Өзекті мәселелер

  • 19.04.18

    ӨМІР   СОҚПАҒЫ...

    Жол – экономиканың күретамыры, тіршілік ізі. Қала ішіне қамшының өрі­міндей таралатын сол жолдардың  қазіргі  жағдайы  қандай?

    Көктем бастала салысымен Қызылорданың орталық көшелері ғана емес, шетаймақ жолдарына да жан біте­тіні бар. Қазіргі күні қала бо­йынша ұзындығы 619 шақырымды құрайтын 766 көше бар. Оның 503,2 ...

    Толығырақ...
  • 19.04.18

    Жақында үйге туыстарымыз келіп, кішкентай бүл­діршіндермен оңаша қалып, бала да болса әңгімеге тарттым. Сөйтіп «Кімге еліктейсіңдер?»  деп  сауал  тастадым. Сонда 8 жастағы інім «Бэтмен», «Өрмекші адам», «Халк», «Темір адам», «Флеш» секілді шетел мульт­фильмдерінің басты кейіпкерлерін тізбектей жөнелді. Арасында бірде-бір қазақ батырл­арының есімі жоқ. Онысымен қоймай, сол кейіпке­рлердің өзіне...

    Толығырақ...
  • 19.04.18

    «Менің байқауымша, сұлу әйелді ит қаппайды. Олай болса­, сұлулықты ит те сезеді». Жазушылық жылнамасында әйел, ана тақырыбына ең көп қалам сілтеген талантты жазушы Ғабит Мүсірепов осылай депті. Иә, сұлулықты кім жақсы­ көрмейді, сұлулық кімге билік жүргізбеген десеңізші? Бота көзді, шие ерінді, үріп ауызға салғандай сұлу! Қыздардың осы сипаты қазір бар ма? Әрине, бар. Бірақ көзін линза арқылы қ...

    Толығырақ...
  • 19.04.18

    Қаржы және қоғам

    - Бұрын бәрін кадр шешкен деседі. Осы рас па, әлде өзгенің бе өсегі?

    - Иә, қазір қоғам емес кешегі, қаржы бәрін шешеді... Қысқартады, кеседі. Өшіреді, өседі... Қаржысы жоқ қасқаның маңдайда соры бес елі.

    - Сонда кадр ешнәрсе шешпей ме?

    - Жоқ, ол да аз-маз шешеді. Қаржың болса қалтаңда,...

    Толығырақ...
  • 19.04.18

    МЫҚ  ШЕГЕ  ҚАЙДА?

    Профессор  Темірбек

    ҚОЖАКЕЕВ  рухына Толығырақ...

Халық-хабар
Қазалыдағы тігін кәсібін дамытқандар
02.04.2018 09:59

Кәсіпкерлікке  кең  өріс

Елімізде шағын және орта кәсіпкерлікті қолдауға мемлекет тарапынан зор қамқорлық жасалып жатқаны, несие алуға, әсіресе ауыл тұрғындарына қомақты қаржы бөлінетіні, әрі заңды жолымен ешқандай кідіріссіз берілетіні, осындай игі қадамдар Сыр өңірінде де жиі кездесетіні талай мәрте айтылып, жазылып жүр. Оған қоса ағымдағы жыл облыс көлемінде «Кәсіпкерлікті қолдау жылы» деп жарияланғаны кәсіпкерлердің сенімін еселей түскені анық. Дәл осындай игі істің нақты көрінісін Қазалы ауданынан да аңғаруға болады. Ауданда кәсіпкерлік саласының көптеген түрлері қарқынды дамыған. Соның бірі – тігін кәсіпшілігі.

