Өзекті мәселелер

  • 17.01.19

    Марат  ӘЙТІМОВ:

    Қас талант тасада қалмайды. Түптің түбінде танылары хақ. Күндердің күні маңдайы жарқырап, жұлдызы биіктей түсетіні белгілі. Сөйтіп, аты мәшһүр адамға айналары сөзсіз. Бұған мыңдап мысал келтіруге болады. Айталық, миллиардтаған қытайды мойындатқан, әлемдік «мен» деген өнер майталмандарының өзі құрметпен ...

    Толығырақ...
  • 17.01.19

    Қызылордалықтар қашанда күн суыта бастасымен жандарын шүберекке түйіп отырады. Бұрыннан-ақ тосыннан келетін апат халықты дүрліктіріп қойған. Дария суының арнасынан асып, елге төндірер қаупін айтамыз. Бұл үшін жыл сайын бюджеттен қыруар қаржы да бөлініп келеді. Арнайы бөгеттер салынып, мұз жару жұмыстарына дейін ел қазынасынан ақша шығарылады. Иә, табиғаттың тосын мінезін біліп болмайсың. Десе д...

    Толығырақ...
  • 17.01.19

    Халық арасында білім саласына қатысты айтылатын сын көп. Әсіресе, жұмыс іздеп, мұғалім болу­ды армандайтындар, тіпті, еден жуушы болып жұмыс істегісі келетіндерден «мектептің ставкасы мынанша» дегенді естіп жүрміз. Алғашында сенбейтінбіз. Өркениетке қадам басқан елімізде еден жуушыдан пара сұрамайтын болар деп ойлайтынбыз. Бірақ дәл сондай жағдаймен бетпе-бет келгендердің бар екені жасырын емес...

    Толығырақ...
  • 17.01.19

    Баспанасыз жүргендердің бағы жанатын болды. Талайдың табал­дырығын тоздырып, пәтерден-пәтерге көшіп жүрген отбасылар енді өз елінен пана табады десек те қателеспейміз. Тек жиған-тергеніңіз қалтаңызда емес, банк есепшотында болса болғаны. Естеріңізде болса­, өткен жылы Қызылорда облысы әкімі Қ.Көшербаев халық алдындағы жылдық есеп беру кездесуінде:

  • 17.01.19

    Әрдайым әдемі болып жүруді қалайтын қыз-келіншектер киім үлгісіне келгенде ерекше талапшыл. Тіпті кейбір сұлулар үшін құрбы­ла­рының үстіндегі жейде немесе көрші­сінің спорттық белдемшесінің өзіні­кімен бірдей болуы «ғаламдық проб­лемамен» пара-пар. Мұндай көрі­ніс­ке сіздің де жиі куә болып жүрге­ніңізге сенімдіміз. Байқағанымыз, бұрымдылар өзгеше болуға ұмтылады. Бүгінде талғампаз бойжеткенде...

    Толығырақ...
Халық-хабар
Арықбалық – ар мен намыстың мекені!
11.01.2019 12:08

Қазалы  ауданының  әкімі  Мұрат  Ергешбаевтың  назарына

«Өлі разы болмай, тірі байымайды». Мұның астарында жас ұрпақты елін, жерін сүюге, өткен ата-бабамыздың есімін жадымызда сақтауға, қала берді имандылыққа шақырған ұлағатты тәрбие жатқаны анық. Бұл, әсіресе, дәл бүгінгідей саясаттың қазаны бұрқ-сарқ етіп қайнап жатқан кезеңде аса қажет екенін ешкім теріске шығара қоймас.

Елбасының «Әрбір өлкенің халқына қорған, ыстығына сая, суығына пана болған баһадүр бабалары бар. Олардың есімін ұрпақтары ұмытпауға тиісті» деген лебізі бар. Бүгінгі күн қазақ тарихында қанды әріппен жазылып, зардабы жалпақ жұртқа аса ауыр тиген қасіретті күннің бірі десем, артық айтқандық емес. Бір сәт сарғайған тарих парағына көз салайықшы.

