Өзекті мәселелер

  • 17.10.19

    Қазақстан Республикасының Президенті Қасым-Жомарт Тоқаев Қазақстан халқына «Сындарлы қоғамдық­ диалог – Қазақстанның тұрақтылығы мен өркендеуінің негізі» атты алғашқы Жолдауын жариялаған­ы баршамызға белгілі. Сарапшылардың басым­  бөлігі бұл Жолдауға Қазақстан Республикасының Тұңғыш Президенті Н.Ә.Назарбаев айқындап берген саясаттың жалғасы деп баға беруде. Мұны еліміздің негізгі саяси бағыты с...

    Толығырақ...
  • 17.10.19

    Әнуар Дәуленбаев – 2016 жылдың наурыз айынан бастап №8 Төретам сайлау округі бойынша облыстық мәслихат депутаты. Өзінің сайлауалды бағдарламасында Байқоңыр қаласы мен Қармақшы ауданындағы кәсіптік білім беретін оқу орындарының базасын нығайтуға күш салатындығы туралы­  айтқан еді. Айтылған уәде бойынша мектепті жаңадан бітірген, тәжірибесі жоқ және жұмысқа орналаса алмай жүрген жастарды...

    Толығырақ...
  • 17.10.19

    Таңмен таласып, жұртпен жағаласып, кезекті күнімізді қарбаласпен бастап жатырмы­з. Бәрі де бір мақсатты күйттеп, бағыт алып барады. Біреуі жеке көлігімен, енді біреуі қоғамдық көлікпен кетпекші. Қолсағатыма қарасам, сабақтың басталуына­ небәрі 10-15 минутқа­ жетер-жетпес уақыт бар екен. Таксимен жеделд­етіп жетпек ниет­пен, тұрақта тұрған көліктің артқы есігін ашып, отыра кеттім. Тәуелсіздік да...

    Толығырақ...
  • 17.10.19

    «Сыбырлағанды да Құдай есітпей ме?» деген. Несіне жасырамыз, осыдан бірнеше жыл бұрынғы Қармақшының халін дүйім жұрт біледі. Экономикасы баяу, кәсіптің көзі жоқ, алға жылжиын десе халықта ынта болмаған еді. Мұндайда елдің есін жинайтын көреген басшы керек. Жұрттың да тілегені табылғандай, әуелі Жаратқанның, содан соң білікті басшылардың арқасында Қармақшы ауданында динамикалық өсу қарқы...

    Толығырақ...
  • 16.10.19

    Тәуелсіздік күні қарсаңында «Шіркейлі» арнасындағы көпірдің ашылу салтанаты өтеді... «7-20-25» бағдарламасы бойынша тұрғын үйлер халық игілігіне пайдалануға беріледі... Жыл басынан бері сәулет-құрылыс саласындағы заңнама талаптарын бұзған тұлғаларға 16 млн 822 мың теңге айыппұл салынған... 2019-2021 жылдары газдандыру жұмыстарына 22 млрд теңге қаржы бөлінеді...

Халық-хабар
«ЖАНДЫ АРБАТ» БОЙЫН ЖАНДАНДЫРДЫ
09.10.2019 17:00

Жыл сайын қала күні елеусіз қалған емес. Өткен жылы 200 жылдық мерейтой аясында да ауқымды шаралар ұйымдастырылып, халықтың мерейін тасытқан еді. Биыл да дәстүрлі үрдіс өз жалғасын тауып, сүйікті қаланың туған күнін бір ай бойына тойлау бақыты бұйырды. Қыркүйек айының орта шенінде баста­лған шаралар қазан айының 12-сіне дейін жалғасады деп күтілуде. Әртүрлі форматтағы іс шаралар легі «YOUTH FORMULA» – жастық шақтың формуласын сезін!» мерекелік кешімен жалғасты. Шара балаба­қша қызметкерлері, ерікті жастар, қоғам белсенділері, этно­мәде­ни  ұйымдар, өңір спортшылары мен мүмкіндігі шектеулі жандардың қатысуымен «Достық» үйінен жастар карнавалымен бастау алды. Жина­лған  қауым түр­лі­ше өрнектелген балалар қоларбалары көрмесін таныс­тырып, ертегі кейіп­керлерінің және дәстүрлі мерекелік киімдерін киіп, түрлі аспапта ойнау арқылы «Жанды арбат» бойын жандандырды. Жалпы 100-ден аса қатысушыны қам­ты­ған жастар карнавалы қала тұрғындарын қы­зықты мәдени-көпшілік шаралар орталығына апарды.