Мархаббат Асанова есімді қарындасымыз – Тәуелсіздіктің төл құрдасы. Қазалы қаласының тумасы, нақты кезеңде жеке кәсіпкер ретінде қыздардың жасауы мен әсем өрнектелген құрақ көрпе-төсектер тігумен айналысып жүрген Мархаббатты он саусағынан өнері тамған десек, лайықты. Мектептен соң Ақтөбе көліккомуникация және жаңатехнологиялар колледжін бітірген кейіпкеріміз еңбек жолын туып-өскен Қазалы қаласындағы №8 кәсіптік мектепте инженер-педагог ретінде бастады. Жылдар өте жеке кәсіп ашуға деген қызығушылығы артқан ісмер ару өз мақсатын жүзеге асыруға бекінді. Бойындағы тігін өнеріне деген бейімділігі мен табандылығы да жоспарының жүзеге асуына септігін тигізді. Оған қоса мемлекет тарапынан кәсіпкерлікті қолдауға деген оң көзқарас та талабын ұштай түсті. Ақыры кәсібі де алға басты, қолдау да жасалды. Соның нәтижесінде «Ауыл шаруашылығын қаржылай қолдау» бағдарламасымен мемлекеттен екі мәрте несие алуға қол жеткізді.

Өз кәсібіне, тігін өнеріне деген құштарлық Мархаббат Маратқызын алға жетеледі. Алдымен Астана қаласындағы “Сырлы саусақ” сән үйінде тігін курсын оқып, тігінші сертификатын иеленді. Мұнан соң Ақтөбедегі “Құрақ өрлеу” сән үйінде білімін жетілдірді. Қазіргі сәтте жас кәсіпкер алған білімін тәжірибемен ұштастыруда. Әрі жеміссіз емес. Мархаббаттың икемді саусақтарымен дайындалған қыз жасаулары мен көрпе-төсегі тұтынушылар тарапынан зор сұранысқа ие.

Тағы бір кейіпкеріміз Гүлайна Ерназарова шеберлігі шыңдалған тігінші болуымен қатар берекелі шаңырақтың отанасы да. Алғашқыда маталардан қалған қиындылардан құрап, жеңіл көрпешелер жасауды меңгерді. «Шеберден іс қорқады» деген бар. Алуан маталардың қиындысы Гүлайнаның епті қолы тиісімен көздің жауын алатын бұйымдарға айналып шыға келетін. Құдды сиқыршы дерсіз. Ал мұның астарында қаншама еңбек, асқан шеберлік жатқаны кәсіп иесіне жақсы мәлім. Десе де, төгілген тер, қаншама еңбек текке кетпеді. Ауданда шағын және орта кәсіпкерлікті дамытып, өнім өндіру саласындағы қызметі мен ауданның әлеуметтік-экономикалық дамуына белсенді үлес қосқаны үшін Қазалы ауданы әкімі Мұрат Ергешбаевтың қолынан «Үздік тігін бұйымдарын дайындайтын кәсіпкер» номинациясын алды.

- Құрақтың 200-ден астам түрі бар. Оларды тұтыну қажетіне қарай түрлі өлшем-деңгейде жасауға болады. Ең бастысы, тұтынушы талғамынан табылу қажет. Бұл өнер маған әжемнен қонған. Сондай-ақ анам мен енемнен де үйренгенім аз емес. Кәсіпкерлік негіздерін оқып, білім алдым. Тапсырыспен құрақ тігемін. Ата-бабамыздың ұрпақтан-ұрпаққа жалғасып келе жатқан қолөнердің осынау түрі ешқашан ұмытылмасы даусыз, - дейді жеке кәсіпкер Гүлайна.

