ШИЕЛІ АУДАНЫНЫҢ ЖАҚАЕВ АУЫЛЫ «КӨГІЛДІР ОТЫНҒА» ҚОСЫЛДЫ | Print |
19.11.2018 10:12

Шиелі ауданының Ыбырай Жақаев ауылында табиғи газ жүргізілді.

Биыл Шиелі ауданының Ы.Жақаев және Бидайкөл елді мекендері көгілдір отынға қосылды. Қазіргі уақытта тұрғын үйлерге газ жүргізу туралы келісімшарт жасалуда.

"Мемлекет басшысының қолдауымен басталған ірі стратегиялық маңызы бар "Бейнеу-Бозой-Шымкент" магистралды газ құбыры Сыр еліне сәтті мүмкіндік берді. Олай дейтінім, облыс аумағынан өтетін 846 шақырымдық газ құбыры Қызылорда облысын газдандыруға жол ашты. Бұл Арал, Қазалы, Шиелі, Жаңақорған ауданы орталықтарын және өткен жылы Байқоңыр қаласын газдандыруға мүмкіндік берді. Міне, енді кент орталығынан бөлек ауылдық елді мекендерді де газдандыру жұмыстары жүргізілуде", - деді аймақ басшысы.

Ыбырай Жақаев ауылының тұрғыны Құралбек Әуелбеков алғашқылардың бірі болып үйіне газ жүргізді.

"Біз табиғи газ жүргізілгеніне қуаныштымыз. Енді пешті қолмен жағып, отын сатып алудың қажеті жоқ. Сонымен қатар, үйді газбен жылыту әр қыс сайын сатып алатын көмірге қарағанда әлдеқайда тиімді болады. Қазірдің өзінде үйіміз жылынып, жайлы көрінеді", - дейді Құралбектің жұбайы Ләззат Пәрменқұлова.

Биыл қалған 3 аудан орталығына - Жосалы, Тереңөзек және Жалағаш кенті «көгілдір отынға» қосылса, ал 2019 жылы кентішілік газ желілерінің құрылысы басталады.

Бүгінде облыс халқының 63%-ы табиғи газбен қамтамасыз етілді, 2020 жылға қарай 95 пайызға дейін жеткізу міндеті қойылып отыр.

Облыс әкімінің баспасөз қызметі