Одан ары орталық алаңда асық ату, «Wor­kout» спорттық сайыс­тары, жас отбасылар ара­сынд­а «Толағай» спорттық сайысы өтті. Гаджет  ойындарынан бас тартып, қарапайым достық­қа баулитын «Біз де бала болғанбыз» атты ескіден қалған аула  ойын­дарына қатысуға ниет білдіруші қала тұр­ғын­дары  арасында  сайыс­ ұйымдасты­рылды. Жеңіс­ке жеткен қатысушылар бағалы сыйлықтармен марапатталды. Қала тұрғындары мен қонақтары ұлттық тағам түрі бауырсақтан дәм татты. Шара одан әрі «LIVE ARBAT» жастар концертіне жалғасып, студенттердің бірі ән шырқаса, бірі түрлі аспаптарда ойнап, Орталық  алаңды  ерекше реңге­ бөледі. Сонымен қатар, шараға арнайы ат басын бұрған қала әкі­мі­нің орынбасары Бектас Нұриддинов пен «Абзал и К» ТС директоры Мағжан Ералиев қатысып, көпбалалы отбасыны қуанышқа бөлейтін тосынсый  жасады. «Абзал и К» ТС Қызылорда қа­лалық әкімдігі мен «Атамекен» республикалық кәсіпкерлер палатасының қолдауымен жүзеге асып жатқан «Менің ата­ме­кенім» әлеуметтік жоба­сы аясында үш бөл­мелі пәтер кілтін көпбалалы отбасыға табыстады.

Бақытқа бөленген отбас­ындағы 5 немеренің әжесі демеушілік көр­сеткен кәсіпкер «Абзал и К» ТС директоры Мағжан Абзалұлына жо­март­тықтың шынайы үлгісін көрсетіп, күтпеген сый жасағаны үшін шын жүректен алғысын жаудырды. Кәсіпкердің бұл отбасыны таңдауына түрткі болған жас маман ретінде Нұрболат жұ­байы Ботагөзбен бірге мектеп жасындағы екі ұл және үш жастағы үшем – Хадиша, Райяна және Айшаны тәрбиелеп, жалдамалы пәтерде тұруына қарамастан көпбалалы отбасының  тіреуіші  бола білгендігі.

Жастардың  арасында жомарттықтың орасан үлгісімен есте қалған кеш танымал ди-джейлердің қатысуымен арбат бо­йындағы би кешіне ұласты.­

 

Халық-хабар

 
ҚЫЗЫЛОРДАДА ЭЛЕКТРОНДЫ БИЛЕТ ЖҮЙЕСІ ЕНГІЗІЛЕДІ
09.10.2019 16:48

Қоғамдық көлік тасымалы туралы мәселе бүгінгінің басты тақырыптар қатарынан түскен жоқ. Естеріңізде болса,­ 2017 жылы қалаішілік маршруттардағы жолақы құны ересектерге 90 теңге, оқушыларға 40 теңгеге көте­рілген еді. Ал арнайы жеңілдіктер І топ мүгедектеріне, бала күнінен мүгедек 16 жасқа дейін балаларға, ҰОС ардагерлеріне қарастырылған. Әрине, халыққа сапалы қызмет көрсетеді, қоғамдық көліктер қатары жаңаланады деген басты­ талап та болды. Бірқатары жаңаланып та, кейбірінің тозығы жетіп те үлгерді. Жолаушылар тасымалын ұйымдастырып, көлік инфрақұрылымын жандандыру мақсатында 2013 жылы «Қызылорда» автобус паркі» ЖШС құрылған еді. Содан бері қалалық жолауш­ылар тасымалына жауап беріп келе жатқан мекеме қарамағында бүгінде 32 бағыт бойынша 680 көлік бар. Жыл соңына дейін тағы да жаңа авто­бустар  әкелінеді  деген­ жоспар бар. Бұл туралы қала әкімінің орынбасары Ерлан Бердібаев өңірлік коммуни­кациялар қызме­тінде өткен брифинг  барысында  айтты.