Танымал жазушы ағамыз Молдахмет Қаназ құрастырған «Жанқожа Нұрмұхамедұлы» атты зерттеулер мен мақалалардан құралған кітаптың 59-бетінде «1857 жылы қаңтар айының 9-10-ы күндері Арықбалықта болған ұрыста батырдың қолының саны үш мыңнан астам еді. Шайқас кезінде ақ туды Жанқожа батырдың өзі көтеріп тұрды. Осы шайқаста орыстардың сапынан шығын болған кісі онша көп емес. Фитингофтың отрядында 300 казак-орыс, 320 жаяу әскер, 3 зеңбірек, 3 ракета қондырғысы бар еді» деп («Сырдария уәлайаты». Қазалы қ., 1894 ж.18 ақпан. Орыс тілінен аударған Асан Досжанов. Очерктің орысшасы 1894 жылы Қазан қаласында жарық көрген) тайға таңба басқандай анық жазылған.

Осы ғылыми-танымдық басылымдағы Молдахмет Қаназ ағамыз келтірген «Алексей Иванович жарылқаушы ма? Жазалаушы ма?» атты мақаласындағы «1857 жылдың 5 қаңтарында зеңбіректердің әр түрінен 103 снаряд, 9 қаңтарда 205 снаряд, осы аралықта көтерілісшілерге әртүрлі оқ-қарудан 3221 (!) оқ атылды. Бұл оқтардың барлығы далаға емес, қазақтарға атылған. Бейкүнә пақырлардың біразы ұрыс алаңы – Арықбалықта жан тапсырды. Көтерілісшілердің ізіне түскен А.И.Бутаковтың жазалаушы отряды 9-11 қаңтар аралығында 212 ағаш үйдің шаңырақтарын талқандап, керегелерін қиратып жылынды, солдаттарға тамақ пісіру үшін отқа жақты. Осы жолы қазақ шаруаларының 1239 малы бекініске айдап әкелінді. Оның сыртында 300 қой солдаттарға азыққа берілді, жол бастап жүрген сұлтандарға сыйға тартылды» деген мәліметті кеудесінде адамгершіліктің титімдей ұшқыны бар пенденің көзіне жас алмай оқуы мүмкін емес.

Жанқожа батыр ауылы Арықбалық ауылдық округінің орталығы саналады. Мұнан екі жылға тарта уақыт бұрын (2017 жылдың күзінде) сол тұстағы Қазалы ауданы әкімі Нажмадин Шамұратовтың қолдауымен батыр ауылында Арықбалық шайқасы құрбандарын еске алуға арналған ауқымды шара ұйымдастырылды. Аталмыш шараға округ әкімі Сапарбек Қуатов бастаған ауыл көлеміндегі мекеме басшылары, ұжымдар, аудан орталығында тұратын жекелеген азаматтар, ауыл тұрғындары, баба ұрпақтары демеушілік жасағанын атап кетпеу әділетсіздік болар еді. Өткен жылы ауылда Алик Тілеуімбетов басшылық жасайтын №94 мектеп ұжымы «Әскери қолданбалы спорт сайысы» түрінен ауқымды жарыс ұйымдастырды. Бұл жолғы шараға «Нұр Отан» партиясы Қазалы аудандық филиалы төрағасының бірінші орынбасары Қасқырбек Мәмбетжан, аудандық денешынықтыру және спорт бөлімінің басшысы Нұрлыбек Есбосын, «Отан» қоғамдық бірлестігінің төрағасы Жетеу Ерекеш, аудандық ішкі саясат бөлімінің басшысы Ғани Темірбаев бастаған ұжымдар демеушілік танытып, «Қазалы» газетінің журналистері белсене араласқан болатын.

Ал биыл... Аудан орталығында тұрғанымен, бар зейіліміз ауылда екенін несіне жасырайын? Қаңтар айы басталысымен ауыл жақтан жақсы жаңалық күткенім рас. Ел үшін басын бәйгеге тігіп, арыстанша алысқан (көпшілігі күші тең емес шайқаста мерт болған) батыр атам бастаған боздақтардың аруағын еске алып, қандайда болмасын шара ұйымдастырылатын шығар деп елеңдегенмін. Өкінішке қарай, бұл күндер үн-түнсіз өтті. Таң атысымен батыр атам ауылындағы «Сарқұл қожа» мешітінің имамы Мұратбек Бәлкеев бауырыма қоңырау шалып, Жанқожа бабамыз бастаған Арықбалық шайқасына қатысушы ержүрек сарбаздарға, сол қандықасапта мерт болған марқұмдардың аруағына құран бағыштауын өтіндім. Мұратбек сөзге келмеді. Мұнан соң ауылдағы №94 мектеп директоры Алик Тілеумбетовке хабарластым. Директор інім болса өзінің сырқаттанып, дәрігерден ем қабылдап жүргенін, алдағы аптада Арықбалық шайқасы құрбандарын еске алуға арналған спорттық шара өткізу ойы барын жеткізді. Қай кезде де ауылдағы ортақ істен бойын тартпайтын Алик Тілеумбетовке ағыл-тегіл алғысымызды жаудырдық.