Светлана Кенбай болса сапалы дайындалған тігін заттарымен көпшіліктің ықыласына бөленіп жүрген кәсіпкер қарындасымыздың бірі. Ол әзірлеген ұлттық нақыштағы ою-өрнектермен әдіптелген сәнді ұлттық киімдер жұртшылық тарапынан жоғары бағалануда. Бір кереметі, Светлананың тігіншілік өнерге деген бейімділігі мектеп қабырғасында жүргенде байқалған еді. Ойыншық қуыршағына тіккен киімдері, көрпе-жастығын көрген жан қайран қалатын. Уақыт өте Шымкент қаласындағы «Жалын» әлеуметтік-педагогикалық колледжіне оқуға түскен кезінде де өзінің және құрбыларына тіккен көйлектері ерекше назарға ілікті. Светлана уақыт өткен сайын шеберлігін шыңдай түсті. «Жас Орда» жастар қоғамдық бірлестігінде жоба үйлестіруші болып, мәдени-көпшілік шаралардың өтуіне ұйытқы болды. «Шағала» балаларды сауықтыру-демалыс орталығында аға тәлімгер қызметін атқарып, балаларға білгенін үйретуден жалықпады. Қашанда қарапайым дағдысынан танбайтын Светлана отбасында сыйлы келін. Жары Талғат Сағидуллаұлы алып берген тігін машинасымен кәсібін жалғастыруда. Тігін машинасы озық үлгідегі электронды түрде жұмыс істейді. Он алты түрлі тігіс өлшемін дайындауға мүмкіндік қарастырылған. Светлана кәсіпкерлік білім алуды көздейді. Мұнан соң шағын кәсіпкерлікті дамытуға арналған бағдарламалар арқылы несие иеленіп, шеберхана ашсам деген жоспары бар.

Жұмабек Табынбаев,

Қазалы ауданы

 
БАСҚАРМА БАСШЫСЫ ТАҒАЙЫНДАЛДЫ
02.04.2018 09:52

Облыс әкімінің өкімімен Абдуалиев Айдар Сейсенбекұлы Қызылорда облысының табиғи ресурстар және табиғат пайдалануды реттеу басқармасының басшысы лауазымына тағайындалды.

А.Абдуалиев 1974 жылы туған. Қазақ ұлттық техникалық университетінің Қаратау филиалы мен М.Х.Дулати атындағы Тараз мемлекеттік университетін бітірген.

Еңбек жолын 1996 жылы Жамбыл гидромелиоративтік құрылыс институтының оқытушысы ретінде бастаған.

Жамбыл, Маңғыстау және Қызылорда облыстарының жергілікті атқару органдарында жауапты басшы қызметтер атқарған.

2015 жылдың желтоқсан айынан бастап осы кезге дейін Қызылорда облысы әкімі аппараты басшысының орынбасары қызметін атқарып келді.

 
Сыр сақшылары Ұлыстың ұлы күнін атап өтті
02.04.2018 09:44

Наурыз мейрамы – ежелгі заманнан қалыптасқан жыл бастау мейрамы. Күн мен түн теңеліп, жер-көкке жан бітіп, адамдардың аузы аққа тиіп, жақсылыққа жол бастайтын Ұлыстың ұлы күнін Қызылорда облыстық ішкі істер департаменті қызметкерлері ерекше мерекелік көңіл күймен ұжым болып атап өтті. Шараға ардагерлермен қатар қызметкерлер және олардың отбасы мүшелері де қатысты.

Мерекелік шара ішкі істер органдары ардагерлерінің ақ батасынан басталды. Аға буын өкілдері мұсылман халқының жаңа жылында барша халыққа жақсылық, молшылық, мол табыстар тілей отырып, қыстан аман шыққандарына шүкірлік етіп, көптен көрмеген әріптестерімен, замандастарымен қауышып, иық түйістірді.

Одан кейін шара спорттық сайыстарға ұласты. Департаменттің қызмет салалары мен қалалық ішкі істер басқармасы бөлімдерінің қызметкерлері бір-бірімен топтасып, 13 құрама команда жасақтады. Арқан тартудан, гір тасын көтеруден, асық ату, ләңгі тебу, қой көтеру сынды ұлттық ойын түрлерінен бақтарын сынады.

Полиция қызметкерлерінің дене шынықтыру дайындығын жоғары деңгейде ұстауын қамтамасыз ете отырып ұлттық ойын түрлерін насихаттауды мақсат еткен сайысқа департаменттің басшылық құрамынан құралған төрешілер алқасы төрелік етті.