Жолаушы тасымалын сапал­ы ұйымдастыру мақсатында жыл соңына дейін мемлекеттік-жекешелік әріп­тестік аясында «Қызылорда қаласындағы қоғамдық көлік­терге электрондық билет жүйесін орнату» жобасы іске асырылады. Алғашқы кезеңде 2019 жылдың 1 желтоқсанында автопарк меншігіндегі автобус­тарға «Alem Pay» ЖШС-мен электронды би­летт­ік жүйе орнатылатын болса,­ желтоқсан айының екінші жартысынан бастап қалаішілік барлық маршрут­тарға орнату жоспарлануда. Бұл «Alem Pay» ЖШС-нің жеке қаржысы есебінен іске асырылады. Сондай-ақ, республика көлемінде бюджет қаржысынан тыс іске асырылып отырған осы саладағы алғаш­қы  жобалардың  бірі.

- Ағымдағы жылдың 1 желтоқсанында автобустарға арнай­ы электронды билет жүйесі енгізіледі. Жылдың соңына дейін қолма-қол төлем де, электронды төлем де 90 теңге күйінде сақталады. Ал жыл басынан бастап электрон­ды жолақы төлеу 90 теңгеден 80 теңгеге арзандап, қолма-қол төлем ұсыну 150 теңгеге қымбаттайды. Бұған дейінгі қоғамдық көліктердегі жеңілдіктер сақталады және алдағы уақытта электронды билетке­ қатысты қосымша жеңілдіктер қарастырылады. Бұл өз кезегінде табыс көзінің ашықтығына және автобус паркін жаңартуға қол жеткізетін болады. Қала тұрғындарының сұранысына сәйкес облыстық бюджеттен 278 млн теңге қаржы қаралып, қосымша үлкен сыйымдылықты 35 дана автобус сатып алынады деп күтілуде, - деді қала әкімі­нің орынбасары Е.Құлахметұлы.

Сала мамандарынан бұған дейінгі «Senim» онлайн төлем жүргізу жобасы туралы сұрағанымызда, ол жобаның өз-өзін ақтамай тұрғанын білдік. Қолданысқа енгеніне жылдан асса да, 1-2%-дан жоғары көрсеткішке көрсетілмеген.

Тағы бір мәселе, қазіргі күні қоғамдық  көліктерде 7-17 жас аралығындағы балаларға жолақы 40 теңге деп белгіленген. Алайда мектепті толық аяқ­тамай, колледжге оқуға түскен, бірақ 17-ге толмаған балалар ересек адам­дардың жолақы құнын төлеуге мәжбүр.

- Бүгінгі күні 17 жасқа толмаған кез келген бала 40 теңге төлейді. Егер одан жоғары жолақы талап етілген жағдайда автобус туралы ақпаратты қоса отырып, «Автобус паркіне» хабарлауға болады. Ал алдағы өзгеріске енгелі отырған 7-15 жас аралығындағы оқушыларға жеңіл­дік туралы айтар болсақ, ҚР Авто­мобиль көлігі туралы Заңының 20-бабы, 1-тармағының 6-тармақшасында «Жолауш­ының 7 жастан 15 жасқа дейiнгi балаларға жол жүру құжатының (билетiнiң) толық құнының елу процен­тiн төлеп, жол жүру құжаттарын (билеттерiн) сатып алуға құқығы бар» делінген. Дегенмен, 17 жасқа дейінгі балаларды­ң жеңілдігін сол күйінде сақтап­ қалу үшін облыстық мәслихатқа хат жолдаудамыз, - деді «Қызылорда» автобус паркі» ЖШС директорының орынбасары Қанат Рахметов.

