасының басшылары мен облыстық Кірістер департаментінің басшысы кәсікерлерді жеке мәселелерімен қабылдайтындығын жеткізген болатын.

Осы тапсырмадан кейін қала, аудандық салық басқармасының басшылары Кәсіпкерлер палатасының аудандық филиал алаңында апта сайын кездесулер өткізуде.

Кәсіпкерлер палатасының Қазалы аудандық филиалында өткен кездесуде бір топ такси қызметін көрсетуші дара кәсіпкерлер аудандық кірістер басқармасының басшысы Темірлан Қожаназаровтан тіркелмей, заңсыз жолаушы тасымалымен айналысатын азаматтардың қызметіне тосқауыл қоюын сұрады.

«Бүгінде ауданымызда тіркелмей, «такси» қызметімен айналысатын көлік иелері санының күн санап артуы түйткілді мәселеге айналып отыр. Біз тіркеліп, уақытылы салығымызды төлеп, қызмет етіп отырмыз. Алайда заңсыз жұмыс істейтін, тіркелмеген таксистердің арқасында біз нәпақамыздан айырылып отырмыз», - дейді «такси» қызметін ұсынушы кәсіпкерлердің бірі.

Жеке кәсіпкерлердің өтінішінен кейін аудандық кірістер басқармасының басшысы Темірлан Қожаназаров аз уақытта аудан әкімдігімен бірге тиісті шара қабылдауының нәтижесінде халық көп шоғырланған жерлерде такси тұрақтары белгіленіп, құжаттары рәсімделуде.

Өз кезегінде кәсіпкерлер мәселелерінің шешілуіне жағдай жасаған Кәсіпкерлер палатасының аудандық филиалына да, аудандық кірістер басқармасының басшылығына да алғысын білдірді.

 

Қызылорда облысы

кәсіпкерлер палатасының баспасөз қызметі

 


ҚЫЗЫЛОРДА ОБЛЫСЫ ӘКІМІНІҢ ШТАТТАН ТЫС КЕҢЕСШІСІ ТАҒАЙЫНДАЛДЫ PDF Print Email
Жаңалықтар - Халық-хабар
17.09.2019 17:40

Нәметша Сержан Қасқырұлы Қызылорда облысы әкімінің штаттан тыс кеңесшісі лауазымына тағайындалды.

С.Нәметша 1952 жылы туған. Жамбыл гидромелиоративтік құрылыс институты мен Мәскеу халықаралық бизнес және ақпараттық технологиялар университетін бітірген.

Әр жылдары Қармақшы аудандық партия комитетінде нұсқаушы, облыс әкімінің көмекшісі, Қызылорда қаласы әкімінің бірінші орынбасары, Қаржы министрлігінің Дәрменсіз борышкерлермен жұмыс жөніндегі комитетінің Қызылорда облысы бойынша басқарма бастығы қызметтерін атқарған.

2006-2015 жылдары облыстық құрылыс, жолаушылар көлігі және автомобиль жолдары, сәулет және қала құрылысы, мемлекеттік сәулет-құрылыс бақылауы,  жұмылдыру дайындығы, энергетика және тұрғын үй-коммуналдық шаруашылық басқармаларын басқарған,  2015 жылдан бастап осы кезге дейін «Қызылорда электр тораптарын тарату компаниясы» акционерлік қоғамында ішкі аудит қызметінің бастығы лауазымында қызмет атқарып келді.

 



<< Бірінші < Алдыңғы 1 2 3 4 5 6 7 8 9 10 Келесі > Соңы >>

Күнтізбе

< Қыркүйек 2019 >
            1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30            

Сауалнама

Аса мәртебелі шенеуніктердің қылмысқа шатылып жатқандығы нені аңғартады?
 

Ауа райы

Валюта бағамы

Қазақстан Республикасының Ұлттық Банкі валюталардың ресми бағамдары