Тәртіп сақшылары арасындағы бірлікті, командалық қолдауды нығайтуды мақсат тұтқан бұл спорттық дода өте тартысты өтті.

Спорттық бәсекенің қорытындысы бойынша арқан тартудан І орынды Оқу-жаттығу взводының құрама командасы иеленсе, ІІ және ІІІ орындарды "Ақсай" полиция бөлімшесі мен Ұйымдасқан қылмысқа қарсы күрес басқармасының құрама командалары қанжығаларына байлады. Гір тасын көтеруден Жедел қимылдайтын арнайы жасағының инспекторы Талант Ахметов үздік деп танылды. Ал асық атудың және ләңгі тебудің шеберлері болып Жедел қимылдайтын арнайы жасағының инспекторлары Мұхит Серікбейітов пен Женсерік Абдулайтов танылса, қой көтеруден Жедел қимылдайтын арнайы жасағының инспекторы, дзюдодан және қол күрестен әлем және республикалық деңгейдегі чемпионаттардың жеңіспазы Ержан Абдуллаев талассыз жеңімпаз атанды.

Шара соңында ішкі істер органдарының ардагерлері мен қызметкерлеріне және қонақтарға арналып мерекелік дастарқан жайылып, ұлттық тағам – наурызкөжеден дәм татты.

Қызылорда ОІІД баспасөз қызметі

 
Бақытжан Сағынтаев өңір дамуына оң бағасын берді
30.03.2018 09:27

Қазақстан Республикасының Премьер-Министрі Бақытжан Сағынтаев бастаған үкіметтік делегация Қызылорда облысына жұмыс сапарымен  келді. Делегация құрамында ҚР Премьер-Министрі Кеңсесінің басшысы,  Инвестиция және даму, Ұлттық экономика, Ақпарат және коммуникациялар министрлері, сондай-ақ, орталық мемлекеттік органдардың, ұлттық компаниялардың және даму институттарының басшылары бар.

Сапар кезінде Бақытжан Сағынтаев пен делегация мүшелері облыс активімен және кәсіпкерлермен, сондай-ақ әлеуметтік сала өкілдерімен кездесті. «Қараөзек» газ компрессорлық станциясында болып, Арал ауданындағы балық өңдеу зауыты мен «Аралтұз» АҚ жұмысын көрді.  Мұнда қоғам өкілдерімен басқосу өтіп, Солтүстік Арал жобасын жүзеге асыру, суармалы жерлерді жақсарту, ҚР Президентінің 5 әлеуметтік бастамасы аясында шағын несиелендіру ісін жетілдіру мәселелері талқыланды. Сондай-ақ, Байқоңыр қаласы мен ғарыш айлағын дамыту барысымен танысты.

Облыстық әкімдікте өткен жиында аймаққа инвестиция тарту, шағын және орта бизнесті дамыту, индустрияландыру, технологиялық жаңғырту және 4.0 индустрия, цифрландыру, жұмыс орындарын ашу және өзін-өзі еңбекпен қамтыған азаматтардың мәселелері айтылды.

Облыс әкімі Қырымбек Көшербаев аймақтағы Жобалық басқару жүйесінің іске асуы мен 2018 жылы өңірдің әлеуметтік-экономикалық дамуының мақсатты көрсеткіштерінің жетістіктері туралы баяндады. Мәселен, соңғы 5 жылда облыста 50-ден аса өнеркәсіптік нысан іске қосылып, аймақ экономикасын әртараптандыру басталды, өңдеу өнеркәсібі жоғары қарқынмен дамуда.

Агроөнеркәсіптік кешен саласында оң динамика байқалады. Қазір экспортқа бейімделген өнім шығару және өңдеу ісіне екпін берілген. Мәселен, экспортқа шығаруға лайықталған күріш сұрыптарын егу жоспарлануда. Сонымен бірге, "жобалық басқару" аясында жергілікті шаруалардың өнімдерін сыртқы нарыққа тиімді шығаруына мүмкіндік беретін электронды сауда алаңы – агробиржаны құру көзделуде.