Қоғамдық көліктерге қатысты бұл өзгерістерді жолаушылардың осы уақытқа дейінгі төлеп келген жолақысының қайтарымы деп ұққан жөн. Атал­ған­ жүйені қолдану арқылы әр маршру­т бойынша нақты жолаушылар ағымы анықталып, кірістері мен шығындары нақтыланатын болады. Сонымен қатар маршруттарда автобустардың жұмыс уақыты, қозғалыс жылдамдығы, интервалдарының сақталуы қадағаланатын болады. Өзін-өзі ақтамайтын, шығындары жоғары кейбір маршруттар әлеуметтік мәні бар маршруттар тізбесіне енгізіліп, тиісті бюджеттерден субсидия­лау  мәселесі  қарастырылатын  болады.

 

Н.ҚҰДАЙБЕРГЕН

 
АТАУЛЫ ӘЛЕУМЕТТІК КӨМЕККЕ ЖАҢА ФОРМАТ ЕНГІЗІЛДІ
09.10.2019 16:45

Халықтың белгілі бір санатына жататын тобын әлеу­меттік қолдау жұмыстары жыл басынан бері күшейтіліп, атаулы әлеуметтік көмек тағайындалғаны­ есімізде. Бұл – аз қамтылған, табысы төмен отбасыларға берілген атаулы көмек. Ақшалай және әлеумет­тік  бейімдеу бойынша жұмысқа орналастыру, өз бизнес­ін ұйымдастыруға көмектесу және жұмыспен қамтудың басқа да түрлері арқылы отбасының табысын арттыруға бағытталған. Өткен жылы атаулы әлеуметтік көмек (бұдан әрі – АӘК - ред.) жан басына шаққанда табысы төменгі күнкөріс деңгейінің 50 па­йы­зынан төмен отбасыларға осы мұқтаждық шегі мен табыстың айырмасы ретінде отбасының әр мүшесіне төленді. Ал 2019 жылы мұқтаждық шегі ең төменгі күнкөріс деңгейінің 50 пайызынан 70 пайызына дейін көтерілді. Осыған орай, АӘК алуға жан басына шаққандағы табысы 20789 теңгеден төмен отбасылар ғана алуға құқылы. Бұл көмек ата-анаға жан басына шаққан­д­ағы табысының айырмасы ретінде тағайындалса, балалар­ға толық төленеді. Сондықтан көмектің бұл түрі жалғастырылады. Сондай-ақ, 2020 жылдан бастап­ АӘК-тің жаңа түрі іске қосылады.

- Атаулы әлеуметтік көмек аз қамтамасыз етілген отбасыларға төленеді. Критерийі өңірлік ең төменгі күнкөріс  деңгейінің  70%-ы  деңгейінде  қалады. АӘК мөлшері жан басына шаққандағы орташа табыс пен ең төменгі күнкөріс деңгейінің 70% арасындағы айырма ретінде төленеді. Яғни, бұған дейін 20789 теңгеден есептелсе, бұл жолы табыс айырмасы 19680 теңгеден шағылады. Басты шарттардың бірі отбасының еңбекке қабілетті мүшелері жұмыс істеуі керек және отбасы үшін жауапкершілікті сезінуі тиіс. Ол үшін бірінші кезекте аз қамтылған отбасындағы жұмыссыз азаматтар тұрақты жұмыспен немесе «Еңбек» жұмыспе­н қамту бағдарламасына тартылады, - деді облыс­тық жұмыспен қамтуды үйлестіру және әлеу­метті­к  бағдарламалар  басқармасының  басшысы Талға­т  Дүйсебаев.

