Жастардың жігерін жаныды | Print |
30.11.2018 11:34

Қорқыт ата атындағы ҚМУ-дың Студенттер сарайында Сыр өңіріне танымал тұлғалар мен жастардың кездесуі ұйымдастырылды. «Жастар тәрбиесі – қоғамның іргетасы» тақырыбындағы алқалы басқосу басқа жиындардан өзгерек өткендей. Себебі, қатысқан студенттер қадірлі қонақтармен еркін пікір алмасып, көкейде жүрген өзекті сауалдарына жауап ала алды.

Жиынға облыстық ішкі саясат басқармасы дін істері бөлімінің басшысы Е.Есов, «Дін мәселелерін зерттеу орталығы» КММ директоры Б.Камалов, облыстық «Сыр дидары» газетінің бас редакторы, ОАТТ мүшесі С.Алдашбаев, Панкратионнан ҚР-ның спорт шебері, ММА жастар арасындағы әлем чемпионатының жүлдегері Ғ.Әлсерік тағы басқа діни бірлестік өкілдері, теологтар, мәдениет және спорт майталмандары келді.

Елбасы «Еліміздің ертеңі, мемлекетіміздің жарқын болашағы білімді де білікті, алғыр әрі жалынды жастар қолында. Сендер, тәуелсіз қазақ елінің білімді жастары, өз соқпақтарыңды салып, оны елді дамуға бастайтын даңғылға айналдыруға тиіссіңдер» деген болатын. Ендеше ұлтты ұйыстырып, болашақты бұлыңғыр етпеу – жастардың тізгініндегі дүние. Е.Есов осы турасында сөз қозғап, шара шымылдығын ашты. Мұнан соң С.Алдашбаев жастар мәселесін салт-дәстүрмен сабақтастыра отырып, пікірін білдірді.

- Мәселен, біз үнді киносын көп көреміз. Сондағы дәстүрлеріне де көзіміз үйренген. Ал қазақтың салт-дәстүрлері ше? Бізге өзіміздің мәдениетті білу аса қажет. Біз ата-әжелерімізден осыны сұрауымыз керек. Қазақта ет асылған кезде малдың басын тартады. Сыбаға тартудың ережесін білмейтіндер табылуы мүмкін, - деді ол.

Сөз соңында жастарға «Он екі нәрсе бар қарғысқа ұшыраған, қазақ дастандарында бар. Соның не екенін сұраңдар. Мұсылман дінінде жеті құсты қасиетті құс санайды. Соны біліп, маған айтыңдар» деп тапсырма берді.

«Қазір дінге беріліп кеткен жастарымыз бұл дүниеден баз кешіп, қатты кетіп қалғаны соншалық, ата-анасын құрметтемейді. Ал кейбірі дүниеге қатты беріліп кеткені соншалықты руханиятымызды, ұлттық құндылықтарымызды ойламайды». Бұл пікірді ММА жастар арасындағы әлем чемпионатының қола жүлдегері Ғ.Әлсерік айтты. Кей замандастарының кері қылықтарына тоқталып, тіпті ата-анасын сыйламай кететінін де жеткізді. Алдымен ата-ананың разылығын алу қажеттігін айтып, жастарды Отанын сүюге, ата-анасының қас-қабағын аңдап, жүрегіне реніш түсірмеуге шақырды.

Осылайша жастар бойындағы ұлттық рух, ұлттық тәрбиені арттырып, зиянды әдеттер мен теріс жолға түсуден сақтауға үндеген жиын студент жастар үшін тағылымды болды.

Ж.Қойшыбекова