Облыстағы негізгі міндеттердің бірі – аймақ халқының әлеуметтік осал топтарын қолжетімді баспанамен қамту.

«Несиеге үй алуға барлығының мүмкіндігі жоқ, сондықтан «Орда» тұрғын үй құрылысының жол картасы қабылданды. Оны жүзеге асыру үшін жыл сайын облыстық бюджеттен 2 млрд. теңге қаржы бөлініп, «Нұрлы жер» бағдарламасы аясында бой көтеріп жатқан несиелік тұрғын үйлер сатып алынып, тұрғындарға алғашқы жарнасыз және кейін сатып алу құқығымен ай сайын жалпұл төлеу шартымен берілетін болады. Біздің «Орда» бағдарламасы Елбасының «7-20-25» бағдарламасының лайықты қосымшасы болады»,- деп атап өтті Қырымбек Көшербаев.

Қазіргі таңда облыста өнімсіз жұмыспен қамтылған және жұмыссыз  89 мың азамат бар, оларды әсіресе, ауылдық жерлерде кәсіпкерлікті дамыта отырып, нәтижелі еңбекке баулу жоспарлануда. Осыны ескере отырып, 2018 жыл Қызылорда облысында жаппай кәсіпкерлікті қолдау жылы болып жарияланды.

«Рухани жаңғыру» бағдарламасы аясында Қызылорда облысында еліміздегі алғашқы «Сотсыз татуласу орталығы»  пилоттық жоба ретінде ашылады. Айта кету керек, аймақта мұндай бастаманың үздік үлгілері бар. Мәселен, Сырдария ауданы Нағи Ілиясов  аулындағы қоғамдық бірлестік құрамындағы ақсақалдар ауылдастар арасындағы дауды бейбіт жолмен шешіп келеді.

Бүгінде облыста мемлекеттік-жекешелік әріптестік аясында 29 млрд.теңгеден астам қаржыға 66 жоба жүзеге асырылуда. Жобалар саны бойынша аймағымыз республикадағы алдыңғы орындардың бірінде.

Соңғы 5 жылда өңірде әлеуметтік саланың 200 нысаны пайдалануға беріліп, бірқатар мәселелердің шешілуіне мүмкіндік берді. Қазіргі негізгі міндеттердің бірі – өмірдің барлық салаларын цифрландыру.

"Біздің міндетіміз – тұрғындардың жайлылығы үшін онлайн қызмет түрлерімен қамтамасыз ету. Қазіргі кезде аймақты цифрландыру үшін 72 жобаны жүзеге асыру көзделуде, бұл мақсатқа облыстық бюджеттің өзінен 2 млрд.теңге бөлу жоспарланып отыр.  20 жобаның іске асырыла бастауы алғашқы кезеңнің «жеңісі» болды", - деді әкім.

Облыс жобалық басқару аясында 5 салалық – базалық индустриаландыру, агроөнеркәсіптік кешен, сауда, денсаулық сақтау және білім беру; 3 тікелей – жаппай кәсіпкерлікті дамыту, қаржылық тұрақтылық, нәтижелі жұмыспен қамту бағыттары бойынша 10 жобаның жүзеге асырылуына қатысуда.

Мәселен, аймақ «Инвестиция тарту» жобасы бойынша негізгі капиталға құйылатын инвестицияны 7,5 пайызға нақты өсіру туралы міндеттемме алды. Бұл республикалық көрсеткіштен жоғары, елімізде бұл көрсеткіш 5.1%.

«Аймақта  инвестицияның нақты өсімін АӨК, базалық индустриаландыру, денсаулық сақтау, білім беру және туризм салаларында да республикалық көрсеткіштен арттыру жоспарлануда. 72 жобаны жүзеге асыру көзделуде, оның ішінде құны 1 млрд. теңгеден асатын 23 жоба және сомасы 1 млрд. теңгеге жуық 49 жоба бар»,- деп атап өтті облыс әкімі.

