Өткен жұмада республикалық Қоғамдық кеңес төрағасы, ҚР Парламенті Сенатының депутаты Бақытжан Жұмағұлов пен «Нұр Отан» партиясының хатшысы Фархад Қуанғанов бас­таған делегация Сыр өңіріне жұмыс сапары­мен келді. Олар бірқатар ны­сан­дарды аралап, мемлекет басшысының 5 әлеуметтік бастамасының жүзеге асыры­лу  барысымен  танысты.

Елбасы елдің  дамуы үшін  бірқатар мемлекеттік  бағдарламалар  жасақтап, ұсынуын  тоқтатқан  емес. Ендігі    мін­дет – Президент пәрменін жүйелі түрде жүзеге асыру. Ілкімді жобаларға өңірлер қалай атсалысуда? Сенат депутаты бастаған топ Қызылорда қаласында іске асырылып жатқан жобалардың жай-күйіне қанықты. Алдымен «7-20-25» бағдарламасын іске асыру аясында тұрғын үй нысандарын көрді. Сырда­рияның сол жағалауында жаңа қала тұрғызу туралы аңыз шындыққа айналғалы бері жұрт сол жаққа көз тігіп отыр. Бүгінде онда шаһар келбетін көркемдей түсетін жаңа ғимараттар салынуда. Қала халқын құрылыс нысандарының күн санап «өсіп» келе жатқ­аны қуантады. Аталмыш мемлекеттік бағдарламадағы бірінші бастама бойынша облыс­тық құрылыс, сәулет және қалақұрылысы басқармасының басшысы Мұха­медиса Әлсеріков тарқатты. Оның сөзінше, Сырдария өзенінің сол жағалауында бүгінде 14 көпқабатты үйдің құрылысы жүргізілуде. Жалпы пәтер саны – 604. Демек үйдің құрылысы аяқталғанда осынша отбасы «баспана уайы­мынан» құтылмақ. Үй алу үшін де құжат қуалап, тәртіп тәптіштеп жүгірмей­сіз. Мемлекет  ұсынған оң­тайлы  бағдарламалар  көме­гін пайдаланасыз. Мәселен, «Орда» тұрғын үй құрылысымен қамтамасыз етуге арналған жол картасы бағдарламасы. Оның міндеті сол, өңір тұрғындарын, әсіресе әлеуметтік жағдайы төмен отбасыларды қолжетімді баспанамен қамтамасыз етеді. Айта кетейік, қазіргі күні облыс бойынша тұрғын үй кезегінде 27 000-нан астам тұрғын бар. Оның ішінде 23 000 адам Қызылорда қаласы бойынша тіркелген. Бағдарламаның ең басты ерекшелігі – тұрғындар алғашқы жарнасын төлемейтін  болады. Соңғы уақытта Сырдария өзенінің сол жағал­ауында құрылыс қар­қынды жүріп жатыр. Мұнда­ғы  нысандардың  бой көтеруі құрылыс компанияларының өз қаражаттары есебінен және мемлекеттік-жекешелік әріптестік негізінде жүзеге асырылуда. Облыстың бас құрылысшысы М.Әлсеріков­тің сөзінше, алдағы уақытта мұнда 15 шағын аудан бой көтереді. Бүгінгі күні шағын ауданда тұрғын үйлерден бөлек «Рухани жаңғыру» орталығы, жастар­ орталығы, неке сарайы, Қазақ орталық атқару комитетінің ғимараты, 600 орындық мектеп, 320 орындық балаба­қша  салынып  жатыр. Сондай-ақ түрлі  ойын-сауық орталықтары мен сауда­ орындары, медициналық орталық, дәстүрлі өнер академиясы мен маманда­ндырылған  физика-математика  мектеп-инернатын да сол жағалаудан  көтеру  жоспарланған.

