Шыны керек, көптің көкейінде «облыс орталығындағы басты көше­лерд­ің бірі Желтоқсан көшесі нелік­тен жылда жөндеуден өтеді? Оның орнына шетаймақтағы көшелерді жөндесе қайтеді?» деген мазмұндағы пікірлер жиі айтылады. Мәселенің мәнісі былай. Былтыр сол көшеге су жүйелері мекемесі ауызсу желілеріне жаңғырту жұмыстарын жүргізген. Асфаль­т қабаты бір рет қайта қазылса болды, жаңадан салынған жол біртіндеп «отыра» береді екен. Ал қалыпқа келтіру жұмыстарын мер­дігер мекеме келісілген кепілхат арқылы­ жөндейді. Бұл жұмыстарды мердігерлер өз қаржысы есебінен жүргізеді. Мұның ақ-қарасын қала әкімі Нұрлыбек Мәшбекұлы тәптіш­теп тұрып түсіндіріп берді.

Қала әкімдігінде өткен аппарат отырысында екі мәселе қаралды. Алдым­ен жол жөндеу жұмыстары барыс­ы туралы баяндама жасаған қалалық жолаушылар көлігі және автомо­биль жолдары бөлімінің басшысы Азамат Каюпов өзіне тым сенімсіз көрінді. Баяндамасын әрең оқыған жас шенеунік ақыры Нұрлыбек Нәлібаевтан:

– Азамат Биғалиұлы, өзіңізге сенімсіз сияқтысыз ғой. Баяндамаңызды зорға оқып шықтыңыз. Жас емессіз бе? Сіздің бөлімге артылған үміт көп. Бұлай жай қимылдауға бол­май­ды, - деген ескерту естіді.

Жыл басынан бері республикалық, облыстық және қалалық бюджеттерден аталмыш бөлімнің жұ­мысын ұйымдастыруға барлығы 2 159,8 млн теңге қаржы қаралған. Автом­обиль жолдарының жұмыс іс­теуін қамта­масыз  ету  мақсатында  барлығы   956,3 млн теңге бөлінсе, қалалық бюджетт­ен бөлінген 393,8  млн  теңге­ге бірқатар көше­лерге ағымдағы жөндеу жұмыстары жүрген. Бұған бөлінген 76,5 млн теңгег­е 14 500 шаршы метрді құрайтын 51 көшенің асфальт қа­бат­тарының бұзылған жерлері қайта қалпына  келтірілген.

– Қала орталығындағы ұзындығы 1,3 шақырым  болатын Тоқмағанбетов көшесін Қазыбек би көшесінен Байтұрсынов көшесіне дейін орташа жөндеуге – 174,5 млн теңге, ұзынды­ғы 2,17 шақырымды құрайтын Бай­тұрсынов көшесін Абай даңғылынан Тоқмағанбетов көшесіне дейін орташа­ жөндеуге – 231,8 млн теңге, және ұзындығы 3,89 шақырым болатын Жаппасбай батыр көшесінен Қорқыт ата көшесіндегі көпірге дейін орташа жөндеуге 183,6 млн теңге бөлінді. Бүгінгі таңда Жаппасбай батыр­ және Байтұрсынов көшелері бойынша жұмыстар толығымен аяқ­талды, ал Тоқмағанбетов көшесінің асфальт қабаты толығымен төселіп, жарық  бағаналарына  мердігер меке­ме­  тарапынан тапсырыс берілді,- деді  Азамат Биғалиұлы.

Сондай-ақ, шаһар басшысы жылу мен су желілерін қайта жаңғыртудан өткізу кезінде біраз қиындықтардың орын алғандығын айтты. Мердігерлер барынша асфальт қабатын бұзбауға тырысқанын жеткізді. Дегенмен, тиісті бөлім басшыларына мердігерлерге тапсырылған жұмысты орын­даған соң бүлінген жерлерді қалыпқа келтіру керектігін еске салды. Және қаладағы жол белгілерін жаңартуды тапсырды.

Жаңадан құрылған қалалық мемле­кеттік сатып алу бөлімі басшысы да жыл басынан бері атқарылған шаруалар  барысына  тоқталды.

– Бүгінгі күнге бөлімге 239 өтінім түсіп,  барлығы  239  ашық  конкурс 19 млрд 964,6 млн теңгеге жарияланды. Оның ішінде 30 ашық конкурс өтпеді деп танылып, қайтадан жа­рияланды. Сонымен қатар өтпеді деп танылған мемлекеттік сатып алулар бойынша бiр көзден сатып алуға 37 шақыру жіберілді. Жалпы, бүгінгі күнге жарияланған ашық конкурстан 163 конкурс (69,96%) бойынша қорытындысы шықты, 22 конкурс (9,4%) бойынша құжаттар қаралуда, 48 конкурс (20,2%) бойынша өтінімдер қабылдануда,- деді бөлім басшысы Әлсейіт Иманқұлов.

Әлсейіт Аманжолұлының айтуыша, мемлекеттік сатып алу жұмыс­тарын ұйымдастыруда ауылдық округ­тегі мамандар біліксіз екен. Сондықтан осымен айналысатын мамандарды  арнайы  оқы­туды ұсынды.­

Аппарат отырысында шаһар басшысы қалада жөндеу жұмыстары жүргізіліп жатқан инфрақұрылым желілерін 15 қыркүйекке дейін бітіруді  тапсырды. Жиында бірқатар ауыс-түйістер де орын алды. Бұған дейін Қарауылтөбе ауылдық окру­гі­нің әкімі қызметін атқарып келген Елмұрат Рахматуллаев қала әкімінің кеңесшісі қызметіне тағайындалса, оның орнына «Қазалы-Теміржол­жылу» мемлекеттік коммуналдық кәсіпорны директорының орын­басары  қызметін  атқарған Бауыржан Әліпбайұлы  сайланды.

Қозы Көрпеш   ЖАСАРАЛҰЛЫ