Нәтижесінде биыл аймақта өңдеуші сектордағы инвестиция көлемін 40%-ға, өңдеу өнеркәсібінің үлесін – 7,2%-ға, шикізаттық емес экспорт көлемін 16,7%-ға ұлғайту межеленіп отыр.

Бұған қоса, «Кәсіп жүргізу шарттарын жақсарту, бизнесті бақылауды және шығындарды азайту» жобасы аймақ үшін басымдыққа ие болып табылады. Жыл басында жалпы бюджеті 32 млрд. теңгеден асатын «Жаппай кәсіпкерлікті дамытудың жол картасы» әзірленді. Оның ішінде 3 млрд. теңгеден астам қаржыны стартап-жобаларға бөлу жоспарлануда.

«Ағымдағы жылы шағын несиелендіру ісіне тек облыстық бюджеттің өзінен 1 млрд.теңге бөлінді, тағы 2 млрд. теңгені басқа қаржы көздерінен тартуды жоспарлап отырмыз. Өңірлік инвестициялық қор құны 500 млн. теңгеден асатын 171 жобаны мақұлдады»,-деді аймақ басшысы.

Бұдан бөлек, жұмыссыз және өзін-өзі еңбекпен қамтыған азаматтардың жаңа бизнес идеяларын жүзеге асыруы үшін 3 млн. теңгеге дейін қайтарымсыз грант беру үшін  облыстық бюджеттен 200 млн. теңге бөлу жоспарлануда.

«Жобалық кеңсе» ақпараттық жүйесінде республикалық жобалардан бөлек 33 инновациялық және бюджеттік, сондай-ақ, экономиканы цифрландыру жобасына бақылау жүргізілуде. «Hack Day», «Бейресми жұмыспен қамтуды заңдастыру», «Агробиржа», «Арбат» және басқа жобалар пилоттық режимде іске асуда.

Қызылордада Бақытжан Сағынтаев Астананы газдандыру жобасы бастау алатын "Қараөзек" газкомпрессорлық стансасының жұмысымен танысты. Естеріңізге сала кетсек, 2017 жылдың шілде айында Қызылорда облысында жоғары газкомпрессорлы "Қараөзек" стансасы іске қосылды. Қазақстанның орталық және солтүстік өңірлеріне көгілдір отын жеткізу дәл осы станциядан бастау алады. Қызылорда облысы үшін бұл қосымша жұмыс орындарын ашуға мүмкіндік беретін тағы бір жоба.

Балық шаруашылығы қайтадан облыс экономикасының маңызды салаларының біріне айналуда. Тек соңғы 5 жылдың ішінде аймақта 4 балық өңдеу зауыты ашылды, балық өнімдерінің экспорты 8 есеге артты. Саланың дамуы туралы Бақытжан Сағынтаевқа "Арал балықөңдеу зауыты" ЖШС аралау кезінде баяндалды.

Арал ауданының жұртшылығымен кездесу барысында Солтүстік Арал жобасын жүзеге асыру, суармалы жерлерді жақсарту, ҚР Президентінің 5 әлеуметтік бастамасы аясында шағын несиелендіру ісін жетілдіру мәселелері талқыланды.

«Халықтың қауіпсіздігін қамтамасыз ету мақсатында  биыл республикалық және жергілікті бюджет есебінен «САРАТС-2» жобасының 4 бөлігін жүзеге асыруды бастадық. Олар – Қызылорда су торабына кешенді жөндеу жүргізу, қорғаныс бөгеттерін нығайту, өзен арнасын түзету және Қазалы ауданы бірлік елді мекенінің тұсынан көпір салу»,- деді облыс әкімі Қырымбек Көшербаев.