Айта кетейік, жаңа тәсілмен берілетін АӘК бірінші кезекте балаларға және көпбалалы отбасыларға көмектеседі. Еңбекке қабілетті азаматтарға жұмысқа орналасуға немесе кіші бизнеспен айналысуына жағдай жасайды. Осы бағыттағы кешенді шаралар 3 бағытты құрайды. Атаулы әлеуметтік көмек алатын балалардың 60%-ға жуығы – көпбалалы отбасылардан. Бұл мемлекеттік жәрдемақыны төлеу отбасының табы­сына тәуелді болмайды және барлық көпбалалы, яғни 4 және одан да көп кәмелеттік жасқа толмаған балалары­ бар отбасыларға төленеді. Яғни, 4 балаға – 42 500 теңге, 5 балаға – 53 125 теңге, 6 балаға – 63 750 теңге, 7 балаға – 73 375 теңге. Сонымен бірге, оларға бос жұмыс орындарына, мемлекетпен субсидияланатын жұмыс орындарына, қоғамдық жұмысқа орналасуды, жастар тәжірибесінен, қайта даярлаудан өтуге мүмкіндік болады. Өз бизнесін ашу үшін кәсіптік негіздеріне оқытылып, жеңілдікпен микрокредит және қайтарымсыз гранттар алу ұсынылады. Отбасының еңбекке қабілетті мүшесі ұсынылған жұмыстан және жұмыспен қамту шараларынан бас тартатын болса,­ онда АӘК тек оған ғана емес, бүкіл отбасыға тоқтатылатын болады. Бұл ретте отбасындағы бала күтіміне байланысты отырған аналар үшін тың өзгеріс бар. Мәселен, бұған дейін 7 жасқа дейінгі бала күті­мінде отырған ата-аналарға жәрдемақы төленіп келсе,­ келесі жылдан бастап бала күтімі 3 жасқа дейін ғана ескеріледі. Сонымен қатар, аз қамтамасыз етілген отбасы­лар үшін қосымша әлеуметтік кепілдендірілген пакет ендіріледі. Бұл пакет арқылы мектеп жасына­ дейінгі балаларға тамақ, гигиеналық құралдар берілсе,­ мектеп жасындағы балалар үшін мектепте ыстық тамақ, мектеп құрал-жабдықтары мен киім-кешектері, жолақысын өтеу қамтамасыз етілетін болады. Бұған дейінгі әлеуметтік көмекті алу үшін облысымызда отбасы жағдайы мен табысын жасырған 3637 отбасы анықталған, олардан 195 млн теңге мемлекет бюджетіне кері қайтарылуы тиіс. Және 1448 отбасыға төленетін 980 млн теңге қаржы тоқтатылған. Ал шын мұқтаждығы анықталған отбасыларға бұл көмектің түрлері тоқтатылмайды. Айтпақшы, АӘК тағайын­далмас бұрын әрбір отбасының әлеуметтік картасы жасалып­, сол арқылы мемлекеттік органдардың ақпарат­тық жүйелерінен автоматтандырылған деректер­ негізінде отбасылардың нақты мәртебесі анықталып, қадағаланатын  болады.

Халық-хабар

 
Түлектер ЖОО-ға құжатсыз қабылданады
09.10.2019 16:40

Қай жерге барсаң да, қағазсыз шаруа бітпейтін бұрын. Жыл өткен сайын жүгіміз де жеңілдеп келеді. Қоғамға цифрландыру ұғымы енгелі кей салаларда  компьютер ғана «сөйлеп» жүр. Сондықтан сандық жүйеге  жас-кәрі деп бөлінбей, бәріміз бірдей бой үйретуімізге тура келіп тұр. Осы орайда Тұңғыш Президентіміз Н.Ә.Назарбаевтың өзі: «Мектеп оқушысынан бастап зейнеткерлерге дейін сандық технологияларды үйренуі керек. Бұл бағытта халықтың сауаттылығын арттыру маңызды»,- деген еді. Рас. Жаһанның жаңалығына ілесіп отырмасақ, ілгерілемейтініміз ап-анық.

Енді тақырыпқа оралайық. Сөздің төркіні цифрландырудан басталды. Қазір 3D-принтинг, онлайн-сауда, мобильді банкинг, денсаулық сақтау, білім беру және басқа да перспективалы салалар сандық жүйенің сиқырлы әлеміне дендеп еніп жатыр.