Мәдениет үйінің директоры Марат Жақсылықовтан жылдағы дәстүрмен жоғарыдағы оқиғаға байланысты шара өткізуді округ әкімі Сапарбек Қуатовқа білдіргенін, жоспарланған шараның ауылдағы спорт кешенінің директорының науқастанып қалуына орай кейінге қалғанын естідік.

Десе де менің көкейімде «бүгін (10.01.2019 ж) ауыл әкімі мәдениет үйінде жылдық есебін беріпті. Жиын барысында округ әкімі Сапарбек Қуатов осы күннің ауылымыз үшін қаншалықты маңызды екенін, Арықбалық шайқасына қатысқан батыр атамыз бастаған аяулы азаматтардың ерлігі, ел үшін төгілген қаны, қыршынынан қиылған боздақтардың асыл бейнесі мәңгі ұмытылмайтынын бір-екі ауыз сөзбен атап кеткенде де болар еді. Ресейде 1905 жылғы 9 қаңтардағы оқиғаны «қанды жексенбі» деп әлі күнге дейін ауыздарынан тастамайды. Әрине, қаза адам санымен өлшенбейді. Алайда Ресейдегі сол оқиғаның салдары Арықбалық шайқасында біздің елдің халқының шеккен азабы, оққа ұшқан, аязда үсіп өлген адам санымен салыстыруға келе ме? Қаңтардың қақаған аязында бар жан сақтар баспанасы киіз үйлері отқа оранған, босқынға ұшыраған қарапайым халықтың (әсіресе емшектегі нәрестелер, балалар, ауру-сырқаулар мен қарттар) қаншасы қырылғанын кім білсін? Енді сол естігеннің аза бойын қаза қылатын қанды қырғынды қазіргі ұрпақтары жыл сайын еске түсірсе, артықтық ете ме? Ол үшін кімнен, қандай нұсқау керек? Мекеме басшысы ауырып қалса, өзге адам бар емес пе? Не де болса дер уақытында үнсіздік танытқан дұрыс емес тəрізді. Кейін қандай шара өткізсе де өздері білер. Қазақ тарихында ойып орын алатын кез келген көтеріліс, қозғалыстан маңыздылығы кем түспейтін Арықбалық шайқасын аудан көлемінде еске алғанда да ұтылмас едік» деген ауыр ой қылаң берді.

Жадыма танымал заңгер, ақынжанды азамат, Жанқожа батырдың ұрпағы Есекей Құдайбергеннің «Сол боздақтар кəуірлердің азабы жанына батқасын шықты ғой. Əйтпесе кім қақаған қыста қолына таяқ алып жауға шабады. Жанқожа баба да қатерді сезді, білді, дегенмен намысқа шыдамаған бауырларын бастуға мəжбүр болды. «Сол Арықбалықта қалуым керек еді» деп өкінішпен кеткен жоқ па? Арықбалықты намыс пен ардың, құлдық санадан арылудың жолын аңсаған жандардың қаны тамған жер деп қастерлей алсақ кәнеки?!» деген лебізі оралғанда денемді белгісіз сезім кернеді.

Белгілі жазушы Молдахмет Қаназ ағамыз Арықбалық шайқасы құрбандарына арнап аудан көлемінен ескерткіш-белгі қоюды мәселе қылып көтеріп жүргені көзі қарақты оқырманға жақсы мәлім. Азаттық жолында шейіт кеткен батыр бабаларымызға қандай құрмет жасасақ та орынды. Олай болса, қарымды қаламгердің ұсынысы ел ағалары тарапынан қолдау табады деп үміттенеміз!