Облыс әкімі Елбасының тапсырмасын уақтылы орындау мақсатында жобаның қалған 4 бөлігін іске асыруды жеделдетуді ұсынды.

Делегация барған келесі нысан "Аралтұз" АҚ болды. Айта кету керек, 2017 жылдың қорытындысы бойынша тұз өндіру көлемі 2012 жылға қарағанда 2,2 есеге артты, 2018 жылы өндірілген тұз көлемін өткен жылдың көрсеткіші секілді 25%-ға, ал 2021 жылы тағы да 2 есеге көбейту көзделуде. Сонымен қатар, отандық инвестор Қазақстанның даму Банкінің қолдауымен кальцийлендірілген сода шығару зауытын салуды жоспарлап отыр, құрылыстың бірінші кезеңі осы жылдың сәуір айында Арал қаласында басталады.

Нысан басында ҮИИДБ-2 бағдарламасы аясында аймақта жүзеге асырылып жатқан жобалар таныстырылды.

Мемлекеттік индустриаландыру бағдарламасының екінші бесжылдығы аясында 6 мың жұмыс орнын қамтитын 620 млрд.теңгенің 26 жобасы жүзеге асырылуда. 2018 жылы 650 жұмыс орнының құрылуымен 102 млрд.теңгенің 4 жобасын: молибден үш оксиді өндірісі, шыны және тампонажды цемент зауыттары, сондай-ақ, балық өңдеу кәсіпорындарын іске қосу жоспарланып отыр. Экспортқа бейімделген және жаңа технологияларды қолданатын бұл өндіріс орындары еліміздегі алдыңғы қатарлы нысандар болады.

Сондай-ақ, жақын арада Қытай, Түркия және Иран мемлекеттерімен бірлесіп 301 млрд.теңгенің 5 инвестициялық жобасын іске асыру межеленіп отыр. Мұнда 3,4 мың жаңа жұмыс орны ашылады. Шетелдік әріптестермен бірігіп тағы 9 инвестициялық  жоба жүзеге асады.

Естеріңізге сала кетсек, "Байқоңыр" кешеніндегі ұзақ мерзімді әріптестік тұжырымдамасының аясында   қаланың болашақ дамуы,  сонымен қатар шағын және орта бизнеске қатысты бірқатар ғарыштық бағдарламалар жүзеге асуда.

Сонымен қатар, "Восточный" космодромындағы ғарыш бағдарламаларының бөлігін "Байқоңырға" ауыстыру туралы шешім қабылданды. Қос тараптан 2022 жылы  жер серігі бар қазақстандық зымыран тасығышын ұшыру үшін  "Бәйтерек" бірлескен жобасын жүзеге асыру мерзімін жеделдету туралы келісілді.

Байқоңыр қаласының дамуын жаңа құрылыспен қатар, қолданыстағы инженерлік инфрақұрылым желілерін жаңғырту ісін Қазақстан тарапынан қаржыландыру механизмі бекітілді.  Мәселен, қаладағы ауыз су және кәріз желілерін жаңғыртуды республикалық бюджет есебінен жүргізу үшін олар жалдан шығарылып,  Қызылорда облысының коммуналдық меншігіне берілді.

Байқоңыр қаласын газдандыру жұмыстары жалғасуда. Өткен жылдың қараша айында бірқатар тұрғын үй (447 пәтер), 5 мектеп және 1 балабақша көгілдір отынға қосылды. Қазіргі кезде Қазақстан Республикасының қаржысы есебінен 5 көпқабатты тұрғын  үйдің құрылысы басталды. "Байқоңыр" кешеніндегі тұтынушылар үшін электр энергиясын бағасын төмендету шаралары да жүруде.

Кездесу барысында қатысушылар Елбасы жолдауындағы негізгі бағыттар бойынша атқарылып жатқан жұмыстар жайлы да айтты.

ҚР Премьер-Министрі Бақытжан Сағынтаев өңір дамуының оң динамикасын атап өтіп, бағасын берді.