Қазір студенттердің жоғары оқу орнына құжат тапсы­руы – үлкен мәселенің бірі. Құжаттарды жинау, оларды өткізу, кезекке тұру секілді жұмыстар құжат тапсырушы талапкерді мезі етеді. Енді үміткерлер үшін ҚР Білім және ғылым министрлігі жағымды жаңалы­қ жеткізіп отыр. Жоғары оқу орнына құжат қабылдау да цифрланады.

- Білім беру жүйесінде 67 қызмет электронды түрде қолжетімді. Мәселен, қазіргі уақытта жоғарғы оқу орнына құжат тапсыру қиын жұмыс болып көрінеді. 2020 жылдан бастап оның қажеті болмайды, себебі жыл соңына дейін барлық ақпарат цифрланады. «Күнделік» жүйесіндегі деректер автоматты түрде жоғары оқу орнына беріледі, сәйкесінше құжаттарды қайта тапсы­ру қажет емес. Жалпы, мектептер мен балабақшалардағы оқу процесі автоматтандырылған, - деді ҚР Білім және ғылым вице-министрі Р.Биғари.

Цифрландыруға үркіп емес, үмітпен қарасақ, дұрыс. Бұл – зымырап өтіп жатқан заманда уақыт үнемдеудің бір жолы. Есесіне енді студенттер сеңдей соғылып, қалың құжаттарын құшақтап жүрмейтін болады.

 

Әйгерім  НАЖМАДИНҚЫЗЫ

 
ҚАЗАЛЫДАҒЫ БАЙРАҚТЫ БӘСЕКЕ
08.10.2019 15:40

«Жеңіс» саябағы – кенттегі жұртшылық жиі бас қосатын жердің бірі. Мұндағы жапырағы желмен тербелген жасыл желектер, бручатка төселген мұнтаздай жолдар, алуан аллеялар, өмір жолы тағылымға толы тұлғалардың мүсіндері, өзге де көзге жағымды көрінетін көріністер кеудеңе шаттық ұялатады. Ауқымды саябақтың бой көтеруіне сол тұста аудандық партия комитетінің бірінші хатшысы қызметін атқарған Елеу Көшербаевтың мұрындық болғаны қазалылықтарға жақсы мәлім.

Мемлекет және қоғам қайраткері Елеу Көшербаевтың 90 жылдығына арналған кадеттер арасында грек-рим күресінен ХІV халықаралық турнирдің ашылу салтанаты «Жеңіс» саябағында өткізілуі тегін емес болатын. Байрақты бәсекеге Ресей, Өзбекстан, Тәжікстан, Қырғызстан Республикасына қоса Нұр-Сұлтан, Шымкент қаласы және Қазақстанның өзге де облыстарынан келген балуандар 10 салмақ дәрежесі бойынша бақ сынауда.

Турнирдің ашылу салтанатында облыс әкімінің орынбасары Наурызбай Байқадамов, аудан әкімі Мұрат Ергешбаев, грек-рим күресінен Олимпиада және әлем чемпионы, Қазақстанның Еңбек Ері Жақсылық Үшкемпіров, даңқты балуан Дәулет Тұрлыханов, «РЗА» АҚ президенті, Қызылорда облысы және Қазалы ауданының құрметті азаматы Самұрат Имандосов,  йтбай Көшербаев құттықтау сөз сөйлеп, жарысқа қатысушыларға сәттілік тіледі.

№17 Қазалы ауданының олимпиадалық резервтің мамандандырылған балалар-жасөспірімдер мектебі ғимаратында өтіп жатқан айтулы дода бірнеше күнге созылады.

Жұмабек ТАБЫНБАЕВ,

Қазалы ауданы

 
<< Бірінші < Алдыңғы 1 2 3 4 5 6 7 8 9 10 Келесі > Соңы >>

Күнтізбе

< Қазан 2019 >
  1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31      

Сауалнама

Аса мәртебелі шенеуніктердің қылмысқа шатылып жатқандығы нені аңғартады?
 

Ауа райы

Валюта бағамы

Қазақстан Республикасының Ұлттық Банкі валюталардың ресми бағамдары