Мәртебелі меймандар аялдаған екінші нысан – «Q-med» клиникасы. Қаладағы Абай даңғылының бойында орналасқан емхана мекенжайының өзі жұртшылық үшін тиімді. Тұрғындар көп жүретін орталық көшеде тұрақ­таған.  Ал науқастарға  көрсететін сапа­лы­  қызметі туралы әңгіме бөлек. Бұған қарап «Шағын несие беруді көбейту» төртінші бастамасының жемісін бергеніне марқайып қаласыз. Клиниканың өзге емханаларға қарағанда ерекшелігі де, артықшылығы да бар. Бағасы емдеу қызметіне қарай әртүрлі. Негізінен терапе­втік, диагностикалық және реаби­литациялық, т.б. емдеу түрімен айналысады. Дәрігерлердің жылы қабағы мен біліктілігінің арқасында дертінен айыққандардың алғысы зор. Қазіргі күні 2016 жылдың сәуірінен бас­та­п жұмысы жандана бастаған клини­каны таңдайтын жұрттың саны артқан. Сапалы­  қызмет қашан да тұтынушыларды  өзіне магниттей тартады емес пе? Емхананың ішін аралаған уа­қытта Сенат­  депутаты Б.Жұмағұловтың «Не­сие­ алдыңыздар  ма?» деген сұра­ғына  клиника  директоры Раушан Базарбай «Істі бастау үшін 18 миллион теңге не­сие­ рәсімдеп, оған облыста жоқ құрал-жабдық алдық. Бұл – біз үшін әдеттегідей емес, үлкен несие» деп атап өтті.

Ал «Қараөзек» жоғары технологиялық газ компрессорлық стансасы Елбасы­ның «Бес әлеуметтік бастамасы» аясында магистралдық газ құбырының «қақпасы» саналады. Қызылорда облысы – Жезқазған – Қарағанды – Теміртау – Астана бағыты бойынша. Қоғамдық кеңес мүшелері стансаның қуат­тылығын, іске қосылуға дайындық жұмыстарын шолып шықты. Даярлық деңгейінің қандай екенін бағдарлай келе ары қарай осы «Қараөзекте» жұмыс істейтін сапалы маман даярлайтын мекемег­е келді. Айта кету керек, Прези­денттің бес әлеуметтік бастамасының бесінші бағытының іске асуы бойынша жасалып жатқан бұл жоба ә дегеннен-ақ нәтижесін беріп келеді. «Электротехнология» ЖШС оқу орталығы 3, 4-санаттағы газ дәнекерлеуші мамандарды даярлайды. Мекеме биылғы наурыздан бастап  құрылған. Ашылғанына  аз  уақыт болса да  алға қойған мақсатынан айнымай, жетістікке жетуде. Оқу орта­лы­ғында директор, директордың орынбасары және 7 оқытушы, 1 іс жүргізуші, 1 әдіскер  жұмыс  істейді. Мұнда  келіп 3 ай курс оқыған кісілер «Электрогазбен дәнекерлеуші» және «Электр жабдықтарына қызмет көрсетуші және жөндеуші электромонтер» мамандық­тарын игеріп шығады. Мекеме ашыл­ғалы бері 33 түлек бітірген. Оның ішінде 3-еуі «ҚазЭлектроИнжинирингСервис» ЖШС-не жұмысқа қабылданып, тұрақты жұмыс орнымен қамтамасыз етіліпті. Ал қазіргі уақытта онда 61 азамат білім алуда. Оқу курсын аяқтап, жұмыс істеп жатқан қала тұрғыны Ғалымжан  Құтыбаев бағдарлама туралы  ойын  жеткізді.

- Осы оқу орталығында дәнекерлеу­ші мамандығы бойынша оқып шықтым. Алғашында жұмыс таппай, үйде отыр­ған сәтімде көп ойландым. Қандай маман­дықтарға сұраныс жоғары қазір? Саралай келе бүгінгі күні техникалық мамандықтар тапшы екенін түсіндім. Бір жақсысы, оны оқып алуға ыңғайлы жағдай жасалған. Бұл әрине, мемлекеттің біз сияқты екі қолға бір күрек таппай жүрген азаматтарды қолдауы деп біле­мін. Елбасы ұсынған бағдарламаның ар­қа­сында ойлағанымыз біртіндеп орындалып жатыр. Осындай бағдарламаның игілігін  көргеніме  қуаныштымын,- деді  Ғ.Құтыбаев.