Облыс әкімінің баспасөз қызметі

 
БИЫЛ СЫР ӨҢІРІНДЕ 5 ИНВЕСТИЦИЯЛЫҚ ЖОБА ІСКЕ АСАДЫ
30.03.2018 09:26

Жаңа кәсіпорындарда 3,4 мың жұмыс құрылады. Биыл экспортқа бағытталған тағы 4 ірі өнеркәсіп өз жұмысын бастайды. Бұл туралы ҚР Премьер-Министрі Бақытжан Сағынтаев және Үкімет мүшелеріне "Аралтұз" АҚ жұмысымен танысу барысында облыс әкімінің орынбасары Евгений Ким мәлімдеді.

Бұл "Хайси Дэшен сода саласы" қытайлық компаниясымен бірлескен кальцийлендірілген сода шығаратын зауыт, тау-кен комбинатының құрылысы және ресейлік инвесторлармен бірлесе тұз өндіру зауыты, сондай-ақ, "Байқоңыр" ӘКК қатысуымен  жылына 1500 тонна өнім өндіретін құс фабрикасы және "Баласауысқандық" ванадий кен орнында ванадий бес окисінің өндірісін айына 50 тоннаға дейін ұлғайту.

"Осы жылы біз 3 мыңнан астам жұмыс орнын ашуға мүмкіндік беретін 301 млрд теңгенің 5 инвестициялық жобасын іске асыруды жоспарлап отырмыз" - деп мәлімдеді облыс әкімінің орынбасары Евгений Ким.

Айта кетейік, 2017 жылы аммоний метаванадаты экспортталатын елдер қатарына Ұлыбритания да қосылды, өткен жылы кәсіпорын экспорт көлемін 3,2 есеге ұлғайтты.

Сонымен қатар, жыл соңына дейін өңірде  тағы 4 жоба іске қосылады.

"2018 жылы 102 млрд. теңгенің 4 жобасын іске қосуды межелеп отырмыз. 650 жұмыс орны ашылады. Бұл - молибден үш окисі өндірісі, тампонажды цемент және шыны шығаратын зауыттар, сондай-ақ, балық өңдеу цехы. Бұл еліміздегі ірі өндіріс орындары, экспортқа бейімделген және жаңа технологияларды қолданатын кәсіпорындар болады", - деді Евгений Ким.

Сонымен қатар, Қытай, Иран, Түркия және Татарстан елдеріндегі шетелдік әріптестермен 9 бастамалы инвестициялық жобаны бірлесе жүзеге асыру жоспарлануда.

"Қытай тарапымен 5 жобаны: күн панелдері, смартфондар мен планшеттерге арналған аса жұқа әйнек өндірісі; күн және су электрстанцияларының құрылысы; тұрмыстық қатты қалдықтарды өңдейтін және жарылғыш заттар шығаратын зауыт салу жоспарлануда.  Түрік елімен 3 жоба, оның ішінде "Юлдызлар ССС холдинг"  компаниясымен қуаттылығы 138 мВт болатын газ поршенді электр станция мен керамикалық плита шығаратын зауыт құрылысы, сондай-ақ, түркиялық "Tat" компаниясымен бірігіп томат пастасын өндіруді жүзеге асырамыз. Ал, ирандық инвесторлармен құны шамамен 1 млрд.теңге болатын ет комбинатының құрылысын жүргізу мәселесі қаралып жатыр", - деп атап өтті облыс әкімінің орынбасары Евгений Ким.

Облыс әкімінің баспасөз қызметі

 
<< Бірінші < Алдыңғы 1 2 3 4 5 6 7 8 9 10 Келесі > Соңы >>

Күнтізбе

< Сәуір 2018 >
            1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30            

Сауалнама

Аса мәртебелі шенеуніктердің қылмысқа шатылып жатқандығы нені аңғартады?
 

Ауа райы

Валюта бағамы

Қазақстан Республикасының Ұлттық Банкі валюталардың ресми бағамдары