Қар жамылған Арықбалық алқабы талай сырды бауырына басып мүлгіп жатыр.

Жұмабек  Табынбаев,

Қазалы  ауданы

 
Тәртіптік теріс қылықтарға жол бергені үшін «ескерту» берілді
11.01.2019 12:00

Қызылорда облысы, Жаңақорған аудандық аумақтық инспекцияның басшысына Әдеп кодексінде көзделген тәртіптік теріс қылықтарға жол бергені үшін «ескерту» түріндегі тәртіптік жазасы берілді.

ҚР АШМ Ветеринариялық бақылау және қадағалау комитетінің Қызылорда облыстық аумақтық инспекциясы Жаңақорған аудандық аумақтық инспекциясының басшысы қоғамдық орында масаң күйде жүргені үшін оған қатысты ҚР-ның ӘҚБтК-нің 440-бабының 1-бөлігімен әкімшілік іс қозғалып, аудандық соттың қаулысымен 6012 теңге көлемінде айыппұл салынған.

Аталған жайт Қызылорда облысындағы Әдеп жөніндегі кеңестің назарына ілініп, кеңестің кезекті отырысында аудандық аумақтық инспекцияның басшысының тәртіптік ісі қаралды.

«ҚР мемлекеттік қызметшілерінің әдеп кодексінің» 5-тармағының 13- тармақшасында «Мемлекеттік қызметшілер жасағаны үшін заңнамада тәртіптік, әкімшілік немесе қылмыстық жауаптылық көзделген құқық бұзушылықтар мен теріс қылықтарды жасауға жол бермеуі тиіс» және 7-тармағының 1-тармақшасында «Мемлекеттік қызметшілер қызметтен тыс уақытта жалпы қабылданған моральдық-әдептілік нормаларын ұстануға, қоғамға жат мінез-құлық, оның ішінде қоғамдық орындарда адамның қадiр-қасиетiн және қоғамдағы адамгершілікке нұқсан келтіретін масаң күйде болу жағдайларына жол бермеуге тиіс» деп көрсетілген, - дейді облыстық мемлекеттік қызмет істері және сыбайлас жемқорлыққа қарсы іс-қимыл департаменті басшысының орынбасары Б. Байхожаев.

Тәртіптік істі қарау нәтижесімен ҚР мемлекеттік қызметшілерінің Әдеп кодексінде көзделген тәртіптік теріс қылықтарға жол бергені үшін Жаңақорған аудандық аумақтық инспекциясының басшысына «ескерту» түріндегі тәртіптік жазасы берілді.

Б.Әбдіқадіров

 
Қызылордада өрттен 3 бала қаза тапты
10.01.2019 10:08

Қызылорда қаласының аумағындағы үйде орын алған өрттен 3 бала қаза тапты, деп хабарлайды «Халық» газеті Kyzylorda-news.kz интернет газетіне сілтеме жасап.

9 қаңтар күні сағат 19:29 шамасында Қызылорда қаласы Ақсуат ауылдық округіне қарасты Наурыз саяжайында Махмұтов көшесі, нөмірсіз үйде өрт шыққандығы жайлы облыстық төтенше жағдайлар департаментінің 112 жедел арнасына хабарлама түскен.

Оқиға басына жедел жеткен төтенше жағдайлар қызметкерлерінің мәліметіне сәйкес, 1986 жылы туылған Сәдуова Жәмилә Ибрагимқызы өзінің үйінде өрт оқиғасы болып жатқандығын байқап, аталған үй ішінде балалары қалып қойғандығы туралы туысқан ағасы Наурыз саяжайы 7 көше №63 үй тұрғыны 1971 жылы туылған Айтбаев Нартайдан балаларын құтқарып беруін сұраған. Нәтижесінде, Айтбаев Нартай үй терезесін сындырып, кәмелет жасқа толмаған 2011 жылы туылған Тұрсынбек Алдияр, 2012 жылы туылған Тұрсынбек Алинұр, 2014 жылы туылған Тұрсынбек Абзал құтқарылып, түтінге улану нақтамасымен (угар) облыстық балалар ауруханасының жансақтау бөліміне жедел жәрдем қызметкерлерімен жеткізілді.