Сыр өңіріндегі серпінді жобалардың жұмысына қанық болған Қоғамдық кеңес мүшелерінің сапары «Достық» үйінде қорытындыланды. Елбасының бес әлеуметтік бастамасының Қызыл­орда облысында жүзеге асырылуы сарапта­лып, Ақмешіт атырабында атқа­рылғ­ан  жұмыстарға  баға  берілді.

Экономиканы ілгерілету ісінде шағын­ және орта кәсіпкерліктің бәсі биік, беделі жоғары. Бұл табыс табамын деген талабы бар адамдарға басты мүм­кіндік те. Қазіргі күні осы шағын және орта кәсіпкерлікті қолдау мен микрокредиттер саны артқан. Аймақ басшысы Қырымбек Елеуұлы ағымдағы жылдың 6 айында өзін-өзі тиімсіз жұмыспен қамтыған және жұмыссыз азаматтардың біршама азайғанын айтты.

- 2018 жылдың басында облыста өзін-өзі тиімсіз жұмыспен қамтыған және жұмыссыз 97538 адам анықталды. 2018 жылдың 6 айында 7000-нан астам адам жаңа жұмыс орындарына орна­ластырылып, 20400-ден аса жұмыссыз өнімді жұмыспен қамтылып, 20 мың азаматтың қызметі заңдастырылса, оның 17 мыңға жуығы жұмыс берушілермен еңбек келісімшартын жасады. 3000-ға жуығы мемлекеттік кіріс органдар­ына жеке кәсіпкер ретінде тіркеліп, заңды түрде кәсіптерін бас­тады, - деді облыс әкімі.

Басқосу барысында облыстық білім басқармасы басшысының орынбасары Ақзира Қасымова өңірдегі білім саласы туралы сөз қозғады. Аталмыш саладағы қол жеткізген жетістіктер мен алдағы жоспарлар да тілге тиек етілді. Президент ұсынған бес әлеуметтік бастаманы іске асыру бойынша бірқатар іс-шаралар жоспарланған. Облыс әкімі де бұл ретте қарап отырған емес. Жыл сайын білім гранттарын ұсынуда. Биыл оқу гранттарының саны бұрынғыға қара­ғанда екі есеге артпақ. Бұл – жоғары білім алатын талапкерлерге үлкен қолдау. Мұнан бөлек құрылыс нысандарының ішінде алғашқы лекте оқу орнының құрылысының салынуы да көңілге қуаныш  ұялатады.

Осылайша республикалық Қоғамдық кеңестің төрағасы Бақытжан Жұмағұлов, «Нұр Отан» партиясының хат­шысы Фархад­  Қуанғанов, облыс әкімі Қырымбек Көшербаев және тиісті мемлекеттік органдар өкілдері, саяси пар­тия және қоғам белсенділері қатысқан кеңес өз мақсатына жетті. Әлеуметтік бастамаларды іске асыру жөніндегі кеңес­тің төрағасы Б.Жұмағұлов Сыр өңіріндегі атқарылған жұ­мыстарға оң бағасын  берді.

- Жұ­мыс сапарының нә­ти­жесі бо­йын­ша  аймақтарда Бес әлеуметтік баста­ман­ы іске асыру барысына талдау жасала­тын болады. Ол Үкіметке дейін жеткізіліп, Елба­сының алдында жаса­латы­н баяндамағ­а  негіз  болмақ, - деп атап  өтті  Бақытжан  Жұмағұлов.

Түстен кейін делегация мүшелері береке­сін берген бастаманың өңір аудандарында жүзеге асу барысын бақыла­у үшін Шиелі ауданына аттанды.­ Шиелі ауданында 10 фер­маны бірік­тірген «Шиелі-төрт түлігі» ауылшаруашылық кооперативі мен тәулігіне  400 литр  шұбатқа  дейін  өңдейтін «Ару Ана»  цехын  аралап  көрді.

Ж.ҚОЙШЫБЕКОВА