Алайда 2011 жылы туылған Тұрсынбек Алдияр, 2012 жылы туылған Тұрсынбек Алинұр, 2014 жылы туылған Тұрсынбек Абзал облыстық балалар ауруханасының жансақтау бөлімінде қайтыс болғандығы белгілі болды.

Сонымен қатар, көмек көрсетуге келген 1971 жылы туылған Айтбаев Нартай алған дене жарақатымен облыстық медициналық орталығының жансақтау бөліміне және жұбайы 1978 жылы туылған Жалтырова Гүлнұр облыстық медициналық орталығының жасанды ауамен демалу аппаратына жатқызылды.

Қазіргі уақытта өрттің шығу себебі анықталуда.

 
Сол жағалаудағы ескі бөгетті су жырып кетті
09.01.2019 17:08

Сырдария өзенінің суы Қызылорданың сол жағалауындағы ескі бөгетті жырып кетті. Алайда қалаға төніп тұрған қауіп жоқ. Облыстық жұмылдыру дайындығы басқармасы басшысының орынбасары Ғабит Жаңабаев осылай деді, деп хабарлайды halyk-gazeti.kz сайты Astanatv арнасына сілтеме жасап.

Ғабит Жаңабаевтың айтуынша, былтыр жаңадан салынған қорғаныс бөгеті апаттың алдын алған. Десе де, мамандар дария әлі де мінез танытуы мүмкін екенін жасырмайды. Сол үшін 79 эвакуациялық бекет дайындалған. Құм толтырылған қаптар мен жанар-жағармай да әзірленіпті. Тіпті екі тікұшақ алуға «Казавиақұтқару» мекемесімен келісім де жасалған.

- Бүгінгі күні Сырдария өзені бір қалыпты жағдайда деп айтуға болады. Былтырғы жылға қарағанда қазір Қызылорда қаласының тұсында 30-35 сантиметрге төмен. Екі күн бұрын ескі қорғаныс бөгетінен үстерінен су ағып, жаңа қорғаныс бөгетіне келіп тірелді. Ескі қорғаныс бөгеті қалыпқа толық келтірілді сол мезгілде, - дейді Қызылорда облыстық жұмылдыру дайындығы басқармасы басшысының орынбасары.

Жаңа қорғаныс бөгеті былтыр салынған болатын. Ол шамамен 10 шақырымға созылған. Оған үкіметтен 2 миллиард 656 миллион теңге бөлінген еді. Бұдан бөлек, қауіпті аумақтарды қалпына келтіруге облыс бюджетінен 225 миллион теңге жұмсалды. Басқарма басшысының орынбасары бұл жұмыстар биыл да жалғасады деп отыр.

 
«Брайль жүйесі - қазіргі ақпараттық қоғамда»
09.01.2019 16:56

3 қаңтар күні француздың тифлопедогогы Луй Брайльдің (04.01.1809 – 06.01.1852) туған күіне орай арнаулы кітапханада «Брайль жүйесі - қазіргі ақпараттық қоғамда» атты кең көлемде кітап қөрмесі ұйымдастырылды. Көрмеге Луй Брайльдің өмірі мен қызметі туралы ақпараттар жинақталған әдістемелік құралдар, брайльша журналдар, кітаптар, брайль жүйесін үйренемін деушілерге әліппе қойылып, оқырмандарға таныстырылды. Сонымен қатар оқу залында тұрақты жұмыс жасайтын Брайль үйірмесі туралы кеңінен таныстырылды.

Қ.Макосова,

Қызылорда облыстық зағип және

нашар көретін азаматтарға арналған

арнаулы кітапханасының оқу бөлімінің

кітапханашысы

 
<< Бірінші < Алдыңғы 1 2 3 4 5 6 7 8 9 10 Келесі > Соңы >>

Күнтізбе

< Қаңтар 2019 >
  1 2 3 4 5 6
7 8 9 10 11 12 13
14 15 16 18 19 20
21 22 23 24 25 26 27
28 29 30 31      

Сауалнама

Аса мәртебелі шенеуніктердің қылмысқа шатылып жатқандығы нені аңғартады?
 

Ауа райы

Валюта бағамы

Қазақстан Республикасының Ұлттық Банкі валюталардың ресми бағамдары